تازہ ترین
ur
بنیادی صفحہ » آزمانک » ھمّل گنوک ءُ نابودے نہ اِنت…..زاھد کریم رئیسی

ھمّل گنوک ءُ نابودے نہ اِنت…..زاھد کریم رئیسی

چماھیں مں گونڈیں دکانُکے اڈل داتگ ھمّل ءُ من بلاھیں سنگتیں, روچے دو سَے رند دکان ءَ مہ کنت تاھیر نہ گیپت, برے برے مردمے پہ کلاگی نیّت ءَ گُش اَنت کہ ھمل تو بزاں زاھد ءِ سنگتی ءَ یل نہ دئے؟ گڑا پسّو دنت:

"داں پیمازی بُن ئےِ است من زاھد ءِ سنگتی ءَ یل نہ دے آں”- ھھھھ

پدا آئی گپّانی تہ ءَ تام مان اِنت, ھر گپّ ءَ بلاھیں کندگے پِر-

نادراھی سبب ءَ وھدے مردم آئی ھیبوار کن اَنت گڑا سک دلرنج بیت ءُ باز جیڑیت ءُ وت ءَ احساس کمتری توک ءَ دور دنت, میارے ھم پِر نیست, اے زمانگ ءِ مردم وت ءَ شرّنگ, سوھو (عقل مند) ءُ کاملیں انسان سرپد بنت ءُ ناتوامیں مردم آں کُنّت کن اَنت ءُ آھانی ھیباں آھانی دیم ءَ پدر کن اَنت ءُ احساس کمتری توک ءَ دور اِش دے اَنت-

چوناہ ءَ ھمل ءَ چیزے ھُدائی داتگیں ھیب است, آ ایش اَنت کہ آئی سر دراھیت ءُ چمّے ھم شر شر نہ اَنت, چیزاں شرّی سر ءَ درست کُت نہ کنت بلے پدا ھم وتی راہ ءِ درکپگ ءَ دگر ءِ مھتاج نہ اِنت, پادے ھم شر نہ اَنت کمو لنگ کنت, ھر انسان وش اِنت اللہ آئی کاملیں انسانے بہ کنت ءُ ھر ھیب ءَ چہ پاک بہ بیت, بلے اے وڑ ھجبر نہ اِنت, ھر شرّیں چیز ءِ تہ ءَ گونڈ ءُ مزنیں ھیبے الّم درکیت- لھتیں انسان سر تا پاداں کامل ءُ ڈولدار اِنت, بلے ھمل ءِ پیمیں ھُدائی ناتواماں ھیب وار کن اَنت ءُ آھاں احساس کمتری توک ءَ دور دے اَنت, گڑا اِد ءَ ھمے زانگ بیت کہ اے انسان ءِ بس ڈیل کامل اِنت بلے اگل ءُ زانت ءَ چہ کپتگ ءُ ھیبوار اِنت-

برے برے ھمل ءَ گنوک ھم گش اَنت, گڑا دل ءِ بار ءِ سُبک کنئگ ءَ دیم پہ منا کیت- من مدام گشتگ کہ ھمل اے وڑیں مردمانی گپّاں تُشے ھم دل ءَ میار, ھمے مردم کہ ترا گنوک گش اَنت ءُ ترا ھیبوار کن اَنت, بُن اسل اے مردمانی جند وت ناسرپد, گنوک ءُ ھیبوار اَنت, منی اے دلبڈی آں آئی دل پدا ڈڈ کتگ گوں ٹھکاں دکانے سرا زرتگ-

ھمل گوں وتی گپّاں باز رند منا ھیران کتگ, ھمے مردم کہ ھمل ءَ ھیب دے اَنت, ھمے ھیبوار ءُ نابودیں ھمل وھدے زگریں بلوچی ءَ گپ کنت من چٹ ھیران بہ آں, ھمے نوکیں گال کہ مئے دیم ءَ گوستگ اَنت ءُ چرآھاں ٹالے ٹالے مارا یات, من ھیران بوتگاں کہ اے گال ھمل ءَ چہ کجا در گپتگ ءُ یات کتگ اَنت؟

من کہ جست کتگ ھمل تو کتابے چیزے نہ وان ئے گڑا اے بلوچی نوکیں جوڑ بوتگیں گالاں چہ کجا درگیج ئے, گشیت:

"من یک دو رند چیزے اِش بہ کنا چوش کہ شیئرے, گانایے یا چشیں نوکیں گالے کہ من اِش نہ کتگ, قدرتی منا یات بنت, اے گال من گیشتر بلوچی تامرانی توک ءَ اِش کتگ اَنت”

مئے بلاھیں زانوگر ءُ ونندھاں چشیں زانت ءُ زانگے ھم نیست کہ رواج گِرگ ءِ ھاتر ءَ چو ھمل ئیگ ءَ بے مڑاہ اے گالاں کارمرز بہ کنیں-

منی نزّ ءَ اے پہ ھمل ءَ یک بلاھیں ٹیکی یے کہ ھُدا ءَ داتگ-….ترا سلام اِنت ھمل!

برے برے لھتیں شئیر ھم گشیت کہ منا ھیران کن اَنت!

 

مہ یا مہ یا کہ تئی آھگ ءَ نہ لوٹاں من

منارا روچ مہ سوچ ساھگ ءَ نہ لوٹاں من

 

من ھیراناں اے نابودیں ھمل شئیرانی ھترناکیں بنداں چونکائی گیپت؟ مردنی شئیر ءِ اے بند منی دل ءِ تہ ءَ انگت نکش اِنت-

یکروچے من گشت:” ھمل تو وتی سر مراں رند شوک شوک بہ بو وت ءَ ڈولدار ڈولدار بہ کن”

پسّو یے دات: "من ھما روچ ءَ ڈولدار بہ آں کہ منی کش ءَ منی وابانی بانُک بہ نندیت”-

ھر گپ ءَ ھمل ءِ ھازر جوابی منا سک دوست اِنت-

اے گپّانی دیم ءَ آرگ ءِ مول ءُ مراد ھمیش اَت کہ یک انسانے وھدے ھُدائی داتگیں ھیبانی دیمپان اِنت گڑا آئی جسمانی ھیباناں آئی دیم ءَ پدر کنگ بلاھیں بے اگلی اِت ءُ اِدا تئ انسانی ءِ کَچ ھم زانگ بیت کہ تئی تہ ءِ انسان تہ چینچُک ءَ آپ ءَ اِنت, ھجبر دومی ءَ چہ وت کمتر سرپد مہ بو, پرچا کہ اللہ پاک ءَ اگاں کسے جوڑ کتگ گڑا آئی تہ ءَ یک نہ یک ھیبے, ءُ یک نہ یک شرّی یے الّم مان کتگ-

پمشکا! مارا ھم لوٹ اِیت کہ ما ھمّل ءِ وڑیں ناتوامانی کِرّ ءَ وت ءَ ھام مردم ءِ دروشم ءَ پدر بکنیں, تاکہ آ چہ تو ءُ چہ وتی بوتن ءُ ڈولداریں زند ءَ چہ دلپروش مہ بیت-

 

,ھلاس,

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*