تازہ ترین
ur
بنیادی صفحہ » نوشتانک » بلوچی ہِیلانکی کتاب……مہر اللہ مہرؔ

بلوچی ہِیلانکی کتاب……مہر اللہ مہرؔ

’’ بلوچی ہِیلانکی کتاب‘‘وہدے من ءَ دَست کپت ، تہ ایشی ءِ نامءِ چیر ءِ نبشتگیں گالرِد و گالاں اَوَل وَ من ءَ ماں بہمانَگی ءَ دؤر دات۔ بلے ایشانی وانَگ ءَ پَد، وشّی اوں بوت، کہ مئے شہدیں زبان بلوچی یکرندے پد ءَ چہَ سرکار ءِ نیمگءَ ماں بلوچستان ءِ وانگجاہاں وانینَگ ءِ چِن و لانچ بووگ ءَ اِنت۔

من وتی وانشت ءِ رِد ءَ وانَگی ءِ دیم و پُشت ءِ گالرِدانی دَربَرگ و عکسانی چارَگ ءَ پد ماں تاکدیم 2 ءَ پروفیسر سعداللہ خان توخئی (چیئرمین) بلوچستان ٹیکسٹ بُک بورڈ ، کوئٹہ ءِ نبشتگیں سیاہگ ءِ سرسری وانَگ ءَ پد ، چمّ پہ تاکدیم 3 ءِ گالرِد و ناماں تاچینت اَنت، تہ اے تاکدیم ءِ سر ءَ وانَگی ’’بلوچی ہِیلانکی کتاب‘‘ ءِ شونکار و اے دِگہ اُگدہ دارانی نام و آیانی ڈُبّہ پہ رِدو بند نبشتگ اَنت ۔ بِزاں شونکاری لَڑ ءِ نامانی تپّاسگ ءَ پد دِل ءَ ہُبّ کُرت، یکرندے پد ءَ پروفیسر سعداللہ خان توخئی ءِ دِلگوشی سیاہگ ءِ وانَگ بِندات کُرت، کہ آ گُشگ ءَ اِنت:

’’پُلّیں نودربر و گرانقدریں وانوکاں!

بلوچستان ءِ کُلّیں وانگجاہانی ہاتراوانگی کتابانی تَیار کنگ و پُجّارینگ بلوچستان ٹیکسٹ بُک بورڈ ءِ ذمّہ واری اِنت کہ اِے درگت ءَ آ چہ نامداریں زانتکار و کوّاسانی کُمک و جَکانسری ءَ پد اِے کتاباں تَیار کنت و دیما ءَ کاریت، بلئے پدا ہم نِزوری و رَدی چہ بنی آدم ءَ بوت کنت۔ پمیشکا اَگاں گرانقدریں اُستاد، مات و پِت یا وانوکانی دیما ءَ چُشیں ردی و نِزوری یے بئیت، گوں آیاں دَزبندی اِنت کہ آ ماں را مئے چُشیں رَدی و نِزوریاں پیش بِدار نت داں کہ دیمترا ایشی ءِ تہا گِہتری و شَرتِری آرگ بہ بیت۔‘‘

گوں دِلگوشی ءَ ہمے سر ءِ دانکانی وانَگ ءَ پد من ہم ماں دِل ءَ سَوَڑگ کُرت، کہ وتی زانت ءِ کِساس ءَ ’’بلوچی ہِیلانکی کتاب‘‘ ءَ اَلّم ءَ گوں ہُرت چاری ءَ وان آں۔

ہمے پیم ءَ سئے چار روچ ءَ پد من ’’بلوچی ہِیلانکی کتاب‘‘ سرجم ءَ ونت، و پروفیسر سعداللہ خان توخئی ءِ گُشگ ءِ رِد ءَ وانَگی ءِ لہتیں ڈلگیں نِزوری نشان جَتنت، کہ گوں سرشوناں جَہل ءَ نبشتہ اِش کن آں، و منی دومی سوج و صلاح گوں’’بلوچی ہِیلانکی کتاب‘‘ ءِ اُگدہ داراں ایش اِنت کہ اگاں بوت کنت، پہ اَوَلی تبک ءِ نودربراں گْونڈ و اَرزانیں درونت مان کَنَگ بِہ بیت، کہ ایشی ءِ گیشتری درونت پہ اَوَلی تبک ءِ نودربر ءَ باز گران و مشکل انت۔ چیاکہ بلوچی ءِ چندے آبانی توار چہ اُردُو ءِ آبانی تواراں باز تپاوت دار نت۔ پمشکا ماں اَوَلی تَبک ءِ بِنداتی تاکدیماں بلوچی آب و آیانی توارانی گیشوّاری اَلّمی اِنت۔و ہمے آبانی توار کہ چہ اے دِگہ زبانانی آبانی تواراں جِتا اَنت، تہ ہمے آبانی توارانی کَسان کَسانیں درونت ماں ’’بلوچی ہِیلانکی کتاب‘‘ ءَ جاگہ دیگ بِہ بنت۔ تانکہ زُوت گْونڈو اِش ماں وتی دِلاں زپت کُرت بِہ کننت۔ چیاکہ گْونڈیں زہگ زیات وتی سوجکار(اُستاد) ءِ وانینتگیں گالانی تواراں ماں وتی دِل ءَ زپت کنت۔ وہدے سوجکار آئرا درونت ءَ جُست کنت، تہ آ وتی لنکُک ءَ گالرِد ءِ سر ءَ گَردینیت و وانیت۔ بلے آ چوش نہ زانت ، کہ ہمے گال ماں گالرِد ءَ کُجام اِنت ۔ و آ مزنیں وہدے ءِ جُہد ءَ پد گالانی آباں گوں یک دومی ءَ ہَوار گیجگ (جوڑینَگ )ءَ پد آیانی تواراں سرپد بِہ بیت۔ گْونڈیں زہگ وَ چوناہیگا نہ لوٹیت ، کہ من دَربَر جاہ ءَ بِہ رَواں چیاکہ آئی زندگی ءِ تہا پہ آئی ءَ گرانتریں کار دربرجاہ ءِ رَؤگ و آیگ اِنت۔

پمیشکا پہ چوشیں بِنداتی کاراں گیش ءَ چَہ گیش ہُرت چاری اَلّمی اِنت۔ ہاسکن ماں لکوڑ ءَ ،گالانی لِکوڑ راہبند ءِ نیمگ ءَ باز دِلگوش دیگی اِنت۔ چوش کہ ’’بلوچی ہِیلانکی کتاب‘‘ ءِ تاکدیم 2ءِ ماں اَوَلی گالرِد ءَ نبشتہ اِنت:

’’……. وانگجاہانی ہاترا……‘‘

ماں اے گالرِد ءَ اے ’’ہاتر‘‘ ءِ گال وت یک بِزانتے ءِ واہنداِنت، ایشی دیما’’ا‘‘(الف) نبشتہ کنگ نہ بیت۔ بلکیناں اے ’’ءَ‘‘(ہمزہ زَبر) نبشتہ کنگ بیت۔

ہمے یکّیں تاکدیم ءِ سیمی و پنچمی گالرِد ءَ نبشتہ اِنت:

’’…..دیما ءَ…… ‘‘

اِدءَ اے ’’دیما ءَ‘‘ ءِ اے ’’ءَ ‘‘ زیاتی اِنت۔ و ماں ہمے گالرِد ءَ ’’ماں را‘‘ ءِ ’’نون غُنّہ‘‘ ہم زیاتی اِنت۔ و ششمی گالرِد ءِ ’’دیمترا‘‘ ءِ ’’ا‘‘ءِ جاگہ ءَ اے ’’ءَ‘‘ جَنَگ بیت’’ا‘‘ نہ بیت۔ و تاکدیم 4 ءِ پیشانی ءِ ’’بسم اللہ الرحمٰن الرحیم‘‘ ءِ بِزانت باید انت چَہ اُردو ءِ بدلءَ بلوچی ءَ بِہ بوتین ات، کہ بسم اللہ الرحمٰن الرحیمءِ بلوچی چوش انت:

’’گوں اللہ ءِ نام ءَ کہ مزنیں مِہربان و بے کِساس رَحم کنوکے۔‘‘

و تاکدیم8 ءِ درونت ’’گُڈّی نبیؐ ‘‘ءِ سیمی گالرِد ءَ نبشتہ انت:

’’پدا نبی ءِ پیرُک و ناکو ءَ آئیارا رودینت۔‘‘

ماں اے گالرِد ءَ ’’آئیارا‘‘ رَد اِنت۔ اے گال ءِ راست نبشتہ ’’آئرا‘‘ یا ’’آرا‘‘ اِنت۔

تاکدیم12 ءِ سیمی گالرِد ءِ گال ’’ ووش‘‘ رَد اِنت ۔ایشی ءِ راست نبشتہ ’’وشّ‘‘ اِنت۔

تاکدیم15ءِ درونت ’’کریم دشتی‘‘ ءِ چارمی گالرِد ءَ نبشتہ اِنت:

’’ ……..و پدا گورنمنٹ ڈگری کالج کوئٹہ ءَ داخلہ ئے زرت‘‘

ماں اے گالرِد ءَ ’’داخلہ ئے‘‘ رَد اِنت، ایشی راست نبشتہ ’’داخلہ ئےِ ‘‘ و ہمے ’’ئےِ ‘‘ و اے ’’ ئے، ے، یے‘‘ ءِ رَنگ ءَ نبشتہ اَنت کہ رَد اَنت۔

تاکدیم 17 ءِ ہشتمی گالرِد ءَ نبشتہ اِنت:

’’جہل ءِ داتگیں …….‘‘ تاکدیم چاردہ ءِ نُہمی گالرِد ءَ نبشتہ اِنت:

’’ جَہلی داتگیں……‘‘

تاکدیم 20 ءِ سیئمی گالرِد ءَ نبشتہ اِنت:

’’تو منءَ دیست پرچہ دْرچک ءِ سرا سَر کپت(درکفت ءِ) ئے ؟‘‘

ماں اے گالرِد ءَ اے(درکفت ءِ)اے ’’ ءِ‘‘ دَرکنگی اِنت کہ زیاتی اِنت۔ و ہمے یکّیں تاکدیم ءِ پنچمی گالرِد ءِ گال ’’سیال و سیادءِ جاگہ ءَ ’’ سیاد و وارث‘‘ وشتر انت۔ و ماں ہمے گالرِد ءَ جاگہے نبشتہ اِنت:

’’ کس دومی ءِ مَہ وارت،…..‘‘

ماں اے گالرِد ءَ ’’دومی ءِ ‘‘ جاگہ ءَ ’’ دومیءَ ‘‘ نبشتہ کنگ بیت۔ و ماں ہمے گالرِد ءَ گالء’’ جَہل‘‘ ءَ چوش ’’جہلَہ‘‘ نبشتہ اِنت، کہ رَد انت۔

تاکدیم 22 ءِ ششمی گالرِد ءَ نبشتہ اِنت:

’’ لبزاں وشّ ءَ نبشتہ بکن ات‘‘

اے گالرِد ءِ ’’ وشّ ءَ‘‘ ءِ جاگہ ءَ ’’ وشّ‘‘ نبشتہ کنگی اِنت۔

وہدے کہ تاکدیم 17 ءِ ہشتمی گالرِد ءَ نبشتہ اِنت:

’’ جہل ءِ داتگیں ردِ ءَ وش خطی ءَ نبشتہ بکن اِت‘‘

تاکدیم 23 ءِ پربند ءِ ششمی کَڑی ءَ نبشتہ اِنت:

’’ وتی رُڑن ءَ بکن روچاں‘‘

ماں اے کَڑی ءَ گال ء ’’رُڑن‘‘ ءِ جاگہ ءَ ’’رُژن‘‘ ءَ نبشتہ کنگ بِہ بیت۔

تاکدیم30ءِ دومی گالرِد ءَ نبشتہ اِنت:

’’مسلمان پنچ وہد ءِ نماز پیش امام ءِ پُشتہءَ مسیت ءَ وان اَنت۔‘‘

ماں اے گالرِد ءَ گال ’’ پُشتہ ءَ‘‘ رَد اِنت۔ ہمے گال چوش نبشتہ کنگ بیت ’’ پُشت ءَ۔‘‘

تاکدیم31ءِ دوازدہمی گالرِد ءَ نبشتہ اِنت:

’’لبزانی معنایاں (بزانستان) نبشتہ بکن اِت۔‘‘

اے گال’’بزانستان‘‘ نہ اِنت ’’بِزانتان ‘‘اِنت۔

تاکدیم39 ءِ درونت ’’ بادشاہ و وزیر‘‘ ءِ ششمی گالرِد ءَ نبشتہ اِنت:

’’ ……… وتی اَسپ ءِے آسک ءِ رَند ءَ دات و چہ وتی سنگتاں حُذا بوت۔‘‘

ماں اے گالرِد ءَ گال ء ’’حُذا‘‘ بُوت کنت نوکیں گالے۔ بلے ایشی بارہ ءَ من سرپدی نہ دارآں ۔ اَلبت ماں اے گالرِد ءَ بِزاں ’’حُذا‘‘ ءِ جاگہ ءَ ’’جِتا‘‘ نبشتہ کنگ گِہتر اِنت۔

تاکدیم 40 ءِ گُڈّی گالرِد ءَ نبشتہ اِنت:

’’ بادشاہ رَہ سرے ءَ گوں پیریں مردکے ءَ دپ کپت کہ آں کَرّاَت۔‘‘

ماں اے گالرِد ءَ گال ء ’’آں‘‘ ءِ جاگہ ءَ ایوک ’’ آ‘‘ نبشتہ کنگ بیت۔ بِزاں ایشی ’’آں‘‘ ءِ نون غُنّہ دَر کنگ بیت۔ چیاکہ ماں لکوڑ ءِ راہبند ءَ اے ’’آں ‘‘ ءِ کارمرز کَنَگ ءِ وت جِتا یک راہبندے ہَست۔ پہ درور:

من وتی میتگ ءِ بِنداتی وانَگجاہ(پرائمری اسکول ءَ )وانگ ءَ آں۔ چہ دربرجاہ ءَ موکل ءَ پد من تِچک ءَ وتی گِس ءَ کا آں ، وتی (گْورءِ) وردیاں (وانگجاہ ءِ گُداں) کَشّ آں۔ ، دِگہ گُد گْور ءَ کن آں ، دَست و دیم شودآں ورگ ورآں، پیشیم ءِ نماز ءَ وان آں۔ پہ دَم ءِ ساسارَگ ءَ کمّو وپس آں۔ چہ واب ءِ بُست کنَگ ءَ پد دست و دیم شودآں ، وتی وانگجاہ ءِ کاراں کن آں و دِگہ دِگہ ۔

بِزاں اے ’’آں‘‘ ایوک منءِ گون ءَ کارمرز بیت۔ بلے تاکدیم 35 ءِ درونت ’’ منی میتگ‘‘ ءِ ماں سئیمی گالرِد ءَ نبشتہ اِنت:

’’ من اَوَلی تبکّ ءَ وانگ ءَ یاں…………..‘‘

اِد ءَ اے ’’یاں‘‘ اے ’’آں‘‘ ءِ جاگہ ءَ کارمرز کنگ بوتگ، کہ رَد اِنت۔

چوناہیگا ماں وانگی’’ بلوچی ہِیلانکی کتاب‘‘ ءِ بازیں درونتاں گالانی و لِکوڑ ءِ رَدی ہَست اَنت۔ بلے من وتی وس ءِ کِساس ءَ ہما رَدیاں نشان دیگ و دیما آرَگ ءَ آں ، کہ اے ماں رواج گِپتگیں لِکوڑ ءِ رِد ءَ سَکّ باز رَد اَنت ۔ پہ آبانی راست نبشتہ کنَگ ءَ دِگہ سرہال ءِ سیاہگ پکار بیت۔

تاکدیم 46 ءِ گُڈّی گالرِد ءَ نبشتہ اِنت:

’’ بالاچ وہدے ڈگار ءَ پُجّت پِت ءَ چی ئے گُشت؟‘‘

ماں اے گالرِد ءَ اے ’’چی ‘‘ ءِ دیما اے ’’ ئے‘‘ زیاتی اِنت۔ اِد ءَ ایوک ’’چی‘‘ وتی جاگہ ءَ برابر اِنت۔

تاکدیم 48 ءِ درونت’’چیربوئی‘‘ ءِ اَوَلی گالرِد ءَ نبشتہ اِنت۔

’’چیربوئی یک جوانیں لیبئے۔‘‘

اِد ءَیک رندے پد ءَ اے ’’ئے‘‘ گوں ’’لیب‘‘ ءَ کارمرز کنگ بوتگ کہ رَد اِنت۔ ماں لِکوڑ ءِ رِد ءَ اے ’’ئے‘‘ ءِ کارمرز بووگ ءِ جِتا یک راہبندے ہَست۔ بِزاں اے ’’ئے ‘‘ پہ یک مردمے ءِ دیمپدیم ءِ گَپّ جَنَگ و نبشتہ کَنَگ ءَ کارمرز بیت۔پہ درور:

’’تو باز جْوانیں نودربرے ئے، ہر روچ وتی درونت ءَ یات کن ئے۔ ماں وانگجاہ ءَ گوں کَسّے ءَ مِڑ و جنگ نہ کن ئے۔ وتی سوجکار و مستریں مردُمانی ’’عزّت و احترام‘‘ ءَ کن ئے دِگہ دِگہ۔

و اے ’’ے‘‘ وہدے کارگال و نامگالے ءِ دیما کارمرز کنَگ ءَ پکار بِہ بیت ، تہ اے ’’ے‘‘ گوں آیاں (کارگال و نامگالاں) ہَواربِزاں یکجاہ نبشتہ کَنَگ بیت۔ پہ درور:

گوکے، پَسے ، اَسپے، اُشترے، حرے،گالے، ماہے،سالے دِگہ دِگہ۔

بِزاں اے ’’ے‘‘ پہ یکے ءَ کارمرز بیت۔

’’لوز گنج ‘‘ ءِ سرہال ءَ تاکدیم 58 ءِ تیوگیں گال (بِزاں دوّار)ماں یک دْرودشم ءَ تاکدیم 59 ءَ چاپ اَنت ۔ و تاکدیم 64 ءِ گُڈّی آب ’’وزیت‘‘ نبشتہ اِنت ، کہ رَد اِنت ۔ اے گال ’’وزبت‘‘ اِنت ، کہ وزبت ءِ بِزانت محمدؐ ءِ ستا و توسیپ ءَ گُشتگیں پاکنازینک۔

وہدے من ’’ بلوچی ءِ ہیلانکی کتاب‘‘ ءِ اے وڑیں زنڈیں رَدی و نِزوریاں گِندآں ،تہ من ہمے سرپد باں کہ ماں اے وانَگی ءِ تاکدیم 3 ءِ شونکاری لَڑ ءَ پروفیسر شکور زاہد ءِ نام پہ شونکار ی و سنگت رفیق ، حامد علی بلوچ ءِ نام پہ نبیسوک زورَگ بوتگ اَنت ۔ تہ ایشانی جِند اے وانَگی ءِ چاپ و شِنگ کَنَگ ءَ ہِچ سَہی و سَر پد نہ اَنت۔ اگاں نہ اے وڑیں زانتکارانی سروکی ءَ ماں یک گْونڈیں وانَگی یے ءَ چوشیں بلاہ ئیں رَدی دیما بئیت ، تہ اے باوری گَپّے نہ اِنت۔ و ’’بلوچی ہِیلانکی کتاب‘‘ ءِ اَندری چار و تپّاسی کمیٹی و صوبائی چار و تپّاسی کمیٹی ءِ نامانی واہندانی بارہ ءَ سرپدی نہ دارآں ، پمیشکا آیانی بارہ ءَ من ہِچ نہ گُش آں۔

اَلبت ’’ سید ہاشمی ریفرنس کتابجاہ‘‘ ءِ چاپ و شِنک کُرتگیں سئے وانَگی من ءَ چہ ’’بلوچی ہِیلانکی کتاب‘‘ ءَ رَند چہ سنگتے ءَ (ماں یک مُشتءَ) دَست کپتنت ، کہ ماں ایشاں وانَگی ’’بلوچی اولی‘‘ کہ سال 2010 ء ؁ ءَ چاپ و شِنگ بوتگ۔ و وانَگی ’’بلوچی بُنگیجی‘‘و ’’بلوچی بِنداتی‘‘ کہ سال 2013 ء ؁ءَ چاپ و شِنگ بوتگ اَنت۔ ماں ایشاں ہریکےءِ درونت گوں وتی لوٹ و گرزاں ہمدپ اَنت۔ بلے وانَگی ’’بلوچی بِنداتی ‘‘ ءِ تاکدیم 6ءِ سر ءَ چار عکس گوں ناماں چاپ اَنت ، کہ ہر یک عکسے ءِ نام آئی ءِ چیر ءَ نبشتگ اَنت ۔ ماں ہمے عکساں کَرگین؍چاپڑہ ءِ عکس ءِ چیر ءَ کاپَر نبشتہ اِنت ، کہ رَد اِنت۔ ’’کاپَر‘‘ ماں تیرماہ ءَ گِس ءِ پیشگاہ ءَ پہ شپ ءِ واب ءَ چہ دار، کَرز، کاش یا کُلّءَ جوڑ بیت۔ و ہمے پیم ءَ ’’کَرگین‘‘ ہم گِس ءِ پیشگاہ ءِ جِتائیں ساہگ کہ چہ دار، کَرز ، پیش و تگرد ءَ جوڑ بیت۔ ماں ایشاں ہر یکے ءِ کارمرزکَنَگ ءِ وڑ و ڈول جِتا جِتا اَنت۔بِزاں کَرگین پہ ساہگ ءَ ، و کاپَر چو تَہت ءِ پیم ءَ پہ سر ءِ واب ءَ کار مرز بیت۔ و باز جاگہ ءَ کاپَر ءَ ہم پہ ساہگ و چیر ءِ نندگ ءَ بُرز بنداَنت۔ بلے کَرگین ءِ سَر(چَت) چو کُلّ و چمبئی ءِ پیم ءَ بندگ بیت۔ وہدے کہ کاپَر ءِ سَر تِچک و یکشل بندگ بیت۔

ہمے پیم ءَ وانَگی ’’بلوچی اوّلی‘‘ ءِ تاکدیم 46 ءِ ماں گالرِدے ءَ نبشتہ اِنت:

’’ تئی ساماں کج ءَ ایر اَنت۔…………..‘‘

بلے ماں ہمے وانگی ءِ تاکدیم 55 ءِ گالرِدے ءَ نبشتہ اِنت:

’’ تو کُجا گارئے۔…………‘‘

اِد ءَ ماں دوئیں گالرِداں یک گالے دورَنگ ءَ نبشتہ کَنَگ بوہگ ءَ انت، کہ اے وڑیں گال ءِ وانَگ نودربر ءَ سر بِرّ کنت یا ماں دِلپروشی ءِ کورچات ءَ  ئےِ چَگل دَنت۔ چیاکہ آسرپد نہ بیت، کہ ہمے گال چوش ’’کُج ءَ‘‘ یا چوش ’’کُجا‘‘ نبشتہ کنَگ بیت۔

اَلبت ماں لِکوڑ ءِ رِد ءَ ہمے گال چوش ’’کُج ءَ‘‘ نبشتہ کَنَگ بیت۔

اَنچوش کہ من ماں چِندے گالرِداں ساری گُشت ’’سیدریفرنس کتابجاہ‘‘ ءِ ہمے وانَگی کہ من دیستگ و سَرسَری ونتگ اَنت، تہ ایشانی دَرونت چہ بلوچستان ٹیکسٹ بُک بورڈ، کوئٹہ‘‘ ءِ وانَگی ’’ بلوچی ہِیلانکی کتاب‘‘ ءِ درونتاں پہ نودربراں واناکتر و گِہتر اَنت۔ و سید ریفرنس کتابجاہ‘‘ ءِ وانگیانی درونتانی ہَواری ءَ دِگہ شَرّی یے ایش اِنت ، کہ ایشانی لِکوڑ ءِ راہبند باز اَرزان و لَس پہم انت۔ ہاسکن اے دوئیں ’’ہ، ہ‘‘ باز شَرّیں پیمے ءَ کارمرز کنگ بوتگ اَنت۔ چوش کہ اے ’’ہ‘‘ پہ پکار گوں ہما گالاں کارمرز کنگ بوتگ، کہ آ کارگال یا نامگال ءِ اَوَلی آب چہ اے ’’ہ‘‘ ءَ بِندات اِنت۔ و ہمے ’’ہ‘‘ کہ پکار ہما کار گال و نامگال ءِ درنیام ءَ کارمرز کنگ بوتگ ، کہ آئی (ہ) ءِ ساری ءِ آب کشّابے اِنت، و اے ’’ہ‘‘ ز یات ہما کارگال و نامگال ءِ درنیام ءَ کارمرز کنگ بوتگ ، کہ آئی (ہ) ءِ ساری ءِ آب جْوانابے اِنت۔

تہ اے درگت ءَ من بلوچی زبان ءِ دُْرائیں توری آ تاک و ماہتاک بِہ بنت یا دَربرجاہانی وانَگی بِہ بنت گوں آیانی اُگدہ داراں دَستبندی کن آں ، کہ وانگیاناں مزنیں ہُرت چاری و باز دِلگوشی ءَ پد چاپ و شِنگ بِہ کن اِت، کہ ماں ہمے وانگیاں راجانی زبانءِ آکبت ہمگرنچ انت۔ و اے گَپّ ءَ ہرکَسّ سَر پد اِنت کہ ہمک راج ءِ پَجّار آئی ءِ زبان اِنت۔ پمیشکا من چَہ شما ہمے اُمیت ءَ کَشّ آں ، کہ شُما منی اے چاریں دانکاں ماں دِگہ رَدیں بَساتے ءَ کارمرز نہ کن ات۔ چیاکہ من شمئے (تاک و ماہتاکانی ) شونکار و اے دِگہ اُگدہ دارانی گُشَگ ءِ رِد ءَ (ماں شمئے تاکاں) ہرچی کہ ونتگ و ماراِتگ۔ من گوں پَہک دِ ل ، و نیک نیتّی ءَ دیما آرَتگ اَنت ۔ پمیشکا گُش آں اگاں منی ماں سر و سوجاں رَدی و نِزوری یے شُما دیست، تہ وتی نَدءَ دوست مہ دار اِت ، کہ ماں اے نیکیں کار ءَ مئے وڑیں نابلدانی راہشونی ءِ ہَواری ءَ پہ بلوچی زبانءِ لِکوڑ ءِ دیمریءَ ہم دَرے پَچ بوہگ ءِ اُمیت ہَست۔

٭٭٭

 

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*