تازہ ترین
ur
بنیادی صفحہ » نوشتانک » ملا فاضل گولیمار ءَ رستگ (2)دومی بہر……ذوالفقار علی زلفی

ملا فاضل گولیمار ءَ رستگ (2)دومی بہر……ذوالفقار علی زلفی

"زبان چون پولنگ بیت؟۔ زبان ءِ سیادی گوں چاگرد ءَ انت ، ما شما زانیں چاگرد وہد ءِ ہمراہی ءَ بدل بنت وہدے چاگرد بدل بیت گڑا لازم زبان ہم بدل بیت۔ زبان ءِ تہا مٹّ و بدل کئیت ، نوکیں لبز جاہ گر نت و کوہنیں لبز گار بنت۔ لبز مئے اقتصادی زند ءِ گوما ہمگرنچ انت۔ ایدگہ راجانی گوما مئے چاگردی و اقتصادی سیادی مئے زبان ءِ سرا سان یل دنت ہمے پیم آیانی زبان چہ مارا سان زیر یت اے دیگ زیرگ ءِ کانود ءَ پولنگ سرپد بوہگ چٹ رد انت۔ دو زبانانی تہا یک وڑیں لبز بنت ، ہنچوشکہ فارسی ءِ تہا بازیں لبز عربی انت ایشی ءَ چے زاناں فارسی ءَ وتی جتاہیں پجار بائینت؟ یا اردو ءِ تہا فارسی ءِ بازیں لبز انت بلے ما شما سرپدیں اردو و فارسی دو جتاہیں زبان انت۔ یک وڑیں لبزانی سوب ءَ زبان پولنگ نہ بیت اے کٹر زبان دوستانی نعرہ انت و اے نعرہ زبان ءَ سک تاوان دات کنت۔ ہنچوشکہ من پیسرا ہم گْوشت کہ زبان گوں چاگرد ءَ بستگ بزاں چاگرد ءِ دیمروی زبان ءَ دیما بارت ، چاگرد پدمنتگ زبان ہم اوشت آماچ بیت۔ من اسحاق خاموش ءِ اے گپ ءَ تپاک داراں کہ رجانک گیش ءَ چے گیش بہ بیت بلے منی حیال ءَ تہنا رجانک نپ مند بوت نہ کنت دگہ راہ ہم شوہازگ لوٹیت” چندن ساچ ءَ دْراجیں گْوشتانکے دات۔

"بلوچی وانینگ ہم زلوری انت” خاموش ءَ حیال پدّر کت۔

"ہؤ، باید بلوچی وانینگ بہ بیت” تاج بشیر ءَ گوں اسحاق ءَ تپاک داشت۔

ملا فاضل ءَ پاگ شر کت و پدا تران کنان گْوشت ئےِ ؛ "ماں وانگجاہاں بلوچی وانینگ ءِ جیڑہ سک کْوہن انت من پگر نہ کناں گوں اے سیاسی رہشوناں ما جاہے سر بہ بئیں ، ما باید وت ہم گام چست بہ کنیں۔ بلوچانی مستریں بہر ایران و پاکستان ءَ نشتگ ، اے دویں ملکانی دستور ماتی زبان ءَ وانینگ ءِ حق دینت بزاں اد ءَ مارا کانودی مشکل نیست گپ حق پچ گرگ ئیگ انت۔ کواس ، شہ زانت و نودربر وت گامے بہ کنز انت و چہ گورنمنٹ ءَ بلوچی وانینگ ءِ لوٹ بہ کننت۔ من بلے دگہ گپے ہم گیشّینگ لوٹاں ، راست انت مئے پگر و جذبگ ہمدپ نہ انت ، راست انت بلوچی نوکیں پگر ءِ بار ءَ وتی کوپگ ءَ زرت نہ کنگ ءَ انت بلے ایشی ءِ بزانت اے نہ انت بلوچ اردو ، فارسی و انگریزی بہ نویس انت۔ نبشتہ کار باید پہ پگر ءِ درانگازی ءَ بلوچی ءَ وتی اوزار جوڑ بہ کننت ، آیاں کمّو مشکل بیت ، کم کم ءَ راہ آسان تر بیت۔ ہاں ، زگریں بلوچی ءِ سرا ضد کنگ مارا کور چات ءَ دؤر دات کنت ، شر تریں و بہتریں راہ ایش انت نبشتہ کار لس مہلوک ءِ زبان ءَ بہ نویسیت ہنچوشکہ انگریزی ءَ رابرٹ فسک انت یا اردو ءَ وسعت اللہ خان و ڈاکٹر مبارک علی نبیس انت۔ دری لبز اگاں کاینت بلّے کاینت نبشتہ کار بس روان بہ کنت بلوچی مئے پجار انت ، پجار ءِ سرا ہچ کمپرومائز مہ بیت”۔

"کماش !” ؛ چندن ساچ ءَ ملا ءِ دلگوش وتی نیمگ ءَ ترّینت۔ "وہدے بلوچی نوکیں پگر ءِ ہمراہ داری کت نہ کنت گڑا ما نبشتہ کار ءَ چون مجبور کت کنیں کہ آ بلوچی ءَ بہ نویسیت۔ تو وتی گپ ءِ سرا وت نہ اوشتگ ءَ ئے”۔

"ناں ناں چندن جان۔ ملا راست گْوشیت ، مجبور وَ کس کنگ نہ بیت بلے مئے لوٹ اسل ءَ ہمش انت ما اڑ و جنجالاں ہم سرپد بہ بئیں و آ اڑانی گیش و گیوار ہم بہ کنیں۔ آ کہ اردو ، فارسی و انگریزی نبیسگ ءَ اَنت ما آیانی مشکلاں سرپد بوہگ ءِ جہد بہ کنیں نئیکہ گوں شگان و ٹاکوراں آیاں چہ وتا بہ سند ایں۔ ہرکس ءَ وتی زبان دوست بیت نہ باید ما شما سرٹیفکٹ بہر بہ کنیں اڑئے فلانی اردو نبیسیت اے زبان دژمن انت۔ پدا مارا دو کار ہواری ءَ کنگ لوٹیت یکے چاگرد چہ قبائلیت و جاگیرداریت ءَ چے کشّگ لوٹیت دانکہ صنعتی بہ بیت۔ صنعتی چاگرد وت زبان ءَ دیما بارت ، دومی ما بلوچی ءِ دامن ءَ پراہ تر کنگ ءِ کوشست ہم بہ کنیں۔ دگہ یک چیزے یے نیمگ ءَ ہم من شمئےحیال ءَ برگ لوٹاں ، مئے لہتیں سنگت اردو و فارسی ءَ وتی دژمن سرپد باں و دائم گوں اے زباناں نفرت کنگ ءِ پروپیگنڈہ کننت۔ اے لیکہ ہم ولگوج کنگ لوٹیت۔ زبان ءَ ٹکّانی تہا بہر کنگ سکیں ردیں پگر انت ، زبان ظالم و مظلوم نہ بنت ، یکے زبان ءَ زردار و نیزگار دویں کارمرز کننت پمشکا زبانانی گوما نفرت کنگ ءِ جاہ ءَ بیائے ایدگہ زبانانی تجربتاں چاریں و وتی زبان ءَ دیما بریں۔” اسحاق خاموش ءَ مئے نیمگ ءَ چاران ءَ گپ ہلاس کت۔

تاج بشیر ءِ وڑ گوشگ ءَ ات پہ بال کنگ ءَ ساڑی انت ہنچوش اسحاق ءَ گپ ہلاس کت تاج ءَ بانزل چنڈ اِتنت "بزاں گپ اتک اد ءَ سر بوت کہ بلوچی ءِ تہا نان فکشن نبیسگ ءِ کوشست کنگ بہ بیت و ہرکس نان فکشن نبیسگ ءَ دری لبز ہوار کنت باید آئی ءِ راہ ءَ ڈنگر دیگ مہ بیت۔ بلوچی ماں وانگجاہاں وانینگ ءِ واستہ باید ما وت کوشست بہ کنیں زنڈ لاپیں سیاسی رہشون مارا ہچ کمک کت نہ کننت۔ سیمی ما وتی پگر و جذبگ ءَ گوں یک دگری ءَ ہمدپ کنگ ءِ نیمگ ءَ ہم دلگوش گْور بہ کنیں۔ نی شما دگہ چاہ ور اِت یا رؤگ ءِ کن اِت ، مغرب ہم قضا بوتگ”۔

"رؤگ ءِ کنیں” ملا فاضل پاد اتک۔ ملا ءِ پاد آیگ ءِ گوما ما ہم پاد اتکیں۔ منا و ملا ءَ لیاری ءَ روگی ات ، تاج و چندن نہ زاناں کجا رؤگ ءَ دلمانگ اتاں و خاموش ءَ جار جت من جہانگیر روڈ ءَ ظفر کریم ءِ گندگ ءَ رواں۔ ما یک دگرے ءَحُدا ءِ میار کت و در کپتیں۔

(ہلاس)

 

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*