تازہ ترین
ur
بنیادی صفحہ » آزمانک » زِندءِ بے ساہگی گْران اِنت…..امجد قرارؔ

زِندءِ بے ساہگی گْران اِنت…..امجد قرارؔ

’’مردم گُشنت من گنوکے آں۔ منی گْورا نہ نندنت۔ نہ من ءَ وتی کرو کش ئَ نندگ ئَ  کِلّنت۔ کس منی گلاس ئِ توک ئَ آپ نہ وارت ۔ سردوئِ ہوٹل ئَ منی پیالہ ہم جتا اِنت کہ آئی ئِ توک ءَ آبرے برے سراتکگیں چائی تاکاں ٹلائیت و بازار ئِ یلہ چریں کُچک منی پیالہ ئِ سرا دہمال کننت۔ بلے من ءَ بدنئیت۔ گُڑا سر دوئَ منی سر چیا پروشت؟ گُشیت’’تو کمب ئِ آپ دَزگُل کُتگ اَنت۔آئندگ ئَ ہوٹل ئِ ساہگ ئَ ترا مگنداں‘‘۔من ءَ نہ توریت، بلے سرئِ ٹپ شپ ئِ سردی ئَ سک درد کنت۔ ڈاکٹر غنی من ءَ ہسپتال ئِ پُترگ ءَ نیلئیت۔ اقبال ہشک ئَ گولی نہ دنت اللہ  وت وش کنت۔ اللہ! بادشاہے ۔ اللہ منی دُْراہیں بیراں گیپت۔ سردوئِ سرا بلاہیں تَشّے جنت آئی ئِ سرنوک بیت۔ بازارئِ دُْراہیں مردماں منی بیراں گیپت۔ کچکّاں اوں…………

بلے! مردم چیا گُشنت من گنوکے آں؟ من زاناں سرپد باں۔ ہبر کُت کناں بچارمن زاناں منی نام اللہ بشک اِنت میر اللہ بشک بلوچ۔ منی مات ئِ نام ماہکان اِنت۔ پت ئِ نام………………پت ئِ نام؟ پت ئِ نام شمشتہ۔ سکیداد، اناّں سکیداد ماہکان ئِ مرد اِنت منی پت نہ اِنت۔ آنودوئِ پت اِنت۔ آپہ نودوئَ گُد کاریت چہ دبی ئَ لوشن راہ دنت، گھڑیال راہ دنت پمن ہچ راہ نہ دنت۔ ہچ نیاریت آمن ءَ بندیت آ منی پت نہ اِنت۔آ……آ……آ پولوس یے۔ پولوس کسی پت نہ بنت۔ ماہکان مُرتہ۔ من ماہکان ئِ قبر ئَ زاناں ۔ من گرانازؔ ئَ اوں پجّہ کاراں۔ بے چارگیں گراناز من ءَ گندیت گریت بلکن آئی ئِ سر اوں سردوئَ پْروشتگ۔ سردو! ترا منی واجہ مئے جُستاں کنت دوست پدا تو اوں گریوئے۔ ڈاکٹر غنی تئی علاج ئَ کُت نہ کنت۔ من اوں ترا تائید نہ دیاں۔ بلّ   مرئے۔

انگہ مردم گُشنت الّو گنوک اِنت۔ گنوک سارتو اِنت بچار  سرا ٹالے مید پرِنیست ۔ بلاہیں لاپے ئِ واجہ اِنت۔ من آروچی دیست آئی ئَ گراناز تہت ئِ سرا دؤر دات۔ گرانازئَ گُشت ’’الّو چارگ ءَ اِنت‘‘ گُشیت ’’پرواہ نیست الّو گنوکے‘‘ ۔ دل ئَ گُشت گٹ ّئِ بگر بِلّے کنس بیت۔ پدا سارتو ئَ گراناز ئِ پندول ئَ سدی یے مان کُت۔ سارتو! تو گراناز ئَ سدی دئے من ءَ پنچی یے نہ دئے۔ ترا اوں منی سنگت کو ر کنت پدا منی  کِرّئَ میا من تئی گپ ئَ گو ش نہ داراں۔

منا گیراِنت اسکول ئِ وانگ۔ من ءَ سبق یات نہ اَت۔ ماسٹر دوزہمد ئَ منءَ سک جَت۔ اللہ ئَ گپت نہ گپت ۔ ہاں باریں آرتی پتکینک اِنت کہ نائی پتکینک اَنت؟

ہما روچی گراناز ئَ من ءَ گُشت ’’الّو بے چارگ! اے دنیا دودلاں یکجا بوہگ ئَ نئیلیت۔ تئی اے ۓحال ئِ زمہ وار مناں و دُنیا اِنت‘‘۔ من نزانت چی گوشگ ءَ اِنت بلئے مرچی من زاناں کہ دُنیا چیا گُشنت۔ دنیا………… گنوک ئَ گُشنت۔ اللہ منی بیراں گیپت یک یک ّئَ ۔ گراناز تئی اوں باریگ کیت بلئے…………

بلے مرچی سُہب نہ بیت۔ شد ئَ من ءَکُشت سردرد ئَ اِنت۔ روچے درکئیت الم رژنا بیت۔ سر دوؔ گندئے من ءَ نان و چاہے بدنت۔ آئی ئِ تماشااِنت۔ منی سنگت آئی ئِ سراگڑا تَشّ نہ جنت۔

کچک چانگگ ءَ اِنت

کروس بانگ ءَ اِنت

سُہب نزیک اِنت انچو روچ درکئیت من دْرک باں رواں سردوئِ ہوٹل ئَ ۔ بلئے من کمب ئَ کار نہ داراں۔ سر دو گنوکے پدا گلاس ئَ منی سرئِ توکا جنت۔ سردیں آپ چوں وشّ اِنت۔

حَرئِ سرّگ ئِ تواراَنت۔ کدیگین اِنت روچ در نئیت۔ چُشیں تہاریں شپ؟ مرچی روچ بے حیال اِنت یا واب کپتہ۔ مردمانی اوں چڑّکہ اِنت۔ گُڑا پرچا ہچ میم نہ بیت۔ چماّں پچ کناں بند کناں معنا یک۔ تہاری کمتر نہ بیت۔ روچ! زوت درا‘‘۔

سنگت! روچ ئَ زوت راہ دئے کہ دُنیا سکّ تہار اِنت۔ کوراسی اِنت تامور اِنت دست پہ دست ئَ میم نہ بیت۔ من اوں سک شدیگاں ۔ سراوں سک درد کنگ ءَ اِنت۔ تہاری کمتر نہ بیت۔

روچ! درآ………….

٭٭٭

 

 

 

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*