تازہ ترین
ur
بنیادی صفحہ » آزمانک » پَندل…..رفیق چاکرؔ

پَندل…..رفیق چاکرؔ

زمستانی سرشپےاَت مُرگ ومور دُْراہ وتی کُدوو ہونڈانی تہا وش واب اِتنت۔روبا ہم پہ وتی رسکءِ شوہازءَ بُندر پہ بُندرو کلگ پہ کلگ اَت ۔جاگہے گیابانے ءِتہا کپتگیں ہڑو ہوڑےو جاگہے چہ مردمانی دپاراں چہ پشت کپتگیں گزلے گوشت آئی دپءَ تَر اِت ۔یک بیلے پہ وشی ویک بیلے گوں گُژنیں لاپءَ آئی گوازینتگ ات۔ جاگہے آئی  ءِدست رستگ اَت گُڑا آئی پہ مرگانی دُزی و کبسانی دپءِ پروشگءَ چہ ہم ہچ چَکّ و پد نہ بوتگ اَت ۔جاگہے پہ چیزےءِ شوہازءَ کَمکَانی دپءَ چہ آ ، رکّ اتگ ات و باز براں چہ دور جنوکیں گُرکیانی تیراں چہ آ زدگ ہم بوتگ اَت بلے چے بکنت لاپ شوہاز کنگی اَت ۔گرماگی شپاں و آئی لاپءِ شوہاز کنگ کمے پہ آئی واستہ جنجالے بوتگ اَت بلے پہ آئی جندءَ گَردو تَرّ کمے پہ گیگ اَت۔گرماگی شپاں مردم کہ مدام وتی لوگانی پیژگاہءَ وش واب بوتگ انت و گوں کروس و نکینکانی تراس دَیگءَ مردماں آئی پُشتءَ ہم تراس کُتگ و آئی دُمبءَ کپتگ انت ۔باز رنداں چہ آئی دپءَ کاڈو کژیں مرگ ہم ہلکءِ چوریگاں پچ گِپتگ اَنت بلے زمستانی شپاں َ آ مدام سوبمند بوتگ و وتی گِپتگیں شکار آئی چوریگانی دستءَ نہ داتگ۔یکے و اے بوتگ کہ زمستانی کَتریں شپاں مردم وتی گندلانی تہا انچو وش واب بوتگ اَنت کہ مُرگانی الگردو مردمانی گوشاں نہ کپتگ انت ، اگاں برے برے الگردو گیش بوتگ اَنت گُڑا مردماں چہ گندلانی تہا پاد آیگءَ جاپ داتگ گُڑا آ مدام سوب مند بوتگ و تاں وتی ہونڈءَ کروس و نکینکانی برگ پہ آئی وش بوتگ۔زمستانی شپاں آ مدام گوں سیریں لاپءَ گوں وتی گُلوواں و مدام کروس و نکینکانءَ کَپی چُنڈی کُتگ و دؤر داتگ کہ چہ آئی سیرءَ گیش بوتگ اَنت بلے گرماگی شپاں انچیں شپ بوتگ کہ آئی پہ گُژن گْوازینتگ۔آئی ءَ نوں ہر کسی کُرتگیں توجیل زانتگ اِتنت کہ چہ چِیر کُرتگیں کَمکانی دپءَ چے پیم وتی جندءَ رکّینگی اِنت وتہار ماہیں شپاں سُن داتگیں گُرکیءَ وتارا چہ پیم پہریز کنگی اِنت۔آئی ءَ دُْرسیں توجیل پہم  اِتگ انت ۔باز رنداں چو چوریگاں پہ آئی گُلوواں بیڑ بُرتگ ، آئی ءِ ہونڈ مانداشتگ اَنت بلئے پہ آئی ئَ ساز اِتگیں مردمانی دُْرسیں پندل بے سوب بُوتگ اَنت۔

 

٭٭٭

 

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*