بنیادی صفحہ » نوشتانک » یگ محمد بیگل…..ساہار بلوچ

یگ محمد بیگل…..ساہار بلوچ

واجہ بیگ محمد بیگل یک جون 1936 ءَ ماں کراچی ءَ ودی بوتگ ۔واجہ ءِ کماش ءِ نام محمد قاسم بوتگ واجہ ءَ وتی بنداتی وانگ و زانگ چہ کراچی ءَ بندات کتگ ، بیگل ءِ زانت و زانشت باز کوہنیں و پُہتہ بوتگ آ چہ کسانی ءَ وانندہ و زانتکارے بوتگ کہ آ زمانگ ءَ بلوچ راج چہ وانگ و زانگ ءَ جوانیں رنگے ءَ سرپد نہ بوتگ ۔

واجہ ءَوتی وانگ سرجم کنگ ءَ رند وتی گام ماں بلوچی لبزانک ءِ تہا ایر کتگ اَنت واجہ ءَ بلوچی زبان ءَتژن و بچکندی تہر ءَگوں بلاہیں واہگے بوتگ ، ہمے ہب و واہگ ءَ آئی ءِ بلوچی لبزانک ءِ تہا یک جوانیں منزلے ءَ سر کت واجہ بلوچی ردانک ءِ تہا سیاہگ و آزمانک نبشتہ کنگ ءِ یک الکاپیں کردے نامے زانگ بیت ۔

واجہ ءِ ہمک تژن و بچکند چہ پکر و زانت ءَ سرریچ اِنت کہ وانوک ءَ ایوک ءَ تژن و بچکند ءَ اَبید دگہ بازیں سرپدی دئینت۔

بلوچی تژن و بچکند ءِ پڑ ءَ بیگل ءَ وتی بور انچیں دابے ءَ تاچینتگ کہ ستا و توسیپ پہ مئے وڑیں نودربراں نہ بیت واجہ اگاں ہر ہند و دمگ ءَ شتگ درملک یا ماتیں گلزمین ہرجاہ تہ شتگ آئی ءَ نبشتہ کتگ۔

واجہ چہ وتی زبان ءِ مہر و محبت ءَ داں زند ءِ گڈّی روچاں ہم جتا نہ بوتگ ہردیں کہ کلم ئےِ دستَ کتگ ہشکیں تاک لازم رنگینتگ اَنت ئےِ۔

واجہ بیگ محمد بیگل ءِ بارو ءَ مئے وڑیں نودربرانی نبشتگیں دانک ہچ نہ اَنت کسانیں سرپدی ے پہ بلوچ راج ءِ ہما ورنایاں کہ واجہ اِش نہ ونتگ و اُش نہ کتگ۔

واجہ بیگ محمد بیگل بزاں 12 اپریل 2017 ءَ اچ ما جتا بوتگ داں بلوچ راج ءِ یک پُسّگے زندگیں واجہ ءَ یات کنت واجہ مُجّتی نمیران اِنت۔

گڈَی ءَ گوں واجہ ءِ ہمے شعر ءَ وتی دانکاں آسر کناں۔

بِلّ ات کہ بلیت

بام بلیت

ڈیھ سچیت

ساہ سدیت

آجوئی ءِ واہگ بلے

ہچبر،کدی بیگواہ نہ بیت

گار نہ بیت

٭٭٭

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*