بنیادی صفحہ » نوشتانک » بیگلؔ انگت النور ہوٹل ءَ انت۔…..چندن ساچؔ

بیگلؔ انگت النور ہوٹل ءَ انت۔…..چندن ساچؔ

ہما زمانگ ءَ کہ من کلانچؔ ءَ اتاں، نوکی بلوچی وانگ در برتگ ات گڑا ماہتاک بلوچی ہر وہد چہ پسنیؔ ءَ لوٹائینتگ ات۔ ماہتاک بلوچی ءِ تہا یک نامے مدام دیستگ ات۔ آ نام بیگ محمد بیگلؔ ئیگ ات۔ بیگلؔ ءِ چیزانی وانگ من ءَ مُدام وش بوتگ ات۔ پرچا کہ بیگلؔ ءَ وانوک ہچبر ابیتک نہ کتگ ات۔ آئی ءَ برے لیاری ءِ بانکلینک والائیں ماسیانی کسہ کتگ اتنت و برے وتی پرشتگیں پرپٹ و برے دمکاں نشتگیں مردمانی کسہ۔۔۔۔۔ بیگ ءِ وانگ ءَ پد مُدام دل ءَ اومان کتگ ات کہ من ہم کراچی ءَ بہ گنداں۔ اودا ہشت چوک انت۔ بغدادی انت، چاکیواڑہ انت، لیمارکیٹ انت۔ میوہ شاہ کبرستان انت۔ شیرشاہ کبرستان انت۔ اِے درستیں جاہ بیگلؔ ءِ وشیں نبشتانکانی تہا من دیستگ ات۔

پدا کہ وہدے کراچی ءَ اتکاں۔ ہؤ تہ گنداں لیاریؔ انت، لیمارکیٹؔ، میوہ شاہؔ کبرستان، شیرشاہ کبرستان، چاکیواڑہؔ، بغدادیؔ، ۔۔۔۔۔۔۔۔۔ بَلئے فرق ایش ات کہ نوں اِدا مدام تیرانی توار گوشان کپتگ ات۔ آ چاگرد کہ بیگلؔ ءِ نبشتانکانی ہما زمانگ ءِ بہر اتنت۔ بزانکہ سن 2001 و 2003 ءِ آ چاگرد بدل بوتگ ات۔

پدا اِدا دیوان بوتنت۔ من ہمے دیواناں بہر زرت۔ نوں 2006 ات، اِدا استاد صبا دشتیاری ات، میر احمد دہانی ات و دگہ بازیں مردم ہوار اتنت۔ جمّہ ہال لیاری، ملیر و کش و گْور ءِ دمگاں دیوان بوتگ ات۔ بَلے من اِے دیواناں بیگلؔ نہ دیستگ ات۔ پدا یک روچے دیوانے ءَ من مردے دیست کہ نزور ات۔ آئی ءَ تہاری ءِ سبب ءَ ونت نہ کُت۔ چماں عاجز ات۔ کمزور ات۔ ہمے مرد بیگلؔ ات۔ بَلئے دیوان ءَ من گوں بیگلؔ ءَ دوچار نہ کپتاں۔

پدا بیگلؔ گندگ نہ بوتگ ات۔ یک روچے من لیاری ءَ ہشت چوک ءَ النور ہوٹل ءَ نشتگ اتاں۔ اناگہ ءَ مردے ہوٹل ءَ پترت۔ اے مرد بیگلؔ ات۔ ما شریں وڑے ءَ گند و نند کُت۔ آئی ءَ کلم و کاگد گون اتنت۔ چیزے ءِ نبشتہ کنگ ءَ اتکگ ات۔ ہمدا دو پنڈوک ہم اتک۔ یک کسانیں جنکویے ات و دومی ماسی یے ات۔ بیگلؔ ءَ بیست والا نوٹے کش ات و داتنت کہ 10، 10 کلدار بزور ات۔ جنکو ءَ نوٹ چامپ اِت و تتک۔ ماسی ءِ دپ کؤش ءَ بوت۔ بیگلؔ ءَ کوکار کُت۔” 10 روپیہ اسکو دے دو“۔ بَلئے آئی ءَ ہوٹل ءِ دریگ ءَ چہ ڈنّ، پہ سوکلوئی بیگلؔ ٹاٹا کُت۔ ”نہیں دوں گی، نہیں دوں گی“۔۔۔۔ بیگلؔ جزباتی بوت۔ ”میں کہتا ہوں اس کو بھی10 روپیہ دے دو“۔۔۔۔۔ بَلے آئی ءَ بیگلؔ ءِ گپ نہ زرت و شُت۔ پنڈوک ءِ اے وڑ کنگ ءَ چہ، بیگلؔ تہ دیراں بے توار بوت۔ پدا کلم ئِے زرت و چیزے نبشتہ کنگ ءَ بوت۔ ما چار ات۔ بیگلؔ ءَ تکانسر مہ کن۔ ما بیگلؔ رخصت کُت۔ مئے وہد ءَ نشتگ ات و نبشتہ کنگ ءَ ات۔

مروچی بزانکہ 12 اپریل 2017 ءَ  پدا من لیمارکیٹ ءَ ہشت چوک ءَ کمو گستا گل بلوچستان ہوٹل ءَ نشتگ ات و گوں لہتیں سنگتاں لبزانک ءِ سرا پوتاری کنگ ءَ اتاں۔ تہ منیر ءِ میسج ءَ من ءَ دلپدرد کُت کہ بیگ محمد بیگلؔ بیران بوتگ۔ منیر ءِ میسج ءِ وانگ ءَ پد دل گیمرت۔ بیا کہ بیگ محمد بیگلؔ ءِ وڑیں ہستی ہم بیران بنت؟

پدا من ءَ گمان بوت ناں یار۔۔۔۔ بیگلؔ زندگ انت۔ انگت النور ہوٹل ءَ ہما کرشی ءِ سرا نشتگ و سیاہیں کلم ءَ گوں نبشتہ کنئگ ءَ انت۔۔۔۔۔۔ دوئیں پنڈوک ہر روچ کاینت۔ بیگلؔ آیاں بیستی یے دنت۔ کسان عمریں پنڈوک بیستی ءَ چامپیت و تچیت۔ بیگلؔ کوکار کنت۔ او ترا گشگ ءَ یاں۔ ایشی ءَ ہم دہی یے بدئے گوں۔۔۔ بَلے آ تچیت، و بیگلؔ پدا وتی کسہ ءِ کارستاں نزّکاریت۔ ماسی جماعتی بانکلینک والا، یوسف سوریں ماہی والا، سومار چولا والا، گل خان بار والا، اے دْرست یکجاہ بنت و بیگلؔ ءِ کلم سُران کنت۔۔۔۔۔۔ اِے سفر ہمے وڑا روان کنت و دوئیں پنڈوک ہم ہر روچ کاینت۔۔۔۔۔۔

٭٭٭

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*