تازہ ترین
ur
بنیادی صفحہ » آزمانک » سریچک….. غنی پرواز

سریچک….. غنی پرواز

آ….. دُْرستی وَ گیشتر اتنت، بلے آئی ءَ وتی ہوری ءَ بس پنچ منّ اِت و وت ءَ مستریں برات گُشت…. و ہرسہب ……تا کلاکے ءَ ہنچیں دیوان کت، گُشئے زانا بادشاہے کہ دربار برجم دارگا اِنت۔وت سکّیں بُرزیں تلّویے ءِ سرا غالی یے پچ کنائینت، آئی ءِ سرا ٹوہیں بالشتے ایرکنائینت ئِے و گوں آئی ءَ تکّہ ئِے دات و پہ بےکماری نِشت۔وہدے کہ آ دگہ دُْرست زمین ءِ سرا پچیں تگردے ءِ سرا پہ بزّگی نشت اَنت۔

آ وت جنگل ءِ بادشاہ اَت، کہ وت ءَ "شیرخان،، ئِے گُشت۔و ہرچی دل ئِے لوٹت، کت ئِے، بلے آ دگر ئِے وتی کستر پاد لیکت اَنت، نیم نام کتنت و دل ءِ مئیل ءَ رنگارنگیں حکم دات اَنت۔

"بشکّ! مرچی تو دار ءَ برؤ…..،،

"شزّک! مرچی تو شکار ءَ برؤ …،،

"گزّک! مرچی تو نا ہءِ روپگ ءَ برؤ…،،

"جمکّ! مرچی تو ڈگار ءِ کِشگ ءَ برؤ…،،

"روزک! مرچی تو کنور بکن…،،

"سابک! مرچی تو لوگ ءَ برؤپ ……،،

"سارُک! مرچی تو سؤت بجن ……،،

"گُلگ !مرچی تو منی پاداںبہ پرنچ ……،،

ہرسہب…. ہمے رنگیں حکم ئِے دات… و وت شُت و بوپ ءِ سرا وپت و پاد ئِے پرنچائینت اَنت ……و بیگاہ ءَ ۔۔۔۔۔برے ابل ءِ ہمراہی ءَ پہ سیل و سواد ءَ کوہ ءَ شُت، برے نبل ءِ ہمراہی ءَ پہ گوات ءِ ورگ ءَ کؤر ءَ شُت۔

آئی ءِ حکم… بس یک رندے جُمکّ ءَ پہ اگوتی پْروشت۔گڑا آئی ءَ ہم…. بسُتریں کوہ ءِ ٹُلّ ءَ بُرت و تیلانک دات۔آ دگہ حبرے کہ آئی ءِ نسیب شرّ اَت و آ چہ مَرگ ءَ رکّت و نوکیں زندے بنا ئِے کت۔ جُمکّ ءِ زدی، سِزا و نوکیں زند ءِ بِابت ءَ آدگراں چرائی ءَ جست و پُرس کنگ لوٹ ات، بلے آئی ءِ حکم ہمیش ات کہ چمّن اے بابت ءَ ہچ پیمیں جست و پُرس کت نہ کنت۔ و اگں کسے ءَ چشیں بےادبی کت، گڑا آئی ءَ حُدا نواہیت۔

بس یک رندے ایوکا گُلگ ءَ پادانی پرنچگ ءِ نیام ءَ نرم نرم ءَ پہ دوستی…. اے بےادبی کت:

"منی حُدابُند! اگں یکّے ترا جُمکّ ءِ بابت ءَ جست بکنت، گڑا آئی ءِ سزا چے بیت؟،،

"آئی ءِ سزا باز تُرند بیت…،، آئی ءَ ہم نرم نرم ءَ پہ دوستی پسّہ دات۔

"آئی ءَ ہم چہ بُستریں کوہ ءِ ٹلّ ءَ تیلانک دئے نا؟،، آئی ءَ وشّیں رنگے ءَ چارت و بچکندِت۔

"اِنّا!،، آئی ءَ ہم وشّیں رنگے ءَ چارت و بچکندت۔

"گڑا چے کنئے؟،، آئی ءَ انگہ وشتریں رنگے ءَ چارت و بچکندت۔

"من آئی ءِ سر ا… ہنچو پروشاں کہ آئی ءِ ساہ در بئیت،، ۔آئی ءَ ہم وشتریں رنگے ءَ چارت و بچکندت۔

"آئی ءِ سر ءَ چے جنئے و پُْروشئے؟،، آئی ءَ پہ داب ……جان کشّت و جست کت۔

"آئی ءِ سر ءَ…. اے آسنی بمبو ءَ جنان و پُْروشاں۔،،

آئی ءَ اوّلی رندا پہ تُرندی زہر گپت و گشت، وتی کش ءَ ایریں آسنی بمبو آئی ءَ پیش داشت۔

گُلگ ……زاناں چرائی ءِ زہر گرگ ءَ، کمّے دل کہر بوت، کہ گوں سارُک ءَ آئی ءِ گلہے کت وحبرحبر ءِ سرا پہ نادلگوشی ……آئی ءِ گُڈّی حبر ءِ رازئےِ پاشک کت۔سارُک ءَ پہ اِہوت سابُک حال دات۔سابک ءَ پہ ہلوت روزُک حال دات… و روزک ءَ باریں چونیا شُت و گزّگ حال دات۔

گزّگ ……بندات ءَ وَ لپرزگ بوت، بلے کم کم ءَ وتی دل ئِے ڈڈ کت و حیال ءَ لگّ اِت کہ چُشیں لپرزگ… تا کدین ءَ؟،

و پدا ……شت و آدگہ برات ئِے ہم ہال داتنت۔

یک شپے …کہ سئیناں شؤر یک کت…. و شپ ءِ وہدے جاہ جت ……،گڑا آسنی بمبو.. آئی ءِ جند ءَ ماں سر ءِ تاسُک ءَ وارت ……!!

٭٭٭

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*