تازہ ترین
ur
بنیادی صفحہ » نوشتانک » آزمانک ءِ نکان…..اے۔آر۔شہزاد

آزمانک ءِ نکان…..اے۔آر۔شہزاد

آزمانک لبزانک ءِ یک انچیں تہرے کہ اشی ءَ وتی ہنڈال لبزانک ءِ ہر نیمگ ءَ شانک داتگنت و زندءِ ہرچیز ءَ سیراب کنان انت۔ آزمانک ءَ وتی تُنّ کشتگ و زند ءَ سیراب کتگ بلے آزمانک ءِ جندءِ تُن یا ہوشام انگت وتی تہا منتگ و برجاہ اِنت پمیشکہ آزمانک ہر نیم ہرکش و پہنات ءَ زند ءِ ہمراہ و ہمسفر انت۔ زند ءِ اِے سائنسی، ٹیکنالوجی و مشینی دؤر و عہد ءِ لوٹاں پورا کنان ءَ ہمگرنچ اِنت۔ پمیشکہ زند ءِ تمامیں تہل و جوریں راستی آن ءَ وتی تہا  نزّآرتگو بنی آدمءِ واہگداریں تب ءِ تاہیرءِ یک مزنیں سبب یے ایوک آزمانک بوت کت کنت، آزمانک ءِ وتی یک سمبہینتگیں چاگردے، آ وتی چاگرد ءِ تہا پُلّانی وشبو ہاں شنگ کنان اِنت۔ آزمانکءِ بندانی خیال یاسسّا کہ چہ آئی ءَ آزمانک نبشتہ کنگ ءِ جنزودی بیت آ بُن گپ گشگ بیت۔ آزمانک ءِ بندات انچیں شرّیں وڑے ءَ گوں کنگ بہ بیت کہ وانوک ءَ بندات ءَ بگرداں گُڈ سر ءَ وتی نیمگ ءَ ببارت و بہ کشّی۔ آزمانک ءِ ہلاسی ہم انچو کنگ بہ بیت انچوکہ بندات رنگ ءَ مارا وتی تہا جپت و اثرے دؤر داتگ اَت۔ ہمے پیم ءَ ہلاسی ہم مئے سر ءَ وتی اثرے دؤر بہ دنت۔ اگاں ہلاسی ءَ مئے سر ءَ ہچ وڑیں اثرے دؤر ندات تہ ماگُشیں کہ اے آزمانک ءَ وتا اینچک نہ مناّئنتگ و وتی بالاد _  بُرز نہ کتگ۔ لبزانی گچینو کارمرز کنگ، آزمانک ءِ بستارءِ تہاگیشی کنت۔ کدی کدی لبز آزمانک ءِ تہا وتی اسلیں بزانت ءَ مٹّ کننت، جملہ آنی دروشمو فقر ہانی ترتیب ءِ تہا نوکیں بزانت ءِ ودی کنگ آزمانک نویس ءِ کمال گُشگ بیت۔ آزمانک ءِ ہرلبز، ہرفقرہءِ بزانت یک شاہگانی یے داریت، آزمانک ءِ تہا لبز ءِ گچین و شرکار مرزی ءَ را یک مزنیں بستار و ارزشت یے اَست۔ یک لبزے سجوئیں آزمانک ءِ دروشم ءَ را بدل کنت و باز بر ءَ یک لبزے سجوئیں آزمانک ءِ بنیاد بیت، اگاں ہمے یکیں لبز ءَ در بہ کنئے تہ سجوئیں آزمانک ءِ بالاد نا توام درا کنت۔ آزمانک ءِ تہا حیرانگی ءِ موسم ہر وہد ءَ بہ مانیت۔ بے تاہیری تاں گڈّسرءَ  بہ مانیت،

آزمانک ءِ تکنیک ءِ باروا ما بُگشیں گڑا آزمانک ءِ جتائیں تکنیک انت، درشانی، چیدگی، یاخیالی تکنیک ءَ ہم ما آزمانک نبشتہ کُت کنیں۔ و کدی اے وڑ ہم بُوت کُت کنت کہ ہرچی مارا شعورءِ سکین بدنت بزاں ما شعور ءِ مطابق ءَ ہم آزمانک نبشتہ کُت کنیں۔ دگہ گوں وت گپ و رپءِ دروشمءَ اوں۔

چہ درستاں گران تریں آزمانک نویسی چیدگی آزمانک نویسی گشگ بیت۔ کہ اے یک سکّیں گرانیں اِزم یے۔ اے گڈ منجیں درشان وڑ ءِ (اسلوب) زورگ ءَ مزنین علم و تکنیکی زانت ءِ بوہگ الّمی اِنت۔ پدا راجی تہذیبانی، علاقہانی تاریخ، مذہب، بُزرگانی روایات، ہندی کسّہ و درستاناں گوں مزنیں زانت و سیادی یے بیگ لُوٹیت۔ سڑنی اے جوسلے ءِ گُشگءِ رِدءَ آزمانکءِ خاترا الّمی اِنت کہ آ پانزدہ یا بیست منٹءِ تہا وانگ و ہلاس کنگ بہ بیت۔ آزمانک ءِ پلاٹ سادگ و عام زانتی بہ بیت۔ پلاٹ انچو ترتیب دیگ بہ بیت کہ چہ زند ءَ پہک نزدیک تر بہ بیت۔ چہ نوکیں ازمی ترتیب ءَ آزمانک ءِ تہا نوکی ودی کنگ بیت۔ بلے انچیں ترتیب یے بہ بیت کہ آئی ءِ تہا راستی ءِ رنگ و دروشم سہرا بہ بیت۔ تانکہ وانوک ءِ دلچسپی برجاہ بہ بیت۔ کارست، شریں چاگرد نقطہ ءِ نظر، پلاٹ دُرست پہ آزمانک ءَ ازم ءِ یک مزنیں بستارے دارنت، بلے اشیءِ تہا چہ درساں شرتریں سبب اسلوب و تحریر اتت۔

………0………

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*