بنیادی صفحہ » نوشتانک » مُردگ پرستی و درآمد دوستی …..علی جُمّعہ زامُرانی

مُردگ پرستی و درآمد دوستی …..علی جُمّعہ زامُرانی

من مدام ہمے گال پہ وتی راجءِ تبءَ ونتگ و اِش کتگ کہ بلوچ راجءِ تہا بازیں نزوری ہست اَنت کہ ایشانی تہاَ یکے مُردگ پرستی و دومی درآمد دوستی اِنت اگاں ما اے گپانی سرءَ نگد کاری و شرگداری و شوہاز کاری بہ کنیں و گوں منانکءَ اے گپاں دیمءَ بیار اِیں بلکہ مئے راج باور بہ کنت و وتی اے نزوریانی و آدگہ ہرچ نزوری ے ہست اِنت ۔ دُور کنگ ءِ جہدءَ بہ کنیں کہ اے شگان و بُہتان چہ مئے سرءَ دُور بہ بنت مردگ پرستی منی حیالءَ چہ کدیمءَ مئے تہا ہست بوتگ و انگت ہست اِنت ایشی ءِ مستریں منانک اے بتل اِنت کہ ”زندگ اَت ہولومبے نہ دات ئےِ مَچی مُرتگ ہوشانی ماں گورءَ تنچیت“  بائد اِنت ما زندگینانی کتگیں کارانی باروءَ گپ و تران بہ کنیں و شُتگ و مرتگینانی کتگیں کاراں یات بہ کنیں۔ دومی درآمد دوستیءَ مئے تہا ہنچو جاگہ کتگ کہ چہ  ہچ کس ءَ چیر نہ اِنت ۔مئے ادیب و زانتکار. شاملو و شیخ سعدیؔ و مرزا غالب و فرازؔ و فیضؔ احمد فیض و گُورگی و اے دگہ درآمدیں ادیب و زانتکارانی باروءَ نبشتہ کننت و آیانی ساڈا و وسپت ءَ کننت بلئےوتی راجءِ زانتکاراں پراموش اَنت ملا فاضل وملا قاسم ملا بوہیر و ملا نورمحمد بمپشتی سید ظہورشاہ ہاشمی گل خان نصیرؔ شے شولان و جام درک و ملا اسماعیل پُلّ آبادی ،مولوی خیرمحمد ندوی و جمالدینی و میر جُمّہ خان وڈاکٹر م ی درّابلوچ و عابدآسکانی ،مبارک قاضی   بیگ محمدبیگل و چاکر علی ابرارؔ و اسماعیل ممتاز ئِباروءَ کسءَ چُشیں نبشتانکے نبشتہ نہ کتک کہ اے ہستیانی باروءَ چیزے مردم سرپد بہ بیت اگاں راجکاری بہ بیت ۔غوث بخش بزنجو و خیربخش مری نواب نوروزخان واے دگہ راجی راج کماش ما بیہال کتگ اَنت۔بلے پہ وتی راجءِ بامرداں بیہال اِیں ۔ اے درآمد دوستی و مردگ پرستی مارا یل کنگ لوٹیت کہ دور بدل بوتگ اَنت کرن گْوستگ اَنت و زانتکاریں راجاں وت ءَ ہنچو دیما آؤرتگ کہ آیاں دنیا یک مُشتے ءِتہا آؤرتگ و سر کُتگ بلے ما تنیگہ برات کشی و درآمد دوستی و مردگ پرستیءِ آماچ اِیں۔ بلے بیا اِت شمارا حالے دیاں کہ اے چیز ما چیزے سال پیسر ماراِتگ اَت ما گوں ادبی و راج دوستیں سنگتاں شور و سلاہے کت کہ مُردگ پرستی یل کنگ بہ بیت و ہما زانتکاریں ہستی کہ ہست اَنت ہمایانی نامءَ یکے ءِ نامءَ یک دادی گَلے اَڈ کنیں ہمک سال بلوچ راجءِ یک ادیب و شاعر و ہزمتکارےءَ یک دادے دئیں و ما گوں سنگتاں گوں دل پہکیءَ اے کار بنگیج کت و دْرستیں ادیبانی نام ما نبشتہ کت اَنت و گُڈ سرءَ بلوچی زبانءِ مزن شانیں ادیب و تزن و بچکندی نبشتہ کار واجہ  بیگ  محمد بیگل ءِ نام گچین کنگ بوت و ما اے داد (ایوارڈ )ءِ نام” بیگل داد“ ایر کت۔ نوں ہما اِنت ما ہمک سال وتی راجی شاعر و زانتکار و ادیب وبلوچی زبانءِ ہزمتکاراں داد دیگائیں ۔ہما دادے کہ ما داتگ اے وڑ اَنت۔

اولی داد ما واجہ عابد آسکانی ءَ داتگ ۔دومی  ، بیگ محمد بیگل ۔(کراچی) ءَ، سیمی صدیق صلاح ۔( مند). دومی سالءِ داد۔  احمد زہیرؔ، اُستاد ستار بلوچ(کراچی)  سیمی سالءِ داد… مبارک قاضی.پسنی .. چارمی سالءِ داد اِسحاق خاموشؔ (پُلّ آباد)، پنچمی  سال ءِ داد،مجید عاجزؔ   ( بالیچہ)ششمی سالءِ داد علی جان قومی( نزرآباد) ہپتمی سالءِ داد ماہتاک بلوچی (کوئٹہ) ہشتمی سالءِ دادؔ غنی پرواز( کیچ)نہمی سال داد عبدالواحد بندیگ( شال) و 2015و 2016ءِ داد بانک زاہدہ رئیسی (کراچی)ءَ دیگ  بوتگ و دیمءَ انشاءاللہ ما اے داد ءَ وتی ہما زانتکار و شاعر و بلوچی زبانءِ ہزمتکاراں دئیں کہ آ پہ بلوچی زبانءَ دل پہکیں جہد کننت ۔

٭٭٭

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*