بنیادی صفحہ » نوشتانک » ” ما پہ بلوچی ءَ زاناں کُجام زَہم جَتَگ کہ کسے مئے ہال ءَ بہ گیپت“ بیگُلؔ…..اِسحاق خاموشؔ

” ما پہ بلوچی ءَ زاناں کُجام زَہم جَتَگ کہ کسے مئے ہال ءَ بہ گیپت“ بیگُلؔ…..اِسحاق خاموشؔ

دوشی کہ”برزخ”ءِ "گُڈّی دانک”ءَواجہ محمد بیگ بیگلءِ ہمے لہتے کِشکاں وانگ ءَ اِتاں ” ۔۔۔۔۔ منی دپ ماں ہاکاں بات اگاں بہ گُشاں کہ ہمے زیتّاں منی اے دِلبر لڈّگ و رؤگی اِنت۔ایشی ءِ سبب اِش اِنت کہ چہ اِشاں گیشتر ءَ انگت دُنیا پہ الکاپی نہ دیستگ۔کودک انگت ماں وتی موج مستیان اَنت، لہتے ءِ جوازِ سفر ہم تیار نہ اِنت۔لہتے ءَ ویزہ نیست۔لہتے گوں امیگریشن ءِ واکداراں کشّ و چیلّ اِنت و لہتے انچیں ہم اَست کہ کہ چہ وتی چاگرد ءَ پہک بے سار و واب اِنت۔پمیشکا منی دُعا اِنت کہ ہاوند اِشانی ملوکیں سراں نگاہ دارات۔تنکہ منی ہمے چمروک پہ ماتین زُبان و وتی سر ڈگار ءِ پہازگ و دیمپانی ءَ گیش چہ گیش کار کُت بہ کن اَنت۔البت منی ہبر دگہ وڑ اِنت شُگر اِنت ہاوند ءِ کہ من جواز، سفر ، ویزہ ، ٹِکس و امیگریشن ءِ کُلـیں جنجال گْوازینتگ اَنت واے وہدی ماں ڈپارچر لاؤنج ءَ پہ کرار نشتگاں۔۔۔۔”(برزخ ، محمد بیگ بیگل۔تاکدیم 8چاپ 2012، )۔۔۔۔ مُردنی ایں ہما دمان ءَمنی چمّانی اَرس شیپ گیپت اَنت کہ ہما ہاں کہ وتی زِند پہ بلوچی زُبان و لبزانک ءَ نْدر کُتگ مرچی لوگءِ کُنجے ءَ کپتگ اَنت و بے وسی ءِ مانگیشّتگیں بندیک ءَ گیشّینگ ءِ جُہد ءَ اَنت۔

مرچی منی بْرات گونگیں سنگت ظفر اکبرؔ کہ منی چارگ ءَ اَتک ۔۔۔ من وت ءَ گیشتر ملامت کُت کہ اے تیز رواجیں وہد ءَ مارا اَنچو گوں وتءَ مانگیشّینتگ کہ ما کسّی ہیال ءَ ہم نہ ایں۔کئے کُجام حال ءَ اِنت کسّ کسّی نہ اِنت۔۔۔۔۔۔۔ چونیں مہشرے اتکگ

بیگاہ ءِ وہد ءَ من و ظفر سر گِپتیں کہ رؤئیں واجہ بیگ ءَ گِندیں ۔۔۔۔۔کِساس سئے ماہ بُوتگ اَت کہ من واجہ بیگل نہ دیستگ اَت۔۔۔۔آ، بری کہ من دیستگ اَت ہم وتی نادْراہی و چمّانی نزّور ترّگ ءِ زنگ ئےِ جتگ اَت۔

من و ظفر کہ چہ نوکیں لین ءِ دمکاں سر جنان سِنگولین ءِ نزّیک ءِ دمک ءَ سر کش اِت منی دیما ” براہوئی ہوٹل "(چٓھچی ہوٹل ) اَت ۔۔۔ اناگہ تْرانگ ءَ کپتاں ۔۔۔۔۔۔۔ اصغر علی آزگؔ اوں من دیریں نہ دیستگ ۔۔۔  "ظفر ! من و آزگ مدام ہمے ہوٹل ءَ نشتگ ایں ، چاہ وارتگ و لبزانکی پُوتاری ہم کُتگ۔۔۔۔ ”

من وتی چمّ ہوٹل ءِ دیم ءِ کُرسیانی سرا شوہازگ پرمات اَت بلئے آزگ زاہر نہ اَت۔

” یار ! مرچی آزگ گندگ نہ بیت “

منی چمّاں شوہازگ ءِ رہسراں سرے جت و پد ءَ واترّ اِتنت۔

دمانے ءَ پد من و ظفر اکبرؔ ہشت چوک ءَ بسم اللہ ءِ ہوٹل ءِ کش ءِ دمکاں سر بُوتگ اتیں ۔۔۔۔ دیم پہ دیم ءَ دیوال ءِ سرا تختی ءِ سرا نبشتہ اَت ”محمد بیگ بیگل ہاؤس نمبر 215

ما راستی کش ءَ تاب کُت و دروازگے ءِ گھنٹی زٗور پِر دات۔ دمانے ءَ پد چُکّے در اَتک ۔

من جُست کُت ” واجہ ہمدا اِنت؟”

” ہؤ”

من کاگدکے ءِ سرا نبشتہ کُت و چُکّءِ دستءَ دات ٘

” واجہ ترا گِندگ لُوٹیں ۔۔۔۔۔۔ تئی کستر اِسحاق خاموشؔ“

دمانے ءَ پد دگہ گْونڈویے اتک ”ابّا گُشی بُرزا بیا اِت“

من و ظفرؔچہ پدانکاں بُرز ءَ سرکپان بُوتیں ۔۔۔۔ دروازگے پچ اَت ۔ من دروازگ ٹُکّ اِت۔ ” تہا بیا اِت” چہ تہا جنین آدمے ءِ تواراَت۔

ما کہ لوگ ءِ تہا پُترتیں دیم پہ دیم جنیادم ے نشتگ اَت و کش ءِ کُوٹی ءِ دپ ءَ واجہ بیگل ءِ جنین زہگ آئی ءَ کوپگ دیان اَت و کُوٹی ءَ برگ اَت ۔۔۔ اے بیگ صاحب ءِ مہر اَت ۔۔۔۔ کہ نزورو نا توان اَت بلئے مارا دِلپروش ئےِ نہ کُت واترّئےِ نہ کُت۔

دمانے ءَ پد واجہ بیگل منی و ظفر اکبرءِ دیم پہ دیم ءَ نشتگ اَت۔۔۔ منی ہیال ءَ گُشئے علم و زانت ءِ چمّگ  ئےِ سر رِچان اَت و مئے بالاد ءَ وشنود کنان اَت۔

"شُمئے مہربانی کہ شُما وہد کشّ اِتگ و منی چارگ ءَ اتکگ اِت” بیگ ءَ درّائینت۔

” انّا واجہ ۔۔۔۔۔۔۔ اے مئے پیمیں نابُودیں نودربرانی فرض اِنت شُمئے حالگیری کَنگ۔۔شُما بلوچی زُبان و لبزانک ءِ کوہیں کلات اِت” من پشل ءَ پشل ءَگُشت۔

واجہ بیگل ءَ سرجاہ ءِ سرا تِکّہ داتگ اَت منی نیمگ ءَ چَکّ ئےِ ترّینت و گُشت ئےِ۔۔۔۔” ما پہ بلوچی ءَ زاناں کُجام زَہم جَتَگ کہ کسے مئے حال ءَ بہ گیپت”۔۔۔ گُشئے جمبیائے منی دِل ءَ مِکّ بُوت۔۔۔۔ اے یک بلاہیں گِلگے اَت پہ وتی چاگرد ءَ ۔۔۔۔۔۔۔۔۔۔۔۔۔ شہماتے اَت پہ راجی سروکاں ۔۔۔۔۔۔۔۔ دلپروشی یے اَت پہ مئے پیمیں نودربراں ۔۔۔

"واجہ مئے بلوچی زُبان ءِ شاعری ، آزمانک و انچیں سساساچ پرچہ دِگہ زبانانی تہا رجانک کنَگ نہ بنت؟”

بازیں جُستاں پد منی گُمان وحہیال ءِ پردگاں اے دیم ،اے جُست ءَ سر کشّ اِت۔

” مئے مردُم ارزانی ءَ نام لوٹنت و اے بلاہیں کارے اے کار ءَ ہرکس کُت نہ کنت۔۔۔ وہد و دِل سِتکی دوئیں لوٹیت۔

ساہتے ءِ نیاد ءَ کرنے ءِ تاہیر دات و من و ظفر اکبر ءَ وتی راہ گِپت۔

"یکبرے پدا آزگ ءِ ٹھکانہ ءَ سرے جنیں”

من ظفر ہال دات۔ غریب شاہ ءَ ندیم لاشاریؔ دُچارکپت۔۔۔۔ ندیم ءَ مارا تاں آزگؔ ءِ دروازگءِ دپ ءَ سر کُت۔

دمانے ءَ پد من ، ظفر اکبرؔ، اصغرعلی آزگؔ، سلیمان رئیسی و ندیم لاشاری براہوئی ہوٹل ءِ دیم ءَ چاہ واری ءَ اِتیں۔منظور دلجمؔ ہما وہدی ہوار بُوت کہ من و ظفر پاد آہگی اِتیں ۔

اصغر علی آزگ ؔ شاعری ہم کنگ ءَ اِنت ۔۔۔۔۔۔ آزمانک ہم نویسگ ءَ اِنت ۔۔۔۔۔۔۔ کتاب ہم چاپگ ءَ اِنت۔۔۔۔ دیما روان اِنت۔۔۔۔۔ جُنزان اِنت ۔۔۔۔۔۔۔ ” آہاں ہشت ماہ ءَ فتح نظر ءِ کتاب داشت چاپ نہ کُت ۔۔۔ باز ارزشت داریں کتابے ۔۔۔ موسیقی ءِ سرا چوشیں کتاب انگت چاپ نہ بُوتگ ۔۔۔۔۔۔ پدا من گتر ءِ سنگتاں گُشت آہاں کتاب ءِ چاپگ ءَ کُمک کُت ۔۔۔۔۔۔۔۔۔۔ ” آزگ گپّ ءَاَت۔۔۔ ” من انّوں شعری دپتر ءِ چاپ کنگ ءِ تیاری آں ۔۔۔ سنگت گُشنت تو دگرانی کتاباں چاپ کن ئے تئی وتی کتاب کدی چاپ بیت ۔۔۔۔۔من گُشاں بابا زرّ نیست من چہ کُجا وتی کتاب ءَ چاپ کناں ۔۔۔۔ حالانکہ منی نگد ءِ کتاب اوں تیار اِنت۔۔۔۔”

سلیمان رئیسی وتی نوکتریں نبشتانکانی باروا گپّ اَت۔

من وظفر ءَ پاد آہگی اَت کہ مارا واجہ ظفر علی ظفر اوں گندگی اَت۔

کُہنیں گولیمار ءِ شریش ءِ چیر ءِ ہوٹل ءَ ظفر علی ظفرؔ چہ من و ظفر ءَ پیسر نشتگ اَت و وداریگ اَت۔

جی آرمُلّا، بشیر بیدار، قاضیؔ، زیمی ، بیگل و اے دگہ بلوچی ءِ نامداریں شاعر و نبشتہ کارانی کِسّہ، طارق روڈءِ فلیٹ کہ لبزانکی سنگتانی بُنجاہ اَت آئی ءِ کسّہ۔۔۔۔ شاعرانی بچکندی کسّہ ۔۔۔۔۔ زُبان و لبزانک ءِ جیڑہ ءِ کسّہاں پد من پدا ہما جُست کُت۔”واجہ مئے بلوچی زُبان ءِ شاعری ، آزمانک و انچیں سساساچ پرچہ دِگہ زبانانی تہا رجانک کنَگ نہ بنت؟”

"مئے کرّا مستریں جیڑہ لاپ ءِجیڑہ اِنت آسراتی نیست ۔۔۔۔۔۔۔۔۔۔ شاعر و نبشتہ کار لاپ ءِ غم ءَ بکنت یا زُبان و لبزانک ءِ باروا بہ جیڑیت ۔۔۔۔۔۔؟ من ٹی وی ءِ واستہ ڈرامہے نبشتہ کُت ۔۔۔۔۔۔ منی زرّ اِش وارتنت ۔۔۔ ذی نیشنل بُک فاؤندیشن ءِ مراگشے ءَ لوٹائینتگ ات اش ۔۔۔ دیر ءَ گیش ّ اتاں ۔۔ رکشہ ءَ دو سری زرّ داتگ بلئے کسّ نیاریت گولیمارءَ ۔۔۔۔۔۔۔۔۔۔ دگراں بِل مئے وتیگ مراگش ٹہین اَنت گُشی بس ءَ بیا اِت گوں ۔۔۔۔۔۔۔۔۔ من اے بری نہ شُتاں من تہنا اِتاں ۔۔۔۔۔۔ چار اِت کہ کؤرے آپ بکنت یا بس حراب بہ بیت راہ ءَ گُڑا من وَ بزّ گ باں ۔۔۔۔ من نہ شُتاں اے رندی ۔۔۔۔۔ ”

ظفر علی ظفر ؔ گپ ءَ اَت و من دِل ءَ جیڑگ ءَ اِتاں۔۔۔۔

؎ کپوتاں پہ دل ءِ زیماں بہ چار اِت

زہیری نالگاں سہتے بہ دار اِت

شلیناں تْرونگلیں اَرساں اِد ءَ من

زِری نوداں دِگہ دیمے بُگْوار اِت

تْرہیناں غم جتیں ڈیل ءَ دمانے

چہ کئیپاں کدّہیں پُرّیں بْیار اِت

٭٭

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*