تازہ ترین
ur
بنیادی صفحہ » نوشتانک » کِسّہ یلہ چربنت…..اصغر زہیرؔ

کِسّہ یلہ چربنت…..اصغر زہیرؔ

”تپاکیءِ سکین“ ءِ نامءَ اے کسہ ،کتاب ءِ” کسہ رنگ“ءِ بنداتی کسہ اِنت کہ من مدام چہ وتی پتءِ زبانءَ اش کتگ۔ منی پتءَ زندگیءَ اسکولءِ پشت اوں نہ دیستگ

وہدے اے کسہ من باسک ڈاٹ کامءَ ایرکت، گڑا بازیں دوست ودوزاہاں منی سرا دزی ءِ بہتام جت و گشت کہ اے مرد نوں شر کُٹّ اِتگ کہ سرئِے پہ دزیءَ درآؤرتگ،اے کسہ اسکولءِ سیمی جماعتءِ اردو کورسءِ کتابءَ مان اِنت۔بلئے من اے گشگ لوٹاں کہ کورسءِ کتابءَ ہم نبشتہ کارءِنام نبشتہ نہ اِنت،اے گپءِ گواہی ءَ کئے دات کنت کہ آئیءَ نہ دُزّ اِتگ؟ ۔ من اے گپءَ گوں ایمان داری گشگءَآں کہ وہدے من ایشیءِ نبشتہ کنگءَ بوتگ آں، تہ اسکولءِ کورسءِ کتاب منی ذہن ءَ نہ بوتگ ،بلکن منی حیالءَ چہ پتءِ زبانءَ اش کتگیں کسہ ءِ پدگوانک یک یک ءَ آہان بوتگ انت و من گیدی کسہی تکنیکءَ نبشتہ کنگءِ جہد کتگ۔

دُزیءِ بہتامءَ پد، من اے کسہءَ را چہ وتی تاکدیماں کور کت کہ چو مہ بیت لبزانکی تھانہ دارے منی جندءَ زندانی بہ کنت و چُکّ بزّگ بہ بنت۔

یک روچے من چہ ریختہ آرگنائزیشنءَ انتظار حسینءِ یک انٹرویویے چارگءَ اتاں ۔آئیءَ اوں انچیں گپ یے جت کہ منی آزمانک ”نرناری“ءِ سرا منءَدُزّی ءِ بہتام اش جتگ کہ اے چہ ٹامس مانءِ کسہءَ زورگ بوتگ، ہمے آزمانک من بنگلورءَ ونت تہ اودءَاوں منی سرا ایراد گرگ بوت کہ اے کسہءِ سراگریس کرنارڈءَ کسمانک یے نبشتہ کتگ۔

آئیءِ گشگ اِنت :”من مردمانءَ گشتگ کہ اے دومی رند اِنت منی سرا دزی ءِ بہتام جنگ بوہگءَ اِنت۔اسل ءَ من،ٹامس و کرنارڈ سئے ئیں دُزّ ایں پرچاکہ اے کسہ چہ بے تال پچیسیءَ (گیدی کسہ) اتکگ ، من چہ ہمائیءَ سان زرتگ“۔

(انوں گْوارچی نگدکارےءَ ماں فیس بُکءَ منی آزمانکانی اولی کتابءِ پشتی تاکءِ عکسءِ چیرءِ نبشتگیں اے دانک”نبشتہ کار چاگردءِ ایکسرا مین اِنت،ڈاکٹر نہ انت،آ ایوکءَ چاگردءِ اندامءِ سل کاریانی ایکسراءَ کشیت و نادْراہیءَ شونائیت،علاج ڈاکٹرءِ کار انت“گوں مزن نامیں آزمانکار سعادت حسن منٹوءِ اے دانکانی دُزی گشتگ انت ”منی کار بس ایش انت من چاگردءِدرتگیں پوشاکاں پیش داراں،آیاں نہ دوچاں،دوچگءِ زمہ واری درزی ئیگ اِنت“شر وَ ہمیش ات کہ اے دانکانی اردو من ءَ دست بہ کپتیں،تہ من ادءَ ایر کتگ ات،اے گْوارچی نگدکارءِ وتی رجانک کتگین ئِے۔

آئیءَ گوں دپءِ ٹہلءَ منارا نبشتہ کاریءِ کالبءَ چہ درکتگ و دُزّے قرار داتگ۔

من انتظار حسینءِ گپءِ ہم رِدءَ،آئیءَ ہمے پسو دئیگ لوٹاں کہ اسلءَ من ومنٹو ہردو چاگردی دُزّ آں۔پرچاکہ منی و منٹوءِ چاگردءَ سِل کاری یک حسابءَ بوہگءَ انت وما ہردو چاگردءِ مِیس زرتگیں دیوال ایں۔سِل کاری کہ یک حسابءَ انت گڑا حیالانی ڈیکّ ورگ اوں المی انت۔

چوش کہ منٹوءِ حیال و آزمانک گوں موپساںءَ ڈیک ورنت،گڑا منٹو بزاں موپساںءِ دُز انت،منٹوءَ کالی شلوارءِ نامءَ آزمانکے نبشتہ کتگ و فرحانہ صادقءَ اُلٹی شلوار نبشتہ کتگ۔بنداتءَ مردماں اے اوں دزّی گشتگ،بلئے فرحانہءَ گشتگ کہ من اُلٹی شلوارءِ نبشتہ کنگءَ پیسر کالی شلوار نہ ونتگ۔من،منٹو، موپساںو فرحانہ۔۔۔۔۔۔۔ما دْراہ دُز ایں۔

چے،منٹوءَ اے نہ زانتگ ات کہ ہرچی موپساںءَ نبشتہ کتگ،اگںْ من نبشتہ بہ کناں منی سرا لنکک چست بیت؟

چے،فرحانہءَ اے نہ جیڑاِتگ کہ اگں من اُلٹی شلوارءَ نبشتہ بہ کناں داں من ءَ منٹوءِ دُزّ گشگ بیت؟

گپ ایش انت کہ اے آئیءَ پہ زانت نہ کتگ،بلکن ناگہی بوتگ۔آ چوں پہ زانت دزی کنت،آ اوں پدا منٹوءَ؟آ چوں وتارا نام و دپ کنتو وتی لبزانکی سفرءَ پولنگ کنت؟

من اگں منٹوءِ اے دانک بہ ونتین اَنت گڑا چوں وتی دانک نبشتہ کتگ اتنت؟من اینچو نہ زانتگ ات کہ ایشیءَ یک روچے الم درگیج اَنت۔من اینچو نہ زانتگ ات کہ منی دزّی روچے ناں روچے الم گرگ بیت؟

من دستء وت وتی لبزانکی زندءَ چوں گٹّ کنگ لوٹاں کہ ایشیءَ رودینگ وساٹگءَ من چونیں مشکلاں گوں دُچار بوتگ آں؟۔

من پدا انتظار حسینءِ گپءَ دیما براں کہ آئیءَ دیمترا گشت :”کسہ چو شاعریءَ نہ اِنت کہ وتی زمینءِ سرا اِنت،بلکن کسہ یلہ چر بنت،یک دودمانےءَ چہ دومی دودمانءَ سفر کننت“۔

چشیں کسہ یونیورسل گشگ بنت کہ جتا جتائیں ہندو دمگاں دگہ دگہ رنگ و دْروشماں است وساڑی اَنت۔

انتظار حسینءِ ہمے دانکاں گوں، من پدا وتی لانک مان جت ودیم پہ باسک ڈاٹ کامءَ شتور گپتاں،کسہ درگیتک،دو وار نبشتہ کت۔وتی سنگتےءِ سرا روان دات کہ نام ئِے احمدکریم اِنت،آزمانک نبشتہ کنت۔توار پِر جت کہ ہمے سیمی جماعت ءِ کورسءِ کتابءَ درگیج و منی سرا راہ بہ دئے ،باریں چاران ئِے اودءَ چوں نبشتہ اِنت۔ بلئے آئیءَ گشت کہ کورسءِ کتاب نوں مٹّ بوتگ اَنت ۔آ کہنیں دست نہ کپگءَ اَنت۔

یکروچے آئیءَ منی واٹس ایپ ءَ ویڈیوے راہ دات۔ ویڈیو انگلش کارٹون یے  ات۔ پت دہکان کارےو آئیءِ سے چُک اَنت۔ unity is strength نام اِنت ئےِ۔

پنچ منٹ ءِویڈیوءِ چارگءَ پد من پہ گوگلءَ وتی دْرک بست اَنت۔ ہمے نام نبشتہ کت کہ اودءَ ہمے نام ءِ دگہ کسہے دست کپت۔پت دہکانے نہ اِنت،پیریں نادْراہے ،چُک سے نہ انت،چار اَنت۔نبشتہ کارءِ نام نیست انت۔ من ہمے کسہءِ وانگءَ اتاں راہ دات۔The bundle of stick کہ احمدءَ دگہ ویڈیو کارٹون یے

اے ویڈیوءَ کسہءِ نام زبان و انگریزی انت،چُک چار اَنت،پتءِ نام رامو اِنت۔انگریزانی تہا رامونامءِ جند نیست۔رامو پہکیں ہندوستانی نام ایت۔دگہ یک ویڈیو یے کہ اردو زبانءَ انت،ہمے کسہءِ نام”چھڑیوں کا گُچھہ“ اِنت۔ادءَ پتءِ سے چُک اَنت کہ مدام وت ماں وتءَ سرو پُٹ اَنت۔دگہ یک اردو ویڈیویے ءَ کسہءِ نام ”اتفاق میں برکت ہے“پت دہکانےوچُک ئِے سے اَنت۔پت سک نادْراہ بیت۔۔۔۔۔

دْرستاں چہ مستریں بہمانگیءِ گپ ایش اِنت کہ اردوءِ مزن نامیں شاعرو نبشتہ کار ابنِ انشاءَ”اردو کی آخری کتاب“ءَ ہمے کسہ کمے ردوبدل کنانءَ گوں یک مالداریں پت وپنچ چُکءَ نبشتہ کتگ۔

منی ”تپاکی ءِ سکین“ نبشتہ کنگءِ کساس سال و کپےءَ پد ہمے کسہءِ سرا عارف لالؔءِ لُکیں تامر”یک مُشت“ شنگ بوت۔

نوں شما وت اے گپءَ بہ گشین اِت کہ دُزّ کئے اِنت؟

اے دْرستیں گپانی مول ایش اِنت کہ بازیں انچیں کسہ است اَنت کہ آ کُل میراث اَنت۔ تو نزانئے کئے نبشتہ کتگ و بندرءَ چہ کجا اتکگ انت۔چشیں کسہ گیشتریونانی کسہ گش ایسُپ ءِ نامءَ گوں بندوک اَنت۔علی گوہرءَ ”بالیں گلمت“ءِ نامءَایسپءِ کسہ رجانک کتگ اَنت۔ڈاکٹر بیزن بلوچءَ اوں ”پنت کسہ“ءِنامءَ جوانیں کارے کتگ ۔ بلئے کس اے گپءَ گوں سدّکی جت نہ کنت کہ ایسُپءِسجہیں کسہ وتی جندئیگ اَنت یاکہ چہ دگہ دگہ جاہاں زرتگ انت ئِےِ،یاکہ پنت کسہ سجہیں کسہ بہ بنت۔

گپ ایش اِنت کہ بے منانک وبے پٹ وپول ءَ یکےءَ را دُزّ گشگ زیبیں کارے نہ انت و نیکہ لبزانکی رِپکے۔و نیکہ حیالءِ ہمدپی ءَ دزّی گشگ بیت۔

وہدے کہ سجہیں چاگرداں ناتپاکی،دزّی،ڈنگی،کشت و کشار،نشہ ،زاہ و بد،سکس و دگہ جیڑہ یک حسابءَ است انت گڑا حیالءِ لیکہءِ ڈیکّ ورگ اوں المی اِنت۔

تووتارا انچو جہل جتگ و نفسیاتی ناتبیءِآماچ کتگ۔ وتی گوستانکی شہار انچو لُک و تنک کتگ کہ تو ہمک جیڑہءَ گوں اردوءَ برئےو ڈک دئے۔تو چِہ پیم اردو دودمانءِ دیما بلوچ دودمانءَ دُزّ گشئے یاکہ جہل جنئے؟؟؟؟

چو بازیں کسہاں،بازیں توہمات اوں بلوچءِ وتی نہ انت،بلکن چہ ڈنءَ اتکگ اَنت،چوش کہ ”سیاہیں پشیءِ دیما کپگ و سفرءِ

حرا ب بوہگ“،اے نہ بلوچ ئیگ انت ونیکہ ہندوانی اِنت،بلکن اے انسانءَ چہ بنیادءَ گون اِنت،چہ ہموداکہ توہمات ءِ جند بندات بوہگءَ بنا بوتگ انت،چہ ہموداکہ مذہبانی سفر بندات بوتگ اَنت(مذہبانی بنداتءَ توہم پرستیءِ مزنیں دست ئِے مان اِنت)،چہ ہمودا کہ ابرمی تاکتانی پرستش و پوجا بنا بوتگ انت،چہ ہمودا کہ دیوتاوحُدائیءِ لیکہ بنا بوتگ انت۔ گڑا پرچا بلوچ اے شرک و پالاں زورگءَانت،گڑا پرچا بلوچءَ را دُز ّگشگ نہ بیت؟اے ہما زمانگءِ گپ اِنت کہ انسانءَ حراب کاریانی سبب نہ زانتگ اَنت و جانورانی روئشت و چلشت آں سرپد نہ بوتگ اَنت،گڑا آہاں ہمے حراب کاریانی سببانءَ بہانگ جوڑ کتگ۔

بوت کنت ہمے دانک و ہمے کسہ دگہ جاہے گوں دگہ لبزو دْروشماں بہ بنت،بلئے حیال و مجگ یک ّاَنت۔

انسان چہ کرن و زمانگاں یکے دومیءَرا گیگان کنان و پیداک اِنت۔پہ گپ گیشینگءَ انگہ دگہ درور اوں سکّ باز اِنت،بلئے من وتی نبشتانکءَ چہ ہمدا کوتاہ کناں۔

٭٭٭

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*