بنیادی صفحہ » نوشتانک » محمد بیگ بیگل …..جابر آسکانی

محمد بیگ بیگل …..جابر آسکانی

پدرداں کہ تئی نام ءَ حُدامرزی نبشتگ بہ کناں بلے چوناہا راستی اِش اِنت کہ حُدامرزی تو نئے حُدامرزی من وت آں کہ من بے سمائی ءِ مانش ءَ وتارا زندگ ءَ کَلّ کتگ… واجہ بیگل پہل کن اے چاریں دانکاں تئی واستہ نبشتہ کنگ ءَ آں بلے من اشانی لائک نیاں….  واجہ تئی بوتن 1932 ماں کراچی بوت و تو لیاری ءَ رُست مزن بوت ئے، واجہ بلوچی لبزانک ءَ تو آزمانک و (مزاحیہ نگاری) ءِ جوانیں سیاہگ نبشتہ کُرتگ، بلوچی گرامر ءِ سرا ہم تو جوانیں پٹ پول کرتگ۔ تئی نبشتگ کرتگیں وانگی شکّل و ماجین، زَنڈیں دپار و تئی آزمانکانی انگریزی رجانک(The prize) ءِ نام ءَ چاپ شنگ بوتگ اَنت… چہ اشاں ابید تو کسمانک ہم نبشتہ کرتگ کہ آ کوئٹہ ٹی وی نیمگ ءَ پیشدارگ بیتگ اَنت….. چہ لبزانک ابید تئی راجدوستی مہروانی ہم ستا کرزیت،پہ بلوچی زبان ءَ تو سک باز زانت و زانگ ءِ دَر پچ کتگ، تو کہ تْونگر جان سلامت اِت ئے تو سرجمیں زند بلوچی ءِ دیمروئی ءَ کارمرز کرت۔ وہدے کہ عُمرءِ زالمیں پاس ءَ تو نزور بوت ئے ……. نادْراہ بوت ئے بے آٹیگ بوت ئے بلے یک روچے ہم تو وتی راج توار پِر نہ کُرت کہ من ءَ کمکے پکار اِنت ۔من ہمے گپّ ءَ سک جیڑگ ءَ آں کہ نہ وشّیں جاورانی تہا تو ہچبر گوں ما یک گلّہے ہم نہ کُرت، منا شر یات اِنت 2011 ءَ من مزن ہور ءَ اِتاں، من چہ شنگکار زبان ءِ نیمگ ءَ تراحال کرت گڑا من لہتیں دْروگ گوں تو بست ۔۔۔۔ من گشت تئی لبزانکی جہدانی بابت ءَ ما کارے کنگ لوٹیں، گڑا تو کندت منی منّت گِپت،تو گْوشت واجہ منی بستار ساڑاہگی نہ اِنت شما اگاں کار کنگ لوٹ ئے گڑا دُرملکی چاگرد ءَ بلوچی ءَ دیما بر اِت پدریچ ءَ گوں زبان نزیک بیار اِت و جہدکارانی دل چلّیاں دُور کن اِت، گڑا بزاں شما پہ من ءَ سک باز کُرت و گڈسر ءَ تو اے گپ جت کہ  اگاں من مُرت آں گڑا چار دانک پہ من ءَ ِالّم نبشتہ بہ کن ئے ۔

اے مرد بلوچی لبزانک ءِ ہما سرمچار اِنت کہ وت چو کندیل ءَ روک بوتگ سُتکگ بلے بلوچ راج ءَ را زانت و زانشت ءِ رُژنائی بکشاتگ ئےِ … مرچی واجہ ءِ ہمے گپ وامے اَت منی کوپگاں کہ من نبشتہ کنگا آں۔

”وہدے کہ من مُرت آں چار دانک پہ من ءَ الّم نبشتہ بہ کن اِت“

٭٭٭

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*