بنیادی صفحہ » شونگال » بزانک ءِ تہا یک مٗو ل مکسدے ءِ بُوہگ الّمی اِنت؟

بزانک ءِ تہا یک مٗو ل مکسدے ءِ بُوہگ الّمی اِنت؟

گُشنت کہ ’’ لبزانک زِند ءِ آدینک اِنت‘‘۔

لبزانک ءِ باروا تنی وہد ی دو لیکہ دیما اتکگ اَنت ۔ یکّے لبزانک پہ لبزانک و دومی لبزانک پہ زِند۔اولی لیکہ لبزانک ءَ ایوک ءَ یک ارواہی (رُوحانی)لذّت و وشّی یے ءِ لیکیت۔اے لیکہ ءِ منّوک لبزانک ءِ گوں دری(خارجی) زِندگی ءَ ہچ رنگیں سْیادی یے ءِ لوٹوک نہ اَنت۔آہانی حیال ءَ اگاں لبزانک ءِ تہا دری وئیل ہَوار گیجگ بہ بنت تہ لبزانک ، لبزانکے نہ مانیت ….یک ادارُکی چیزے جوڑ بیت۔پمشکا لبزانک چہ وہدو جاگہ ءِ قیدو بندش ءَ آجو بُوہگ لُوٹیت و آئی ءِ ہمگْرنچی گوں نازُرکیں جْوزگ ، مارِشت و حیالاں وت یک جتائیں دُنیایے۔ہما لبزانک کہ آئی ءِ ہمگْرنچی گوں بنیادمی جْوزگ ومارِشتاں بیت ،آ، لَس مہلوک ءِ دِل ءِ توار جوڑ بیت و مُدام مانوک بیت۔

پہ درور ءَ مُلّا فاضُلؔ، مُلّا قاسمؔ ، جام دُرّک، سید ہاشمیؔ و مُراد ساحرؔ ءِ شعر مرچی ہم مردُماں پہ دِل یات اَنت و ماں بلوچی ءَ کلاسیکی لبزانک مستریں درور اِنت کہ مرچی چُنت سد سال گْوزگ ءَ ابید ہم مردُماں عہدی شعر پہ دِل یات اَنت۔گوہرؔ ءِ ہِرّانی شعر، چاکرو گُہرام ءِ شعر، بالاچ ءِ شعرؔ، میر کمبرءِ شعر، شے مُریدو حانی، شہدادو مہنازؔ، رِندو لاشار،گوک پْروشؔ،عزّت ومہرکؔ ءِ شعر ، اے کُلّ لَس مہلوک ءِ کِسّہ اَنت ، اے کُلّ لَس مہلوک ءِ لبزانک اِنت کہ مرچی انگت ءَ اَست اِنت۔

لبزانک پہ لبزانک ءِ لیکہ ءِ منّوگرانی گُشگ اِنت کہ بنیادم ءَ کہ ہرچ نیامت و آسراتی یے رستگ ، آ، آئی ءَ زِند ءَ وشحال کنگ ءَ کُمکّ ءَ کننت۔شعرو لبزانک ءِ ہُب و شوق شاعرو نبشتہ کار ءِ ہاتر ءَ یک انچیں نیامتے کہ گوں ہمیشی ءَ جتاو ہَواریں زِند ءِ تہا وشّیاں ودّین ایت۔ شاعرو نبشتہ کار وتی چاگرد ءِ چست و ایراں گِندیت ونبشتہ کنت۔ہما نبشتہ کاراں کہ لبزانک پہ زِند ءِ لیکہ وتیگ کُت ، آہاں گوں وتی ساچشتاں لَس مہلوک ءَ را پائدگ دات، آہاں وتی چاگردءِ تہا سُرو پُرے ودی کُت۔اگاں گوں ہُورت نگاہی ءَ چارگ بہ بیت تہ لبزانک زِند ءِ تہا بازین بدلی آؤرت کنت۔شرت ایش اِنت کہ آئی ءِ جْوانیں درشانداب  و شیرکنی تاں لس مہلوک ءَ سر کنگ بہ بیت۔

لبزانک زِند ءِ راہ و دراں شون دیان ءَ ، آئی ءِ گیشّواری دیمرئی ءِ کِشکاں ہم پچ کنت۔لبزانک ءِ بُندری مٗول مُراد چاگرد ءِ گہتری بنیادم ءِ اَرزشت ءِ گیشی اِنت۔پمشکا لبزانک ءِ تہا یک مٗو  ل مکسدے ءِ بُوہگ الّمی اِنت۔اے رِد ءَ شُما چے گُش اِت؟

شونکار

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*