تازہ ترین
ur
بنیادی صفحہ » شاعری » مُلا فاضل …..مَرگ ءِ شیئر

مُلا فاضل …..مَرگ ءِ شیئر

شُکراِنت کریم ءِ برکت ءَ

صبر ءُ سکوت ءُ خلوت ءَ

صلوات پہ نام ء حضرت ءَ

راستے کہ مرگ ءِ ساھت ءَ

دل جوش جنت وت پہ وت ءَ

دُرست چہ خُداءِ حکمت ءَ

گوُاراَنت رگام بے مُد-ت ءَ

سبزیں بھار بَر نوبت ءَ

فانی بنت پہ مُھلَت ءَ

بیا اِت عریفین ھَمبلاں

جَزمان کہ یک روچے مِراں

رُوح چہ قفص ءَ بال کنت

اے قالب ءَ کئے سوال کنت

دُرست گُش اَنت کہ لاشَھے

دِیرئے کن اِت کہ سلھے

مَرگ ءَ کس ءَ نیست گلھے

بنداَنت کَنک ءَ کِلھے

غُسلان پہ تعظیمے دیئنت

مَعرم منی چار ءُ سے اَنت

من وت نزاناں کے کے اَنت

خیش ءُکس اَنت یا ذَنی اَنت

وھدے جنازہ دُرست بیت

مھپَل کبیھیں سُست بیت

تھت چہ داورءَ چِست بیت

چار مردمئے کنت کوپگ ءَ

ھلک ءِ نچار اَنت گریوگ ءَ

بَراَنت ئے پہ یک گرم ءُ جلے

داراَنت یہ سیہ ڈانی سرے

کاینت مُسلمان یک دَرپے

پہ مَیت ءَ بندانت سَرپے

پیر ے اگاں پیر ذالگے

گُوالے یاکہ شُوانگے

یاسَید ءِ اوبادگے

مال ئے سفیدیں جامگے

روت پہ مُقیمی خانگے

مُلا چار تَکبیر گُشیت

سَرپ بستگیں رندےَ پروشیت

بَراَنت ئے مان قبر ءِ لَب ءَ

سر دست ءئے زورانت مرحبا

ایرئے دیئنت گور ءِ تہ ءَ

ناداَنت ئے ماں ھندءِ بُن ءَ

دیم ءِ دئینت ماں قبلہ ءَ

سِگان دئینت ھندءِ رھ ءَ

پانیگ ئے بنت چو مونس ءَ

اُستا بمینیت ھاک ءُ گِل

بارئے دئینت پہ جان ءُ دل

واننت درود ءَ حُرمت ءَ

بخش اَنت پہ روح ء میت ءَ

آئیءِ سپارت پہ خُدا

وت بزانت وتی نیک ءُ بد ءَ

سے۳ روچ ءَ پُرز ءُ مجلس انت

دوستاں پہ زار ءُ بش بش اِنت

گم گوں پِت ءُ ماتاں بیت

تاوان ئے گوں براتاں بیت

سر روت ھماکہ زیان بیت

ذال ءِ خبر آسان بیت

ذال کہ مُقیمی کرگز ایت

چندے دگے روچ گوزایت

آچندان شموشکار بیت

بِیکاں مُشیت سیاھمار کنت

سر چادرے اَلبار کنت

سر کوپگاں سیمکار کنت

سر پنجگاں رنگ دار کنت

چم کنجل ءُ انوار کنت

بَچ ءُ جِنکان وار کنت

سوسن رواجے یار کنت

جُست چہ ھمک بازار کنت

ٹِل ملگے درکار کنت

درقد ءَ آجود سگے

ذالءِ دل ءَ شیر ملگے

قوم ءِ دل ءَ بد مردگے

آمُرتگ ءُ اے زندگے

فاضل مکن گمراھی ءَ

گال ءُ شَکر گفتاری ءَ

گِپتگ ترارا واری ءَ

انچو ملک دیناریءَ

 

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*