تازہ ترین
ur
بنیادی صفحہ » خاصیں کاگد » سید ہاشمی ریفرنس کتابجاہ ءِ لس مجلس و گچین کاری دیوان ءِ رپورٹ—-چندن ساچؔ

سید ہاشمی ریفرنس کتابجاہ ءِ لس مجلس و گچین کاری دیوان ءِ رپورٹ—-چندن ساچؔ

انسان ءِ ہزاراں سالانی گْوستانک ءِ سرا اگاں مردم چماں شانک بہ دنت تہ پدّر بیت کہ ہما زمانگ ءَ انسان ءَ علم و زانت ءِ چراغ روک کتگ ہما اِنت انسان و کتاب ءِ دوستی ءِ سفر برجاہ اِنت۔ اولی کتاب کئے ءَ جوڑ کتہ؟ کجام ملک و دمگ ءِ مردم بُوتگ؟ اولی کتاب ءِ تہا چے نبشتہ بُوتگ؟ اِے جستانی راستیں پسّہ بگندئے دَیگ مہ بیت۔ پرچا کہ انگہ دنیا ءِ 90 در سد راز پدّر نہ بُوتگ۔ بلے دمب زانت و پٹ و پولکارانی گشئگ انت کہ دنیا ءِ اولی دودمان ءِ بن ہشت ایر کنوک سمیری راج بُوتگ و ایشی ءَ پد 4 ہزار سال پیش مسیح ءَ دریائے نیل ءِ دمگ ءَ دومی راج ءَ اے شرف حاصل اِنت۔ ڈاکٹر اسمتہ ولیم ءَ مصر ءِ دودمان پنچ ہزار پیش مسیح ءِ لیکہ اتگ۔ مصر ءَ ہما نبشتہی مواد کہ مارا دز کپتگ اَنت آ کوہنیں ہیروغلیفی اِنت۔
انسان ءَ وتی راجدپتر و گْوستانک ءِ پہریزگ ءِ حیال ہما زمانگ ءَ اتکہ کہ وہدے مزنیں وئیلانی سبب ءَ انسان ءِ راجدپتری چیز زوال بوتگ اَنت۔ پمیشکا انساناں وتی مذہبی و راجدپتری چیزانی پہازگ بندات کُتگ۔ ہمدا انسان ءَ گلچ و سنگانی سرا نبشتہ کنئگ ءِ سفر بندات کُتگ۔
نینوا ءِ بادشاہ آشور بنی پال ءِ ماڈی ءِ پٹ و ہنڈ ءَ بازیں مواد دز کپتگ اَنت کہ گلچ ءِ سرا نبشتہ اَنت۔ کتابانی نبشتہ کنئگ ءَ پد کتاب جاہانی بن ہشت ہم ائیر کنئگ بُوتگ۔ راجدپتر شاہد اِنت کہ بازیں کتاب جاہ علم دژمنانی دستاں تباہ و برباد بوتگ اَنت۔ بلے پدا ہم علم دوستاں کتاب چیر داتگ و اے سفر دیما بُرتگ۔ اِے سفر ءَ ما یونانی، مصری، رومن راج ءَ ہوار بازیں راجاں گندیں۔ اِدا جولس سیزر ءَ گندیں کہ آ، مہلوک ءِ واستہ کتاب جاہے ءِ بن ہشت ایر کنئگ ءِ واب ءَ گندیت بلے آئی ءِ واب سرجم نہ بیت و آ پیسر ءَ کُشئگ بیت۔ پدا ایسی نی ایس پولیو کئیت۔ آ روم ءَ اولی پبلک لائبریری ءِ بن ہشت ءَ ایر کنت۔ اے ہمے سفر اِنت کہ اِدا مئے زمانگ ءَ سر بیت۔ اِدا پروفیسر صبا دشتیاری ؔاِنت کہ گوں کتاباں مہر و دوستی ءِ سفر ءَ دیما بارت و سید ہاشمی ریفرنس کتاب جاہ ءِ نام ءَ پہ علم و زانت ءِ شدیکاں کتاب جاہے ءِ ماڑی ءَ مِکّ کنت۔۔۔۔۔ اِے دنیا انت اِدا کس نہ نندیت و پاگ نہ بندیت۔ بلے لہتیں ہنچیں انسان بنت کہ آ رؤنت آیانی روک کتگیں چراغ ابدمانی ءِ گواہی دئینت۔ استاد صبا دشتیاری ءِ مہرانی بنجل ہم ہمے گواہی ءَ دنت۔۔۔۔ اِے سفر ءِ دیما برَگ ءِ واستہ بازیں واب گندوکیں کارست ہست اَنت۔ اِے کارستانی نوک گچین کنئگ ءِ واستہ ہر دو سال ءِ سرا سید ہاشمی ریفرنس کتاب جاہ ءَ گچین کاری بنت۔ اے سال بزانکہ 2017 ءَ ہم 8 جنوری ءَ بیگاہ ءِ ساعت ءَ کتاب جاہ ءَ گچین کاری بُوتنت کہ گچین کاری ءَ دائمی وڑا کتاب جاہ ءِ بازیں باسکاں بہر زرت۔ گچین کاری ءِ مراگش ءَ بازیں باسکانی نیمگا کتاب جاہ ءِ بابت ءَ جست و پُرس ہم کنئگ بوت کہ کتاب جاہ ءِ اُگدہ داراں آیانی جستانی یک پہ یک پسّہ ہم داتنت۔ سال 2015 و 2016 ءِ نگدال ہم کار گشاد و حسابدار ءَ ونت و باسک سرپدی دات اَنت۔ گڈسرا کتاب جاہ ءَ گچین کاری بوت۔ گچین کاری ءِ اگدہ پروفیسر رحیم مہرؔ، اسحاق خاموشؔ و بشیر بلوچ ؔءَ وتی کوپگاں زُرت۔ اِے سال ءَ گچین کاری ءَ غلام رسول بلوچؔ کارمستر، ڈاکٹر رمضان بامریؔ نائب کارمستر اولی، بانک مریم بلوچؔ نائب کارمستر دومی، خالد بلوچؔ کارگشاد، جمال ناصر ؔنائب کارگشاد، سلمان بلوچؔ حسابدار، سجاد بلوچؔ رابطہ سیکریٹری، چندن ساچؔ جار کش، ظریف محمود ؔکارگس کاردار، انتظام کار کمیٹی ءَ بانک شریفہ شمبےؔ، شرف شادؔ، حسن علی حسنؔ، عبدالرؤف بلوچؔ، عمران ایڈوکیٹ و حامد بلوچؔ سوب مند بُوتنت۔ زانگ بہ بیت کہ انتظام کار کمیٹی ءِ واستا بازیں مردماں پہ گچین کاری ءَ کاگد جم داتنت بلے گچین کاری ءَ شش مردم دیما اتک۔
٭٭٭

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*