تازہ ترین
ur
بنیادی صفحہ » آزمانک » مون سٹی (Moon City)—–اسلم قادر

مون سٹی (Moon City)—–اسلم قادر

ناسا(NASA)ءِ سائنس زانت سک گل اتنت کہ آہاں وتی کرنے ءِ جہدے ءَ پد ماہ ءِ سرا میتگ مون سٹی جوڑ کنگ ءَ سوبمند بوتگ اتنت۔ مون سٹی ءِ چاریں نیمگ ءَ آسن ءِ مہکمیں چادر جنگ بوتگ ات انت کہ ڈنّ ءَ گوات دراتک مہ کنت۔ پرچہ کہ مون سٹی ءِ تہا آکسیجن، آپ، وانگ جاہ، ہسپتال، اولاک دْرسیں انتزام است اتنت، ہمک چیزءِ کہ کمی یے است ات آ جہل ءَ چہ زمین ءَ راکٹانی آسراتی ءَ آرگ بوتنت، بزاں ہچ وڑیں کمی نیست ات، مون سٹیءِ دْراہیں لوگ نوکیں داب ءِ ماڑی اتنت، دگ ساپ و پْراہ و کشادہ اتنت، موبائل و انٹرنیٹ ءِ آسراتی ہم است ات و جہل ءَ نشتگیں وتی سیاد و وارساں گوں حبرو حال ہم کت کنگا اتنت۔مون سٹی ءَ زمین ءِ اے دگہ گریبیں ءٰ بے وسیں مردمانی واستہ ہچ جاگہ نیست ات، دْرس مالدار و استی منداتنت پرچہ کہ ماہ ءِ سرا آہگ و اودءَ ماڑی جوڑ کنگ ءِ تاگت ہرکسی وس ءِ گپ نہ ات و اے دگہ آسراتی ہم پہ زرّ اتنت، مون سٹی ءَ چہ ڈن ماہ ءِ اے دگہ پٹّانی سرا نندگ نہ بوت پرچہ۔کہ اودا آپ و گوات دوئیں نیست ات و نہ زندگ بوہگ ءِ واستہ دگہ آسراتی۔ پمیشاں مون سٹی ءَ چہ ڈنّ ءِ درآہگ سک مکن ات۔ مون سٹی ءِ دْرسیں انتزام سک شرّ رؤگ ءَ اتنت۔
وہد گوزان بوت سائنس زانتاں اے جار جت کہ نوں ماہ ءِ سرا یک انچائیں مردمے سکیں کسانیں مزّے ءَ گوں شت کنت۔
اے ہما وہد اَت کہ زمین ءِ سرا شدُ و گژنگی، جنگ و جدل، ناتپاکی سک باز بوتگ اتنت ، گرمیں ہند گرمتر و سردیں ہند سردتر بوتگ اتنت ، بجلی و گیس و زند ءِ اے دگہ آسراتی نہ مرّینگ ءَ اتنت۔
مون سٹی ءِ مردماں وہدے اے حبر اُش کت کہ نوں ماہ ءِ سرا آہگ سک ارزان بوتگ و نوں انچائیں مردم کا انت مون سٹی ءَآباد بنت۔ پرچہ کہ ماہ ءِ اے دگہ پٹّانی سرا آ آسراتی نیست انت و مون سٹی ءَ ابید دگہ جاہ ءَ زندگی بوت نہ بوتگ ات۔ مون سٹی سک مزن جوڑ کنگ بوتگ ات و انگت اود ءَ بازیںِ مہلوکے ءَ نشت و زند گوازینت کتگ ات، اشی ءَ چہ ابید آ کشادہ کنگ ہم بوتگ ات، ماہ ءِ سرا دگہ میتگ جوڑ کنگ وَ بوتگ ات بلئے اود ءَ آپ و آکسیجن ءِ انتزام کنگ سک گْران ات و اودءَ پہ اشانی انتزام کنگ ءِ تاگت انچائیں مردمانی کارے نہ ات پمیشا پہ اے دگہ مردمانی واستہ دگہ ہچ راہ نیست ات ابید اشی ءَ کہ مون سٹی کشادہ کنگ بہ بیت و دْرسیں مہلوک ہمودا آباد بہ بیت۔
مون سٹی ءِ مردم اے گپ ءِ منگ ءِ واستہ ہچ وڑا تیار نہ بوتنت، آہانی گُشگ ہمیش ات کہ زمین ءِ انچائیں مردم وہدے ادا کا انت و آباد بنت ادا مئے آپ و آکسیجن کم ترّ انت، آ مزنیں ماڑی مئے وڑا بست نہ کننت، آہانی کسانیں لوگ مئے شہر ءِ جلوہ ءَ برنت۔ آ مئے پُچانی وڑیں کیمتی ایں پوشاک گْورا کت نہ کننت آہانی چُک گوں جنڈیں پُچاں گوں درتگیں سواساں مئے چُکانی مکتباں واننت گڑا مئے چُکانی ساپیں پوشاک وجلوہ ناکیں سواساں مانہے نہ بیت، آ سپائی ءِحیال نہ دار نت، مئے ہسپتال و شہر ءِ دمک لیگاربنت۔ آ چہ ہرچ وڑا چہ ما جتاہاں آہانی و مئے نندگ و پاد آہگاں زمین و آزمان ءِ تپاوت انت۔ما ہچ وڑا آہانی جاگہ دیگ ءِ واستہ تیار نیاں اگاں آ بیا انت گڑا ما آہاں تیلانک دیان و در کناں۔
وہدے زمینِ ءِ سرا اے حال کلیں دنیا ءَ شنگ بوت گڑاہرکسے ءِ کرا کہ موبائل است ات، آہاں موبائل ءِ سرا ماہ ءِ مون سٹی ءَ نشتگیں وتی مردم کلوہ و حال کتنت کہ ما ادا زمین ءِ سرا سک بدحا ل ایں، شما مئے ماہ ءِ سرا آہگ ءِ راہ ءَ بند مہ کن ات، بلئے مون سٹی ءِ مردم ہچ وڑا منگ ءَ نہ اتنت، گڈسر ءَ آہاں موبائل ءِ ہما ٹاور کہ گوں زمین ءِ مردمانی موبائلاں رسانک سر کنگا اتنت دْرس یک یک ءَپچ کتنت و دؤر داتنت، مون سٹی و زمین ءِ سرا نشتگیں مردمانی حبرو حال گوں یکے دومی ءَ ہلاس بوت۔
زمین ءِ سرا نشتگیں مردم سک بدحال اتنت کہ نوں زمین ءِ سر ءَ نندگ سک گْران ات۔ آ دعا لوٹگ ءَ اتنت کہ ماہ ءِ سر ءِ مردم آہانی گپاں بہ من ّانت۔
وہد گْوزان بوت مون سٹی ءِ مردماں داں دیراں نہ منّ ات، یک روچے اناگاہ ءَ ماہ لرزگ ءَ لگ اِت، مون سٹی ءِ مردم ہبکہ و ہیران بوتنت، اناگاہ ءَ تْراکے بوت ماہ دوکپ بوت۔ ماہ ءِ ہما بہرکہ اودا مون سٹی جوڑ بوتگ ات جہل ءَ کپت و چُنڈ چُنڈ بوت، دْرسیں مردم، ماڑی، اولاک تباہ بوتنت۔
اناگاہ ءَ دْرسیں مردُماں چم پچ کتنت ، آہاں ہمے مارات کہ آ یک برے مرتگ و پدا زندگ کنگ بوتگ انت، آہاں اے دیم آ دیما چارات کہ ما ہما زمین ءِ سراہاں کہ لہتیں سال پیش بوتگ ایں،و زمین ءِ سرا مارا ابید دگہ مردم کس نیست، ساہتے ءَ رند لہتیں اسپیت پوشیں مردم جنین و مردین اتک انت، گوں آہاں جست اش کت شما کج ءِ مردم اِت؟، آہاں پسہ دات ما مون سٹی ءِ مردم ایں۔ پدا ہمے مردماں گوں اسپیت پوشیں مردماں جُست کت کہ زمین ءِ سرا نشتگیں مردم کج انت ؟ اسپیت پوشیں مردماں گشت کہ ماہ یک تْراکے ءِ سوب ءَ دوکپ بوتگ، اود ءَ یک بلائیں ٹُکرے پشت کپتگ، ہمے تراک ءِ سوَب ءَ اودا موسمی جاور بدل بوتگ انت و اودا آپ و گوات ہم پیداک بوتگ، نوں اود ءَ انسان ءِ نندگ ءِ دْرسیں ابرمی آسراتی است انت ، اے دْرسیں مردم چست کنگ ماہ ءِ سرا برگ بوتگ انت بلئے شما شُت نہ کن اِت، شمے واستہ ہمدا یک شہرے جوڑ کنگ بوتگ ۔ براں ما شمئے رندا اتکگیں، دْرسیں مردم ہیران بوتنت پاداتک انت ہمے اسپیت پوشیں مردمانی پشت ءَ روان بوتنت کمے دیم ءِ رؤگ ءَ پد آہاں دیست کہ بلائیں چاردیواری یے ات کہ ایشی ءِ تہا یک بلائیں آسے جمبور ات۔ چاردیواری ءِ دروازگ ءِ دپ ءَ یک سائن بورڑے ءِ سرا نبشتہ اَت۔” مون سٹی “ ۔
٭٭٭

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*