تازہ ترین
ur
بنیادی صفحہ » نوشتانک » نوکیں لئیب و کہنیں یات…..شبیر رخشانیؔ

نوکیں لئیب و کہنیں یات…..شبیر رخشانیؔ

کرکٹ ءِ لئیب برجاہ ات۔ مہلوک چپ و چاگردءَ نشتگ ات لئیب ءِ ندارگ کنگ ئَ ات۔ کمنٹیٹر گوں وتی ترند و تیزیں توارءَ ”چوک“ا او چھکہانی جارءَ جنگ ءَ ات۔ یازدہ مردم تچ و تاگ کنگ ئَ اتنت۔۔ دو مردم گوں وتی داراں بول ئَ را کرو گورءَ تر و تاب کنائینگ ئَ اتنت۔

پیریں مردءِ ہم یک کرا نشتگ ات و ہمے لئیب ء چارگ ات۔ اے تیوگیں چاروکانی تہا اے یکیں پیر مرد ات کہ کرکٹ ئِ لئیب ءَ چارگ ات۔ بلئے پیریں مرد زانگ ءَ نہ ات کہ چے بوہگ ئَ اِنت۔پرچہ کہ اے میتگ ءَ اولی بہرءَ اے لئیب برجم دارگ بوتگ ات۔

پیریں مردءَ وتی کرّءِ نندوکیں بچک ءَ را جست کت۔ اے کجام گْوازی اِنت؟

”ناکو ایشرا گُشنت کرکٹ۔۔۔ اے باز جوانیں لئیبے۔۔ ناکو تو زان ئے اے کرکٹ انگریزانی گْوازی انت۔ مئے واستہ بلاہیں ہبر ے کہ ما انگریزانی لئیب ءَ گْوازی کنگ ئَ ایں“۔

پیریں مرد پگرےءِ تہا کپت۔

پیریں مردءَ را وتی دؤر یات آہگ ءَ لگ ات۔

حیال ئےِکُت کہ مئے دؤرءَیک گْوازی یے بوتگ کہ آرا ”چوک“ گشگ بوتگ۔۔ ”چوک“ ہما گْوازی بوتگ کہ مہلوک یک دْرچکے ئِ سیاہگ ءَ نشتہ چل کڈ جتہ یک دارے میان ءَ مکّ کتگ و گوں چار سنگتاں لئیب کتہ۔من گشتہ ’’ ہؤ ڈے ہشت بو‘‘ سنگتاں گشتہ۔” ناکو چارکی تو کدیں کائے‘‘ چون وش بوتہ ہما دْرچک ئِ ساہگ ءَ نندگ و لئیب ءِ برجاہ دارگ۔۔ ناکوءَ را وہد یات آہگ ءَ ات۔

پدا حیال ئےِ ’’”اٹی“ ءِ‘‘ لئیب ءِ نیمگ ءَ شت۔۔ وہدے کہ بیگاہ بوت آ گوں سنگتاں ”اٹی“ ئِ گْوازی ءَ پہ دراتک انت۔ اے گْوازی ءِ سرا نہ کہ زرئےِہرچ بوت۔و نہ کہ بلاہیں جاہے لوٹ ات۔ بس گوں چار سنگتاں اے گْوازی برجاہ دارگ بوت۔ دو مردم گوں وتی لٹاں اوشتاتگ ات و یکّےءَ ”اٹی“ ءَ را برز چگل دات۔ اگاں داراں گوں ”اٹی“ ءِ ٹکر وارت گڑا بزاں کہ مردم ءَ سُہت۔و گڑاں بلاہیں کوکار ے بوت کہ سُہت۔

ناکوءَرا’’ پولائی‘‘ ءِ لئیب ہم یات اہت۔ کہ یک بلاہیں کڈّے جنگ بوت و ہفت مردماناں لٹ دست ءَات پیش ءَ چہ جوڑ بوتگیں کسانیں بول یےہمے لٹانی گوما ہما کنڈ ءِ نیمگ برگ بوتگ و کنڈءِ دیمپاں آ پولائی ءَدُور چگل دنت و۔۔۔ناکوءَ را یات آہگ ءَ اتنت و آ بس کندگ ات۔

ناکو اے حیالاں چہ درنہ یتکگ ات کہ آئی ءَ ’’ جی‘‘ ءِ لئیب یات اہت کہ مہتاپانی شپاں کوچگ ءِ بست ءِ تہا گوں سنگتاں جی کنگ ءَ شت۔ آجاہءَ آہاں تاں شپ ءِوہدے جی کرت۔ وتی پہلوانی پیش داشت۔

ناکوءَ را وتی پیشیم ءِ پتاہی اے لئیب ہم یات اہت۔ ہمے ساہت ءَ لئیب ءِ کمنٹری ہم ہلاس بوتگ ات۔۔ ناکو چہ وتی یاتاں دراتکگ ات و وتی دل ءِ تہا جیڑان و لوگ ءَ رواں بوت۔

 

دِلگوش: ” چوک“ ءِ لئیب ءَ بازیں ہند و دمگاں”ہشتی“ یا ” ہشتاں چوکی“ ہم گُشنت۔(ادارہ)

٭٭٭

 

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*