بنیادی صفحہ » نوشتانک » ہؤ برے برے گِیرکئیت کسانی—-آصف یاتؔ

ہؤ برے برے گِیرکئیت کسانی—-آصف یاتؔ

چنچو وش اِتنت یار زندگی
برے برے گیر کہ گر نت دل گْوشیت دُبر ترا نوک کن۔
ہما میتگ ہما کوہ وکوچگ ہما سنگت ہما زندگی….
مدام لاڈُکی کتگ بلے بازار ءِ مردم چہ یکے دومیگ ءَ مہروان بوتگ اَنت
شپ ءَ مدام ماجوان پہ جان شودگ ءَ شتگ اِیں سرجم جاندَر بوتگ اِیں
وہدے کہ جان ششتگ گڑا ہرکس وتی میتگ ءَ رہادگ بوتگ چوناہا من ءَ وانگ سک تور اِتگ مدامی سہب ءَ من ءَ مات ءَ زور پاد کتگ پہ وانگجاہ ءَ راہ داتگ گیشتر من وانگ ءَ نہ شتگ آں وانگجاہ ءِ پشت ءَ نشتگ بوتگ اِیں ما لہتے سنگت کلاس کہ بندات بوتگ اَنت ما گڑا شتگ ایں وتی ٹکانہ ءَ نشتگ اِیں اگاں بازار ءَ رؤگی بوتگ گڑا کتاب زرتگ و چیر داتگ اَنت داں وانگ ءِ وہد آسر بوتگ گڑا اتکگ اِیں کتاب زرتگ اَنت شتگ اِیں لوگ ءَ…..
بیگاہ ءِ وہد ءَ مئے بازار ءَ نوں لیب بوتگ ہر نیمگ ءَ ،کَپگی کبڈی، ورّی،بچیلُکی…..دْرائیں لیب بوتگ۔
شپ کہ بوتگ گڑا منی بلُّک ءَ مدام کسّہ آؤرتگ برے بتل و چاچ جتگ آ نیمگ ءَ کماشانی دیوان بوتگ گپ و رپ بوتگ منی بلُّک ءَ دْرائیں نماسگ دوست بوتگ اَنت مدامی لیلو جتگ ئِے مارا واپینتگ ئِے ۔ہؤ ہؤر بُوت…. ہؤر ءَ چہ پد زمین سرجم ءَ آپ بوت کور و شیپ ءَ ہم ہار کت
اے آپ ءَ مین دات برے آ آپ ءَ داں رہادگ بوت ایں کؤر ءِ نیمگ ءَ چار ایں کؤر ءَ سک ہار کتگ نشت ایں کور چار اِت۔
مدتے ءَ چہ پد……
جنگل ہم سبز و آباد بوت اود ءَ شمش کاہُک گُراپاد کُنر کُٹینگ دْرائیں چیز بوتنت۔
ما میتگ ءِ مردم مدام شتگ ایں جنگل ءَ شمش گوراپاد کُنر و دگہ بازیں چیز چتگ ہمے دمان ءَ منی پاد ءَ کنٹگے شت من ءَ یات بیت من سک گْریت منی بُلّک ءَ کوکار کت ایش نایا…. نماسگ گْریوگ ءَ اِنت باریں چے بیتگ ئِے داں اتک چار اِت ئِے منی پاد ءَ کنٹگے شتگ نوں بُلّک گْوشیت منی چُک گڑا سمبال کن شُما نہ نند اِت ،شیتانی کن اِت برے اد ءَ سٹّ و دَور کن اِت برے اود ءَ منی بُلّک ءَ گڑا کنٹگ کش اِت ،جُست ئِے کت کہ نوں کولیگ آں چون اِنت تئی پاد انگت درد ءَ اِنت من گْوشت انا بی بی کمو درد آرام بوتنت۔
مارا بی بی ءَ سک دوست بوتگ چوناہا داں در کسانی ءَ وتی دْرائیں نماسگ ئِے دوست بوتگ اَنت۔
شپ کہ بوتگ ما مدام برے ہڑُّکاں شیپی کتگ برے جمالے برے ٹپاںپاپلی ۔
ہامین ءِ وہد ءَ مارا مدام کپات گون بوتگ اَنت شتگ ایں شہر ءَ ناہ ءِ چنگ ءَ………شہر سبز سبز بوتگ جوہاں آپ تچگ ءَ بوتگ دہکان ہم کار ءَ بوتگ اَنت ہر نیمگ ءَ داں بہ چار سبز و آباد اِنت….
مارا وتی نگن گون بوتگ اَنت چٹنی زرتگ و برے ناہ و نگن وارتگ برے چٹنی ءَ گوں کپات پر کتگ اَنت ناہاں گڑا ماں لوگ ءَ رہادگ بوتگ اِیں۔
رمضان ءَ ہم وت ءَ سر کت رمضان بوت گڑا مدام تُرابی ءَ رند کماشاں والی بالی کتگ اے کپّ ءَ دیوان بوتگ آ کپ ءَّ چوریگاں کوکار و سلوات بوتگ۔
اَئید کہ نزیک بوتگ دْرستاں گُشتگ اے ائید ءَ من اے رنگیں گُد زیر آں آئی ءَ گُشتگ من آ وڑیں مانوں شتگ ایں بازار ءَ…… گڑا دْرستاں وتی گُد زرتگ و دوچائینگ ءَ داتگ اَنت پد ءَ نوکیں چمپل زرتگ…..
ائید ءِ شپ ءَ شتگ ایں سر وتی ٹاپ کتگ اَنت۔
ائید روچ کہ بوتگ ما نماز کتگ نماز ءَ رند نوں شتگ ایں لوگ پہ لوگ ءَ ائیدیگ گپتگ پدا حساب کتگ اَنت ہرکس ءَ وتی زرّ…. گل ءَ بال بوتگ ایں کہ مارا مرچی اینچُک زرّ گون…. آئی ءَ گُشتگ منی گیشتر اَنت…. دومی ءَ گُشتگ من گیشتر ائیدیگ گپتگ۔
وہدے کہ لوگ ءَ شتگ ایں گل بوتگ ایں مرچی ما اینچوک ائیدگ گپتگ۔
ہؤبرے برے گیر کیت ہما کسانی۔

٭٭٭

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*