تازہ ترین
ur
بنیادی صفحہ » شونگال » بلوچی تامُر و بلوچی

بلوچی تامُر و بلوچی

دُنیا ءِ ہمکروچی بدلی و چِست و ایرانی ہواری ءَ جهان روچ په روچ دیما روان اِنت۔ زانت کارو سائینس زانت گوں نوک نوکیں چیزانی جوڑ کنگءَ  دزگٹّ اَنت  بلئے بزگیں بلوچ گوں وتی زِندمان ءِ جیڑہاں مان گیشّ اتگ  ءُ ہمے جیڑہ بلوچ ءِ رہسراں چو دِیوال ءَ مِکّ اَنت۔سیاست ءِ پِڑ بہ بیت یا لبزانک ءِ…..لبزانک ءِ پِڑ ءَ ہر یکّے وتی وس و واک ءَ جُہدے کنگ ءَ اِنت و گامے گامے دیما جُنزان اِنت۔مرچی بازیں تاک و تاکبند چاپ و شِنگ بُوہگ ءَ اَنت، لبزانکی دیوان  ومراگش وہد وہد ءِ سرا بُوہگ ءَ اَنت، شاعر و آزمانکارانی وانگی چاپ و شِنگ بُوہگ ءَ اَنت بلئے اے کُلّیں کارانی ڈُبّہ نبشتہ کار و شاعر ءَ وتی کوپگاں زُرتگ بِزاں نبشتہ ہم وت کننت و پدا وتی کتاباں ہم وت چاپ و شِنگ کننت اگاں لہتے ادارہ است اَنت تہ آ چہ وتی جیڑہاں گیش نہ بنت۔

ہمےحساب ءَ لہتے وہد اِنت کہ بلوچی تامُرجوڑ بُوہگ ءَ اَنت۔ یک شرّیں تامُر ے وتی راج  و ڈیھءِ زبان، پوشاک و د’ود و ربیدگ ءِ درانگازی ءَ کنت دُنیا ءِ بازیں مُلکانی معیشیت گوں آہانی تامُراں ہم گْرنچ اِنت۔بلئے بیا کہ بلوچی ءِ کہ ہمے تامُر جوڑ بوہگ ءَ اَنت اِشانی حال اوں چو ہمے بلوچی وانگی و کتابانی وڑا اِنت۔بِزاں وت نبشتہ بکن ، جوڑ بکن  وت شِنگ و تالان بکن۔ بازیں زُبان دوستے اے پِڑ ءَ کار ءَ اِنت و اے کسانیں وہد ءَ اِشاں بلوچی ءِ راجدپتر ءَ لہتے انچیں تامُر جوڑ کُتگ و داتگ کہ آہانی کِّسہ و نشان داں کرناں برجاہ ماننت۔ گُشنت کہ اُشتر وتی بار ءَ وت بارت بلئے واجہءِ جی و جان ءَ لُوٹیت۔چہ اِدارہانی نیمگ ءَ (اگاں چندے است) راج ءَ وتی دِل وَ شُشتگ بلئے بائد اِنت کہ بلوچ راج اے رِد ءَ دیما بئیت و ہما کہ اے پِڑ ءَ کار ءَ اَنت آہانی دِلبڈّی ءَ بکن اَنت یا ہما ٹولی کہ اے پِڑ ءَ کار ءَ اَنت ہٗور بہ بنت و وت ماں وتی شؤر و سلاہ ءَ پد یک دائمی ادارہے جوڑ بکن اَنت کہ ہرچ تامُرے جوڑ بیت آئی ءِ کِسّہ و اے دگہ کارچارو تپّاس کنگ بہ بنت و انچوگوں وتی وس و واک ءَ جُہد و کوشست بکن انت گوں راج ءِِ کُمک ءَ یک انچیں فنڈے جوڑ بکن اَنت کہ ہمے تامُرانی ہرچ و درچ ءَ کُمک بکنت تانکہ دیمترءَ انچیں جْوانیں تامُر جٗوڑ کنگ بہ بنت۔

 

وشّ اِنت پہ وشّیں روچانی باندات ءَ

 

شونکار

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*