بنیادی صفحہ » آزمانک » مردگ پرست…..اصغر زہیرؔ

مردگ پرست…..اصغر زہیرؔ

"واجہ! ایبل بالاچ کہ تو وت ئےِ زانئے چنچو مزنیں شاعرو نبشتہ کار ایت،ما اے رندی ہمے سوڑگ کتگ کہ وتی تاکبند "رہسر”ءَ ہمائیءِ نمبرءَ چاپ بہ کن ایں،پرچاکہ آئیءِ جہدو ہزمت پہ بلوچی زبانءَ سک باز انت۔پرے ہاترا گوں تو دزبندی انت کہ پرائیءَ چندے دانک نبشتہ بہ کن”۔

تاکبند رہسرءِ شونکار ہمبل واہگ ءَ گوں مزن نامیں نبشتہ کار مولم آشار ءَ وتی واہگ درشان کتنت۔

"گپے زان ئے”؟مولم آشارءَ وتی قلم دپءَ کت و جست و پگری نگاہاں گوں ہمبل واہگءَ چارانءَ انچو جست کت ئِے کہ گندئے یکے مزنیں ساچشتےءِ زنکءَ بہ بیت؟ ۔

"جی!چِہ گپے”ہمبل واہگءَ آؤکیں مہمانءِ ودارءِ دابءَ، وتی کُٹءِ کاگدانءَ گیگ کنانءَآ پدا جست کت۔

"من اسلءَ زندگیں مردمانی سرا نبشتہ کنگءِ "حق”ءَ نیاں”،و نیکہ من ءَ اے بابتءَ چشیں سِتک و بھیسہے است” مولم آشارءَ لبزء "حق” دْراج کش دیان ودپءَ گوں دابے چوٹ کنانءَ وتی گپ انچو دیما آؤرت و پدا انچو ایمن بوت کہ گشئے نوکی آئیءَ جہانے فتح کتگ۔

"سبب”؟شونکارءَ سبب زانگ لوٹ ات۔

"سبب ایش انت کہ آ انگہ زندگ انت،تو نزان ئے کدیں وتی رنگءَ بہ مٹائیت،  چون وکجا چہ کدی بہ بیت۔۔۔پمشکہ من گشاں زندگیں مردمءِ سرا نبشتہ کنگ جوانیں کردے نہ انت،منی حیالءَ زندگیں انسانءِ سرا نبشتہ کنگ وَ ہچ مناسب نہ انت،ایشیءِ درور ہمیش انت کہ تو پس ءِ گوشتءِ ورگءَ پیسر وتی گپءَ جنئے کہ پسءِ گوشت وش انت یا کہ ناں۔۔۔۔۔۔

"بلئے واجہ تو آئیءِ جہدو کردانءَ ماں آئیءِ زندگیءَ ساڑاہگ و آئیءَ را اعزاز دئیگءَ ئے،تو یک حسابےءَ آئیءَ را ٹریبیوٹ یے پیش کنگءَ ئے،ہرچی کہ آئیءَ کتگ،اگں بدل بہ بیت ہم بلئے آئیءِ کتگیں وَ است انت”مول آشار وتی لیکہ و گپاں دْراج کش دیان ات کہ شونکارءَ آئیءِ گپ سست انت ووتی حیال درشان کتنت۔

"بہرحال!ہرچ وڑ کہ بہ بیت من اے گپءِ حقءَ نیاں”

ہمبل واہگ چہ مولم آشارءَ دل یکیم بوت،پاد اتک و شت۔۔

درستیں کسہ و گپ بیہال بوتنت۔۔۔وہدءَ یک شریں چپ دستی یے وارت و ایبُل بالاچ چہ دْراجیں مدّتےءِ نادْراہیءَ پد بیران بوت۔

ہمبل واہگءَ ماں فیس بکءَ دلپدردی درشانے نبشتہ کت،چندے گپ اوں آئیءِ ساڑاءَ گوناپ دات۔

ہمے دلپدردی درشان کہ مولم آشارءِ دیم ءَ گْوست گڑا آئیءَ بچکندانءَ کمنٹسے نبشتہ کت کہ اے راج انگہ چہ مردگ پرستی ءَ درکپت نہ کنگءَ انت۔

٭٭

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*