بنیادی صفحہ » شونگال » لبزانک ءِ آزمان ءِ دگہ اِستالے سِست

لبزانک ءِ آزمان ءِ دگہ اِستالے سِست

لہتے  اَنچیں اِنسان بنت کہ چرے کوڑہیں دُنیا ءَلڈّنت و رؤنت بلئے آہانی نام و نشان تاں کرناں راجدپتر ءِ تاکدیماں مانیت۔چہ ہماہاں یکّے محمد بیگ بیگُل ؔ اِنت کہ 12 اپریل ئَ اَچ ما سِست و دیم پہ دگہ دُنیا یے ءَ رپت۔بیگُل ؔ چہ ہما نبشتہ کاران اَت کہ آئی ئَ وتی زِند پہ بلوچی ءَ دات۔تاں زِند ءِ گُڈّی روچاں گوں وانگ و نبشتہ کنگ ئَ ہمگْرنچ اَت۔ آئی ئِ نبشتہ ءِ رِد ءَ یک اَنچیں پِڑے گچین کُتگ اَت کہ گِندگ ءَ تژن و بچکند و مسکراءِ پِڑ اَت بلئے کسے اگاں کسےاے پِڑ ءَ جُہلانک ئَ بُرؤت تاں زانت  کہ  پِڑ چینچو مزن و شاہگان اِنت۔بیگل ءِ تژن و بچکندی نبشتانک چہ دُنیا و وتی چاگرد ءِ اسرار و رازاں سر ریچ اِتنت۔بیگل ءِ وانشت(مطالعہ) شاہگان ات پمشکا آئی ءِ نبشتانکانی وانگ ءَ وانوک ہچبر دم نہ بارت، تژن و بچکند ءَ ابید آئی ئِ نبشتانک چہ مالومداری ئَ چکار اَنت۔

بیگل ءِ نبشتگیں کتاب  ” زَنڈیں دَپار ”  ” جوکر ”   ” بَرزخ ” و ” شکّل و ماجین پہ بلوچی لبزانک ءِ بے مٹّیں ٹیکی اَنت کہ اے پُژمُردگیں چاگرد ءِ گیمُرتگیں لُنٹاں سہت و دمان بچکندگ ءِ سکین ءَ دئینت ۔

آئی ءَ ایوک ءَ تَژن و بِچـکند نبشتہ نہ کت ، بلکیں آ جْوانیں رجانکار ، آزمانکار ، و کسمانکار ے ات هَـم  ۔آئی ءَ  میـجَر ای موکلر ءِ نبشتـگیں وانگی ” بلوچی گرائمر ”  ءِ رجانک ءِ همراهی ءَ وتی آزمانک و کِسّہ انگلش ءَ رجانک هَـم کتگ اَنت  ۔

بلوچی زُبان و لبزانک محمد بیگ بیگُلؔ ءِ تورہ بار اِنت۔بلئے مئے چاگرد ذی ہم واب بُوتگ و مرچی ہم چہ واب ئَ جہہ جنگ ءِ نام ئَ نہ زانت۔ماں دُنیا ءَ بیگلؔ ءِ گونگیں نبشتہ کارکہ است و حیات اَنت جتا جتائیں گَل آہانی نام ءَ مراگش و دِیوان اڑ دئینت  آہانی چہ جہان ئَ سفر کنگ ءَ پد آہانی نام ئَ مزن مزنیں لبزانکی و چاگردی ادارگانی نام ایر کَنگ بنت و سرکاری سطح ءَ آہانی روچ دارگ بنت۔ٹی وی آنی مراگشانی تہا آہانی یات ئَ مراگش دارگ بنت و حالتاک و تاکبندانی تہا پراہاں حاصیں پیپر نبشتہ کنگ بنت۔ بلئے بژنی گپّے کہ بیگُل وڑیں کوہ بالادیں سر کہ چرے دُنیا ءَ رؤنت یک بلوچیں سیاسی سروکے ماں یک حالتاکے ءَ دِلپدری ءِ دو دانک اوں درشان نہ کنت۔ما وتی مردُماں کدی ارزِشت دئیں؟ ما کدی چرے بیگانگی ءَ درکائیں؟اے جُست پہ بلوچیءِ ہمک دوزواہ و وانوک ئَ  انت۔”بلوچی“ ءِ تاکدیم پہ شُما مُدام ساڑی اَنت۔

بلوچی سبز و میزراں بات

شونکار

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*