بنیادی صفحہ » نوشتانک » محمد بیگ بیگُل…..جی آر شاریؔ

محمد بیگ بیگُل…..جی آر شاریؔ

محمد بیگ بیگُل زبان و لبزانک ءَ هما نام اِنت کہ آئی ءَ بلوچی لبزانک ءِ تہاتَـژن و بچکند ءِ تَهر ءِ پجّار کنائینت ، بے تْـرک و تواریں رَکّانی سَـر ا بِچکند ءِ دْرپش و گوں وتی اِزمی کَـوّاسی و زانتکاری ءَ گال و دَراَنگازی ءَ یکّ شِیرکنی یے وَدی کتگ ۔

محمد بیگ بیگل بے کِساس گیدریں پُـرّ جَـزم و وشّ تَبیں اِنسانے  اَت۔  آ 86 سال ءِ سند ءَ هَـم پہ بلوچی زبان و لبزانک ءِ دیمروی ءَ جُـهد و کوشِست ءَ دَزگٹ اَت و گْوشت ئےِ کہ ، پاکیں ربّ اگاں من ءَ را زندگی ءِ دِگہ موهـے بہ دَنت گُڑا من پَـدا هما کار ءَ پیلو کن آں کہ من مُجّتی پیلو کنان ءَ پیداک آں  ۔

آئی ءِ وانگیانی تہا  ” زَنڈیں دَپار ”  ” جوکر ”   ” بَرزخ ” و ” شکّل و ماجین ”  ماں بلوچی لبزانک ءَ بے کِساس نامدار بُوتگ اَنت ۔

آئی ءَ ایوک ءَ تَژن و بِچـکند نبشتہ نہ کت ، بلکیں آ جْوانیں رجانکار ، آزمانکار ، و کسمانکار ے ات هَـم  ۔  میـجَر ای موکلر ءِ نبشتـگیں وانگی ” بلوچی گرائمر ”  ءِ رجانک ءِ همراهی ءَ وتی آزمانک و کِسّہ انگلش ءَ رجانک هَـم کتگ اَنت  ۔

آئی ءِ نامداریں کَسمانکانی تہا ” ڈاکٹر ” ۔۔۔ ” بانکلینک ” ۔۔۔ ” آپریشن ” دِگہ دِگہ هَـم آئی ءِ لَـبزانکی پَـٹ و پولکاریاں هَـوار اَنت ۔  گوں واجہ بیـگل ءَ منی گِند و نِند هما وهد ءَ بُوت کہ آ بلوچی زبان ءِ گَهـگیریں لچّہ کار مــیر گُل خان نصیرؔ ءِ یات ءَ بَـرجاه داشتگیں لَـبزانکی دیوانے ءَ بَـهر زُورَگ ءَ اتکَگ اَت ۔ اِے وَهـد ءَ آئی ءِ همراهی ءَ بلوچی زبان ءِ نامداریں دَستونک گْوش ظفرعلی ظفرؔ و علی عیسٰی هَـم بلوچی اکیڈمی ءَ جَـلّ اِتگ اِتنت  ۔  بلوچی زبان و لبزانک ءِ بابت ءَ گَـپّ و تْران ءِ نِیام ءَ آئی هاسیں داب و لَهم لَهمیں وشّیں تَوار منی یاتانی تہا اولی روچ ءِ وَڑ ءَ مـروچی هَم نوک و دوسـتدار اِنت  ۔  بیـگُل بے کِساس کَوّاس و نَـرم گُپتاریں اِنسانے اَت  ۔  چہ ڈوبَـر ءَ پْـرُشتگیں موم ءِ وَڑ ءَ گوں وتی زِند ءِ اَستی ءَ جَـنگ کنان ءَ دْرپـشان ءَ غمءِ تَـهاریاں ماں رُژناهی ءَ مَـٹ کنان اَت  ۔ محمد بیگ بیگُل ءَ را وانَـگ وهد ءَ کَس اِے سَـسّا هَـم کُت نہ کنت کہ من چیزّے وانَگ ءَ آں  ۔ آئی ءِ سـاچِشتانی تہا اِزمی زانتکاری و گال و دَرشانـداب ءِ بـاهَند انچوش مُهکم و مُـهر اِنت کہ وانوک وت ءَ را آئی ءِ حیال و سَـسّا ءِ یکّ کارِستے سَرپد بیت و بے تواری و بِچکند ءَ مَٹّ کنت  ۔

آئی ءَ وتی وانگی ” بَرزخ ”  ءِ تہاوتی هَمـدَور ءِ لچّہ کار و لَـبزانتانی بابت ءَ وتی ڈولداریں گوشکندی دْروشم ءَ گوں سَرجمی ءَ تْـران کتگ  ۔ پیشامد و سَر گْوست و جاورهالانی همراهی ءَ گوں آهـاں هَمـگْرنچیں بْـراهداریں و کَم دَز گَٹّیں گپّاناں باز وشّیں رَنگے ءَ نَـدبَند کُـتگ اَنت  ۔ چـریشی ءَ آ مردماں گیشـتر گِهـتریں دابے ءَ سَـرپد بُوگ و زانگ ءِ موه رَسیت ۔ اِے هما مردم اِتنت کہ وتی لَـبزانکی پَٹ و پول و کـوشِسـتانی رِد ءَ باز جتا جتائیں گوناپ ءَ اِزم و کارکِردانی بار کَشّیں و بے کِساس جْـوانیں مردم اِتنت  ۔ گوں وتی اِزمی زانتکاری ، مِهر و دوستی و آراستگی و ڈولداری ءَ آئی ءَ گوں سَـسّا ساچیں گونَگ ءَ آ مردمانی رُژناهیں پَهنات  ۔  گیش پَـدّر کَنَگ ءِ کـوشِست کتگ و زاتی نِـزّوریانی بابت ءَ گپّ و تْران ءَ چہ پَـهریز اِتگ ،  اِے دِگہ گپّے کہ لَهـتیں گوشّکندی و پُـرّ وشّنودیں ویلانی بابت ءَ گپّ و تْـران وتی گالرِد ساچی ءَ گال و دَرشانداب ءِ پوشاک ءَ پوش اِتگ و دَرشان کتگ بَلے اَود ءَ هَـم لَـبزانک ءِ سـیمّسَر ءِ پاسداری کتگ  ۔ آ وتی سـاچِشتانی تہا بَـرے شَـرگِداری و نَگد هَم کنت  ۔هاس چہ نگاه ءِ کَـنِکّ ءَ گوشکندی دَرشانداب ءِ پوشاک و دَرشان اول سَر ءَ کَندینان ءَ پَـد ءَ سَـرپَد بُوگ ءِ مـارِشت وشَرگِداری ءِ نیمَگ ءَ زور دَینت  ۔  آئی ءِ شَرگِداری و نَگد ءِ پَهـنات ساچِشتی زور ءَ گیش کَـنَگ و سَمـبهینگ و ڈولـدار کَـنَگ ءِ هـاتر ءَ لچّہ کارانی ، لَـبزانتانی شَـرَپداری و تَـسلّاه بے کِساس هَژدری اِنت ، هـاس راج ءِ بے دِلبڈّی و کُمک ءِ سَـوَب ءَ گیشتر اِنسان ءِ ساچِشتی سِنچ و اِزم کَم کَم ءَ پَـژمُردگ بُـوّان بنت  ۔ اَنّی الّمی اِے کار اِنت کہ اِے وشّیں و شَـرّیں گوشکندی تَهر ءَ گوں نوکیں پَدریچ ءَ پجّار کَـنَگ و ایشی ءَ را گیش پْـراه و شاهگان تِـر کَـنَگ هَـژدری اِنت ۔

بلوچی زبان و لبزانک ءِ راه کَـپَگ و دیمروی ءِ هـاتر ءَ گوشکندی داب ءَ شَـرگِداری سِـنچ ءَ را پَـدّر کَنگ بے کِساس هَـژدری اِنت۔

٭٭٭

 

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*