بنیادی صفحہ » نوشتانک » شُتاں کہ وہدے دوگامءَ پدا نیاہاں من…..یلان بلوچ زامرانیؔ

شُتاں کہ وہدے دوگامءَ پدا نیاہاں من…..یلان بلوچ زامرانیؔ

آئیءَ مدام سُہب سرا وہدیکے کوپے چاہ وارت  دیم پہ النورؔءَ رہادگ بوت، و آئیءَ دستءَ لٹّے ات و عینک چماّن ات، لہتیں اسپیتیں تاک دستءَ ات، کمو وہد گوست سگریٹ کش ات و روک کت، سگریٹءِ دُوت تالان اتنت، حیالانی  تہا لبزوہدیکہ اتک انت گڑا  بیگءَ  قلم زُرت و اسپیتیں تاک رجینت انت، چو مُدامی وڑا من وہدیکہ اتکاں منی اولی حاضری  النورؔچیرءَ گوہربلوچءِ کسانیں کتابجاہ ات  من وہدیکہ کتابجاہ  ءَ کتاب پیشکُنڈ اتنت پدا منی دیم  گوں النور ہوٹلءِ تہا نندوکیں مردءَ ات کہ من آئیءِ عکس ماں بلوچی ماہتاک و سچکان وایدگہ تاک وکتابانی تہا دیستگ ات، من وہدیکے کتابانی عکس  چارات  منءَ گُمان بوت کہ بیگُل مہروانیں انسانے بیت، ہما انسان کہ  آئیءِ تہا  مہرو دوستیءَ ابید دگہ ہچ  نیست، برے برے کہ من النور چمشانک دات تاں مرچی بیگ محمدبیگل گندگ نہ بیت گڑا من گوہرؔءَ جست کت آئیءَ گشت کہ مرچاں واجہ سک نزورانت، دیراں پد یکروچے من و منی ہمبلیں بیلی شے عبدالماجد چہ یک مراگشےءَ پد پیداک اتیں ما گوں واجہءَ گندو نندکت کہ  واجہءِ ہبر من ریکارڈہم کتنت، بلے آواز ساپ نہ ات، مئے جست ایش اتنت کہ واجہ  تو بلوچی زبانءَ  دوازدہیں آبانی درکنگءَ منّوک ئے اگاں انا

”انا ۔۔۔۔۔۔۔۔۔۔۔۔۔“

”تئی دوستریں آزمانکار کئے انت؟‘‘

”ناگمان شرنبشتہ کنت۔۔۔۔۔۔۔“دگہ یک ودونام واجہءَ گِپت منءَ یات نہ بوت۔

”تئی لبزانکی سفر چون گوستگ“

”تو کجا کجا ونتگ“

”منی آزمانک ماں پنجاب ٹیکسٹ بک بورڈ  ءَ  نصابءَ وانینگ بیت“

اے روچءَ ما باز گپ ہبر کت، چدو پد من  واتر کت و کراچی  یل دات  ۔۔۔۔۔۔بیگُل  گوں نادْراہیءَ  جنگءَ ات۔۔۔۔۔۔مئے گندو نند آسربوت۔۔۔۔۔مرچی منءَ ہما مہروانیں مردءِنرم نرمیں توار گوشان کپگءَ انت۔۔۔۔آئیءَ چاہءِ کپ وتی دیمءَ ایرکتگ۔۔۔۔۔اسپیتیں تاک  ٹیبل سرا  ایرانت۔۔۔۔۔۔۔سگریٹ ءِ دُوت  گْواتءَ گوں ہلوت کنگءَ انت۔۔۔۔۔۔۔دُعا انت  کہ اللہ واجہءَ  وتی گنجیں رحمتانی سارتیں ساہگءَ جاہ بدانت۔

٭٭٭

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*