بنیادی صفحہ » نوشتانک » محمد بیگ بیگَل ءِ بیرانی

محمد بیگ بیگَل ءِ بیرانی

محمد بیگ بیگل ءِ بیرانی پہ بلوچی لبزانک و زانت ءَ ٹوہیں تاوانے پرچکہ محمد بیگ بیگل وڑیں زانتکار و لبزانککارے ءِ دوبر ماں بلوچی زبان ءَ ودی بوہگ نہ بوتگیں ہبرے۔محمد بیگ ۱۲ اپریل ۲۰۱۷ ءَ ماں کراچی ءَ بیران بوت آئی ءِ بیرانی اے حاترا تورناک انت کہ آ بلوچی لبزانک ءَ دل پہکیں و سگ و اوپاری ندکارے ات ،ندکارے ءِ دْرچ ءَ آئی ءِ گْورا وتارا پیش دارگ و وت گلاہی وڑیں عیب نیست ات کہ بلوچی ندکارانی زنڈیں عیب اَنت۔محمد بیگ یک جون ۱۹۳۶ ءَ کراچی ءَ ودی بوتگ آئی ءِ آرپیں پت ءِ نام محمد قاسم ات آئی ءِ دوچک ات انت انور بیگ و ناصر بیگ کہ آہانی تہا انور بیگ بیران بوت و ناصر بیگ آئی ءِ پشت پدی ءَ زندگ انت ۔ محمد بیگ بیگل بلوچ لبزانک ءِ وانندہ تریں مردماں شمار بوت بلئے آئی ءِ مکتبی علم و زانت انٹرمیڈیٹ ات کہ آئی ءَ چہ ایس ایم کالج کراچی ءَ در برت ۔آئی ءِ میڑک ءِ چکاس ہم چہ ایس ایم کالج ونتگ ۔آئی ءِ پرائمری چہ پرائمری سندھی گلام حسین قاسم اسکول لیاری ءَ دَربرت ۔واجہ محمد بیگ بلوچی زبان ءِ بنداتی جہدکارانی دْرچ ءَ ہوار ات کہ آئی ءَ بلوچی ءِ دیمروئی کاراں سک بہر زرت ۔اے دْرچ ءَ بلوچی اکیڈمی ءَ ۲۰۱۴ ءِ عالمی کانفرنس ءَ آئی ءَ گشتگ ات کہ ’’ ہما مردم مرچی کہ بلوچی زبان ءِ پدمنتگی ءِ گپ ءَ جننت آ ۱۹۴۹ ءَ ماں کراچی ءَ ریڈیو پاکستان کراچی ءِ مراگشانی حال ءَ سرپد نہ اَنت ،آ سرپد نہ انت کہ بلوچی اکیڈمی ءَ ۱۹۵۹ ءَ’’ مستاگ ‘‘چوں چاپ کت ،آسر پد نہ انت کہ ۱۹۸۱ ءَ سید ہاشمی اکیڈمی’’ سنج‘‘ چوں چاپ کت ‘‘۔ آئی ءِ اے دانکاں درا بیت کہ بلوچی ءِ بنداتی کارانی جکانسری ءَ ہوار و ہور بوتگ ۔محمد بیگ بیگل سندھی ،اردو ،فارسی ،انگریزی و بلوچی ءَ نبشتہ کت بلئے آئی ءِ درشان ءِ در و ساہگ آئی ءِ ماتی زبان بلوچی ات البت آئی ءَ سندھی ،اردو ،فارسی و انگریزی ءَ ہم نبشتہ کتگ ۔آئی ءَ وت وتی آزمانکانی ماں انگریزی ءَ ترّینت و The prize ءِ نام ءَ ماں بلوچی اکیڈمی کوئٹہ ءَ چاپ کت انت ایشیءَ ہوار آئی ءَ عطا شاد ءِ بازیں شعرے کانگرس لائبریری امریکہ ءِ گشگ ءِ سرا رجانک کتنت ۔ہمے وڑا بیگ محمد ءَ تنویر عباسی ءِ سندھی لچہاں ماں انگریزی رجانک کت The prize ءَ ابید بیگل ءَ ایندگہ ہپت کتاب انت

روتاک ”آزادی“ کوئٹہ

٭٭٭

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*