بنیادی صفحہ » نوشتانک » بلوچی زبان وسْیاہگ …… شرف شادؔ

بلوچی زبان وسْیاہگ …… شرف شادؔ

 

نبشتانکانی نزّآرگ و کتاب Compileکنگ لبزانکءَ مُدام ستاکرزیں کارے زانگ بیت ، پرچا کہ یکیں بُنگپ و سرحالءَ نبشتہ بوتگیں نبشتانکاں کتابےءَ نزّآرگءَ ، یک نیمگے وانوکاں اے آسراتی رسیت کہ آہاں وتی لوٹ و مطلبءِ چیز یکجاہءَ دست کپنت دومی نیمگا دُْرستیں نبشتانکانی یکیں بُنگپءِ بُوہگءِ سببءَ سرجمیں کتاب بحث و ترانےءِ دروشمءَ بدل بیت۔ اے یک انچیں بحث و ترانے بیت کہ وانوک ہمے بُنگپءِ دُْرستیں تک و پہناتانی سرا چار و بیچارکن اَنت ۔اگاں بُنگپ مانگیش اتگیں جیڑہے بہ بیت گُڑا آئیءِ گیش و گیوارءِ واستہ راہ و در پولگءِ کوشست کننت۔

کتاب Compileکنگ یک حسابےءَ زانشی و پٹ و پولی کارے تہ دومی نیمگا ایشیءِ تہا یک کساسےءَ سائنس و ازم ہم ہوار اِنت۔ زانتکارانی گشگ اِنت اگاں اے کارءِ کنگءَ لہتے جُست دیما ایر کنگ بہ بیت،گُڑا اے کار سائنسءِ رہبندانی تہا کیت چو کہ :

(۱)یک کتابے compileپرچا کنگ بہ بیت؟

(۲)کتابCompileکنگءِ مول و مُراد چی اِنت؟

(۳)اے کارءَ کجام کار کنگی نہ اَنت؟

۔ اگاں کتاب Compileکنگءَ اے جُست دیما ایر کنگ بہ بیت کہ یک کتابے کجام وڑا پیش کنگ بہ بیت۔؟ ہمے کار آرٹ و ازمءِ حدّ و سیمسرانی تہا کیت۔

گْوستگیں روچاں اسحاق خاموش ءِ بلوچی زبانءِ بابتءَ نزّآرتگیں کتاب ’’بلوچی زبان و سیاہگ‘‘  چاپ و شنگ بوتگ ۔ کتاب compileکنگءِ ربیدگ بلوچی ءَ کوہن اِنت ، بلے چشیں باز کم کتاب اَنت کہ آہانی نزّآرگءَ سائنس و ازمءِ بُرزءِ شون داتگیں فکری و جمالیاتی Appraochکارمرز کنگ بوتگ ۔

دُنیاءِ ہما ملکاں کہ علم و زانت ءَ دیمروئی کتگ، پٹ و پول و کتاب Compileکنگءِ ارزش و بستارءَ سرپد اَنت گوں ہمے فکری و جمالیاتی سرپدیءَ کارگِرگ و زانشتی و پٹ و پولی نپ و سیت چست کنگءَ اَنت۔ اسحاق خاموشءَ وتی کتابءِ Compileکنگءِ ہاترا ہمے سائنس و آرٹءِ فکری و جمالیاتی Appraochکارمرز کتگ ۔

بلوچی زبان ءِ اڑ و جنجالانی بابت ءَ یک کتابے نزّآرگ پرچا بہ بیت و ایشی ءِ مُراد چی اَنت؟

اے جُستءِ پسوءَ گْوشگ بوت کنت کہ، بلوچی زبان ہزاراں سال کوہن و قدیم اِنت، بلے ایشی ءِ بُنزہ ءِ بابتءَ سائنسی رہبندءَ پٹ و پول نہ بوتگ ۔ مزنیں مُدتےءَ وانگ و نبشتہ بُوہگءَ پد ہم بلوچی زبان یک میّنیں نبشتہ رہبندےءَ زبہر اِنت ۔ بلوچی زبانزانتیءِ سرا چشیں کتاب سک کم اَنت کہ ماں آہانی تہا بلوچی زبانءِ دْرستیں تک و پہناتانی سرا بحث و تران کنگ بوتگ ۔ صبا دشتیاری ءَ بلوچی زبانءِ عاقبتءِ نامءَ دو جلداں بلوچی زبان ءِ سیاہگ و اڑ و جنجالانی بابتءَ 90ءِ دہک ءَ دوکتاب Compileکتگ۔ پمشکہ اسحاق خاموشءَ المی زانتگ کہ ہمے سرحالاں جتا جتائیں زانتکارانی نبشتہ کتگیں نبشتانک چنئگ و نزّآرگ بہ بنت دانکہ بلوچی زبانءِ بُنزہءَ پولگءِ ، نبشتہ رہبندءَ اسٹینڈرائزڈ کنگءِ و یک اسکرپٹے گچین کنگءِ بحث و تران دیما برَگ بہ بیت۔

اسحاق خاموش ءِ ’’ بلوچی زبان و سیاہگ‘‘ءَ28جتا جتائیں زانت کارانی نبشتانک ہوار کنگ بوتگ اَنت کہ بلوچی زبانءِ راجدپتر، بُنزہ ، سیاہگ ، نبشتہ وڑ و زبانزانتی ءِ بابتءَ اَنت۔ ماں اے کتابءَ یک نیمگے اکبر بارکزئی ،عبدالغفارندیم، ڈاکٹر نعمت اللہ گچکی، ع ص امیری، م طاہر، محمد حسین عنقا، میر عاقل خان مینگل ، واحد بُزدار، ڈاکٹرکہورخانو حامدعلی بلوچءِ نبشتانک ہوار اَنت کہ آ بلوچی زبانءِ راجدپتر و بُنزہ و اے دگہ زباناں گوں نزیکی ءِ بابتءَ اَنت ۔ دومی نیمگا زبانزانتی و توارزانتیءِ سرا اکبربارکزئی، کارینا جہانی، غفورشاد، حامد علی بلوچ ءِ نبشتانک ہوار اَنت۔ بلوچی زبانءِ سیاہگ و اسکرپٹءِ سرا سید ہاشمی، زاہدہ رئیسی راجی، غوث بہار، پیرل شے تگری و منصوربلوچءِ نبشتانک ہم وانگ کرزاَنت۔

ہستیں دَورءَ بلوچی زبانءِ سرا بحث و تران گیش بوتگ اَنت۔اے وہدءَ کہ بلوچی زبانءِ سیاہگ ،نبشتہ رہبندو اسٹینڈرائزیشن ءِ سرا دیوان و مجلس گیش بوتگ اَنت، یک نیمگے عربی و رومن اسکرپٹءِ جیڑہ، دگہ نیمگے ءَ ، ءَ ، ءِ ، و ءِ زورگ و نہ زورگءِ گپ و تران و سیمی نیمگا عربی آبانی ہوار کنگ و کشّگءِ ڈاہ و شورءَ بلوچی زبان اجبیں جاورحالےءَ دُچار کتگ۔ہمے جاورحالءَ اسحاق خاموشءِ کتابءِ ارزشت و بستار اے واستہ گیش بیت کہ مارا دعوت دنت کہ مَا وتی زبانءِ جیڑہ و جنجالانی سرا یک رندے پدا فکرو بیچار بہ کنیں ، گوں ہمے شرطءَ کہ بلوچی زبانءِ جیڑہانی گیش و گیوارءِ راہ و دَر شوہازگ بہ بنت۔

 

٭٭٭

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*