بنیادی صفحہ » آزمانک » موکل—-آزاد گل کلگی

موکل—-آزاد گل کلگی

گزّو مرچی سک گل ءَ بال ات، چیاکہ مرچی آئی ءِ بچ میروک ءَ دہ ءِ چکاس گوں جوانیں نمبراں پاس کتگ ات۔آئی ءِ دیریگیں دل ءِ مراد پیلہ بیتگ ات۔چیاکہ آ یک نیزگاریں مردمے ات۔آئی ءَ بازیں جنجال ءَ پد وتی بچ ءَ را دہ جماعت وانینتگ ات۔میروک ءَ گوں وانگ و زانگ ءَ بازیں ہُبّ و واہگے است ات۔پمیشکا آئی ءَ مسٹری ءِ انٹرویو دات کہ آ سوبین بیت۔میروک ءِ دل ءِ مراد مدام ہمیش ات کہ ہر انسان چہ وانگ ءِ گنج ءَ بے بہر مہ بیت۔آ گوں دلجمی ءَ وتی کار ءَ گوازینگ ءَ ات۔
یکروچے میروک ءِ پت گزّو ءِ جاور حراب بیت اَنت و آ روچ پہ روچ لاچار بیان اَت۔میروک ءَ وہدے وتی پت ءِحال دیست آ سکّ نگیگ بوت و وتی پت ئِے میتگ ءِ طیبیبے ءِ گْورا پہ علاج ءَ بُرت ئِے۔بلے طبیب ءَ گُشت کہ اے منی علاج ءَ چہ آ دیم انت۔ترا پہ علاج ءَ مزنیں طبیب ءِ گْورا شہر ءَ برگ لوٹیت۔اگاں زوت علاج نہ کت گڑا تئی پت ترا یل دنت رؤت۔گوں اے حبر ءَ میروک سک پژمُردگ بوت، بلے میروک ءِ نیزگاری آئی ءَ اے موہ دیگ ءَ نہ ات کہ آ وتی پت ءَ پہ علاج ءَ جْوانیں طبیب ءِ گْورا بہ بارت۔بلے پدا ہم آئی ءَ دل ڈڈّ کت کہ آ گوں ہمے نیزگاری ءَ وتی پت ءِ علاج ءَ الّم ءَ کنت۔
بلے یک دگہ چکاسے آئی ءِ دیم ءَ چو آہنی دیوال ءَ مِکّ ات۔چیاکہ آ یک سرکاری نوکرے ات۔آئی ءِ واستہ موکل گرگ الّمی ات۔آ اے ہم سرپد ات کہ من ءَ ارزانی ءَ موکل نہ رسیت۔بلے پدا ہم آئی ءَیک درخاستے دات کہ من ءَ بیست روچ ءِ موکل بدئت۔
میروک ودار ءَ ات کہ کدی من ءَ موکل رسیت کہ من وتی پت ءَ علاج ءَ بہ براں، بلے یک شپے اناگت ءَ آئی ءِ پت ءِ ارواہ ملکموت ءَ دستگیر کت۔میروک وتی پت ءِ مرگ ءَ سک دلپدرد بوت۔چار پنچ روچ ءَ پد آئی ءَ حال رست کہ سرکار ءَ آئی ءِ بیست روچ ءِ موکل منظور کتگ اَنت۔ہمے گپ ءِ اشکنگ ءَ آئی ءِ چمّانی ارس تْرمپ تْرمپ ءَ آئی ءِ انارکانی سرا رچان اتنت و آ پہ وتی نیزگاری و بے وسی ءَ اپسوز ورگ ءَ ات۔
٭٭٭

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*