بنیادی صفحہ » شونگال » نوکیں سال وناسرجمیں واب

نوکیں سال وناسرجمیں واب

یک دِگہ سالے پدی بُوت…. شش ءِ جاگہ ءَ ہپت نِبشتہ کَنَگ بُوت۔گُشنت ہمک نوکیں سال ءَ نوکیں اُمّیت گوں وت ءَ گون اَنت و کئیت۔بلئے جُست اے پاد کئیت کہ ایوک  ءَ گوں شش ءِ جاگہ ءَ ہپت ءِ نِبشتہ بُوہگ ءَ جاور ہم بدل بنت یا نا؟

گِندگ ءَہما روچ اَنت کہ گْوستگیں سال ءَ بُوتگ اَنت۔ہما مردُم اَنت و ہما جِتا جتائیںپِگر و لیکہ اَنت….گوں نوکیں سال ءِ آہگ ءَ ایوک ءَ مردُماں شادمانی کَنگ ءِ یک دِگہ موہے رستگ۔  گوں نوکیں سال ءِ بِندات بُوہگ ءَ اے جُست ہر نیمگ ءَ شِنگ و تالان بیت کہ گْوستگیں سال ءَ چے ببا داتگ و چے کٹّ اِتگ؟۔

اگاں ما یک راجے ءِ جہت ءَ وت ءَ بہ چاریں تہ ما ہمینچو  ببا داتگ کہ آہانی حساب کنگ مُشکل اِنت۔

ماں گْوستگیں سال ءَ سیاسی ، معاشی، دود و ربیدگی و لبزانکی پِڑ ءَ ماں جہان ءِ تہا بُوت کنت کہ بدلی اتکگ بلئے یک نیمگے ما بہ چاریں تہ گْوستگیں سال ءَ چہ ما باز پچ ہم گِپتگ۔یک راجے ءِ جہت ءَ مئے پِگرو لیکہانی کِشک جتا جتا اَنت و انچیں نیمگے روان اَنت کہ  آہانی منزلاں نِشان نیست۔

لہتے وہد اِنت کہ ماں لبزانک ءِ پِڑ ءَ جْوانیں گامگیج زُورگ بُوہگ ءَ اَنت جتا جتائیں سرحالانی سرا کتاب چاپ و شِنگ بُوہگ ءَ اَنت….و پد ا بلوچی سیاہگ و راست نبیسگ ءِ گپّ و باوست بِنا بُٗوتگ…یک نیمگے عربک اسکرپٹ اِنت کہ چِد و پیسر سید ظہور شاہ ہاشمی ؔ و دِگہ بازینے ءَ اے پِڑ ءَ کار کُتگ  و گیشتر کتاب و تاکبند ہمے عربک سیاہگ ءَ گوں چاپ و شِنگ بُوہگ ءَ اَنت  و دومی نیمگ ءَ رومن سیاہگ اِنت ….بلئے ما گِندیں کہ بازیں سال و مُدّتے ءِ گْوزگ ءَ پد ہم یک رہبندے ءِ سرا تِپاکی و یک جاگہی گِندگ ءَ نئیت۔

زُبان ءِ منزل جنوک وتی کار ءَ کنان و دیما جُنزان اَنت ۔ہمک سال ءِ نوکیں روچ  گوں نوکیں اُمّیتے ءَ سر کشّیت و بلوچ ئِ زِندمان ءِ تہا باندات ءِ وشّیں روچانی واب چو کوہے ءَ رُدیت….و اے وابانی سرجم بُوہگ ءَ تپاکی الّمی اِنت…تانکہ بلوچ ءِ کِشک جتا جتا مانگیشّان بنت ، ہمینچو منزل وت ءَ دُور کشّان بیت۔

زُبان، لبزانک  و راجکاری ءِ پِڑ ءَ مارا انگت بازیں پندے بُرّگی اِنت ….انگت بازیں سالے گْوازینگی اِنت و نا اُمّیت بُوہگی نہ اِنت…سوب ءِ رُژنائیں بامے حُدا بکنت کہ ٹِکّ بہ دنت۔

بلوچ و بلوچی سبز و میزراں باتنت۔

 

شونکار

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*