تازہ ترین
ur
بنیادی صفحہ » شاعری » ساہ کندن—-عطا شادؔ

ساہ کندن—-عطا شادؔ

ساہ کندنءِ چمّ پاچی و بیوانکیءَ اَست اِنت زبان
چمّے بہ بیت پہ گندگءَ
گوشے بہ بیت پہ اشکنگ
امبروزءِ گْراں باہندیں آشوب عاقبت اوبادگاں پہ ساعت انت
ساہ کندنءِ
گندنت و بے روک انت چمّ
کرّ انت بلے گوش اشکننت
ساہ انت و بیگْواہ انت زند
گند قہرو مہرءِ آدمی گستائیءَ
ارواہءِ چیہانٹاں سرءَ زُرتگ جہاں
کرّ انت تئی گوش ومنی گنگ انت زباں
توچوبدل زُرتیں زبانءِ منّتءَ بے باورئے
من چوزمین جمبانی قہریں نیّتءَ پیداوراں
تو پہ سگاراں گپتگیں کوٹ و کلاتاں گل ئے
من پہ پتی میراث و ماتیں گُلزمینءَ تلوساں
من آدمءِ اوبادگاں
مہرانی حقّیں وارثاں
راستے کہ تئی سوبءَ منءَ مرگی کتہ
شات ئے کہ تئی زوراکیءَ مرچی پدا، زندءِ یلیں بچّے جتہ
بچّ آجوئی
بچّ ایمنی
بچّ گُلزمینءِ دیدگ و زردءِ مراد
بچّ غم جتیں بنی آدمءِ رکّینگءِ جہدءِ مراد
بچّ دیرمانیں شادہءِ شوہازگءِ مزدءِ مراد
بچّ زندءِ مہرءِ مُجّتی ارمان
مستاگی عذابءِ آسرءِ
تو پہ سرانی گُڈّگءَ زندءِ خیالانءَ کُشئے؟!
پہ سِندگءَ داشت کنئے پُلّءَ چہ بوتالانیءَ!!
مرکءَ منی لوٹئے ، تہ ارواہءَ بکش
کوشءَ منی باڑائے ، مہرءِ واہگاں پاہو بدئے
بیگْواہیءَ زہرے بکن رُژنءَ منیگءَ ایرجیگ
زانتءَ بکن تیرءِ نشان
من پہ مِرَگ گارنہ باں
مہراں کہ آوارنہ باں
داں عاقبت است انت منی گامانی رند
داں زندبیت روک انت منی حونانی لیک
من مُرتگاں ، توہم مرئے
تو زندگ ئے، من زندگاں
ساہ کندنءِ چمّ پاچی و بیوانکیءَ است انت زبان
چمّے بہ بیت پہ گندگءَ
گوشے بہ بیت پہ اشکنگ
امبروزءِ گراں باہندیں آشوب عاقبت اوبادگاں پہ ساعت انت
ساہ کندنءِ!!
٭٭٭

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*