بنیادی صفحہ » نوشتانک » لہتے گْواتانی نام—-حسن علی

لہتے گْواتانی نام—-حسن علی

1- تبد
2- لِوار
3- گوریچ
4- شمال
5- جہل گْوات
6-سرگْوات
7- زرگْوات
8- کَؤش
9- نَمبیگ
10- لُوڑ
11- پِیتکُک
12- روچ آسان
13- سْیَہ گْوات
14- آہِرّ
15- سَمین
16- سوسدِرّ
17- کوکُر تراکین
18- لَمپش سوچ
19- پَشّگ
20- پَنَہ ری

تبد و لِوار کہ اے گْوات سکّیں گرم و سوچوکیں گْوات اَنت کہ ماں گرماگ موسم ءَ کشّ انت و دیم ءَ سوچنت کہ اے گْواتاں
لُک و لِوار و تبد و دْرُچک و گْرمگوات ہم گْوشنت۔
لِوار گرم اِنت و سوچوک بلے تبد ہنچُش کہ گوریچ ماں زمستان ءَ تپ و کُلّگ و پشّانک دنت
تبد ہمے پیم مردم ءَ گرم جن کنت و تپ و گرماگی کُلّگ دنت کہ مردم سکّ دلسیاہ و نگیگ بیت
گوریچ : سکّیں سارتیں گْواتے کہ چہ کُتب ءَ کیت۔ ماں زمستان ءِ موسم ءَ کشّیت،تَپ وکُلّگ و لمپوشک اے گْوات ءِ سوگات اَنت دست و پاد و دپ و دیماں ہنچُش ہشک و کَروشک کنت کہ رنگ اِش بدل بیت
شمال:شمال یک گْواتے کہ چہ گوریچانی نیمگ ءَ کیت دنز و لوڑ کنت و نہ وشّیں گْواتے ہنچُش کہ دنز و لوڑ ئِے مردم ءَ دلسیاہ کننت اے گْوات ءِ بْرمش و توار ہم گوشاں نہ وشّ اِنت ۔
جہل گْوات: یک نرم و لہمیں گْواتے چہ روبرکت ءَ کشّیت۔
سرگْوات: ہم یک نرم و لہمیں گْواتے کہ جہل گْوات ءِ چپ اِنت و چہ رودراتک ءَ کیت۔
زرگْوات: چہ کُتب و روبرکت ء َ و زر ءِ پشت ءَ چہ کیت ۔پمیشکا وشّ و دلتبیں گْواتے ۔
کَوْش: گواتے کہ چہ سُہیل و رودراتک ءَ کَیت و گرماگ ءَ سارت و وشّ انت ۔کَوش کشّیت و نود ملیباری
نمبیگ: یک گْواتے ءِ نام اِنت کہ چہ نمبیگان و زر ءِ نیمگ ءَ کیت و اگاں آزمان ءَ ہَور و جمبرے بہ بیت نمبیگ جمبراں بادینیت و پہ گْوارگ ءَ برابر و تیار اِش کنت
نمبیگ کوکراں بادینیت ۔
روچ آساں دْرد گْوارینیت
گوریچ کوکراں شنگینیت
لُوڑ:ہمے پیم کہ چہ نام ءَ پدّر انت ئِے یک گْواتے کہ دنز و لُوڑ کنت و برے برے آزمان ءَ کہ ہچ ہَور نیست بلے لُوڑ کہ بہ بیت ہمے لُوڑ توک ءَ جمبر بَد نت گْوارگ بنگیج بیت اے گْوات ءِ پرک گوں شمال ءَ ہمیش اِنت کہ شمال ءَ ہَؤر گون نیست بلے لُوڑ ءَ ہَؤر ءِ شَکّ و گمان باز ہست ۔
پیتکُک: یک گِرد گْواتے کہ چہ زمین ءِپشت ءَ پہ تیزی پر ترّ ایت و ہما جاگہ ءَ دیم پہ برز ءَ چست بیت و ہرچ پیمیں سبکیں چیزے چُشکہ کاگد و گُد و پُچ اشاں گوں وت چست کنت و بارت۔وہدیگاں گْوشتگ پیتکُک ءَ جن گون اِنت و ہرکس پیتک ءِ توک ءَ بہ کپیت آ کس زَلَبیگ بیت چے راست چے دْروگ ۔
پیتکُک ءَ داشت نیست و زیت گار بیت بلے لُوڑ و شمال دیر ءَ دار نت۔
روچ آساں:
اے گْوات چہ رودراتک ءَ کیت بلے ہما وہد ءَ کَشّیت کہ آزمان ءَ جمبر سْیَہ ترّ اتگ اَنت و پہ گْوارگ ءَ آہیزگ اَنت و سلاہے دلمانگ اَنت چُشیں وہداں اگاں روچ آسان ءِ گْوات اش چیر بہ کپیت بزاں کہ دْرد و شرتگ بنگیج بیت۔
برز ءَ گْوشتگ ات کہ :
روچ آساں دْرد گْوارین ایت
سْیَہ گْوات :اے ہما توپانیں گْوات اِنت کہ سیاہ و تہار اِنت و دنز و ہاک گون انت ئِے و دْرچک و داراں پْروش ایت و نُکسان دَنت و اے گْوات ءَ مَرض و نادْراہی گون اِنت و بدیں بُوّیے کنت و چمّ و پونزاں پُرّ ہاک و دنز کنت۔
آہِرّ:
اے ہما گْوات اِنت کہ ہَؤر ءِ وہد ءَ کیت و ہَؤر ءَ شرتگ کنت و ماں زر ءَ بوجیگ و یکداراں نگیگ و ناچگی کنت۔
سمین:
گرماگ ءَ سُہب سر ءَ ہما وشّ و سارتکیں گْوات اِنت کہ وہداں کہ مردم ڈَنّ ءَ وپتگ اَنت گُڑا سمین ءَ پہ پاد آیگ ءَ نہ اشتگ گیشتر بہارگاہ ءَ سہبانی سر ءَ کَشیت ۔
وسدِرّ و کوکُر تراکین:
اے گْوات ہم موسمی گْوات اَنت کہ اولی مچّانی کوکُر ءِ آرگ ءَ چہ پیش کیت و مچّاں چہ زمستانی واب ءَ آگاہ کنت پہ کوکُر ءِ آرگ ءَ و کوکُر تْراکین ہم ہمے پیمیں گْواتے کہ چہ مچّانی کوکُر ءِ آرگ ءَ رند کشّیت و کوکران ءِ تْراکین اِیت و اے دگہ درچک و داراں پہ ہزّام و ہتم ءَ آگاہ کنت ۔
لمپش سوچ:اے ہم یک سارت و ترندیں گْواتے کہ مچّ بُرّ ءَ و رند کہ جوہاناں ناہ اِش مِتَگ اَنت و رند ءَ چشکہ لمپش ہُشک بیتگ اَنت اے گْوات ءِ کشّگ ءِ موسم اِنت کہ وہداں لمپش اش سوتکگ و وت ءَ گرم اش داتگ ۔سردیانی موسم ءِ اول سر ءَ اے گْوات ءَ کشّ اِتگ۔
پَشّگ:
اے گْوات ہنچُش کہ تبد و لِوار ءَ سوچوک اِنت و سکّ گرم اِنت بلکیں ہم گیشتر چہ پنجگور ءِ نیمگ ءَ کیت۔
پَنَہ ری: اے گْوات ہمے سوسدِرّ و کوکرتْراکین ءِ موسم ءِ گْوات اِنت کہ وہدی زمانگاں کہ دست آپ و لانکبوج ءِ جاگہ نہ بیتگ مردم بے وس بیتگ اَنت کہ پہ صحراءَ بہ رؤنت گُڑا اے گْوات ہنچُش سارت و نِگْوَم بیتگ کہ مردماں بایِد اِنت کہ پناہیں جاگہیں ہنچوشیں جاہے کہ گْوات بند بیتگ پہ وت در گپتگ ۔
٭٭٭

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*