تازہ ترین
ur
بنیادی صفحہ » نوشتانک » عزت و مہرک ءِ مہر…..گہرام بلوچ۔ ناصر آباد

عزت و مہرک ءِ مہر…..گہرام بلوچ۔ ناصر آباد

عزّت و مہرک ءِ دوستی ءِ باروا ہرچی بُگشاں ہم کم گندگ ءَ کاینت ملّا عزت ءِ و مہرک ءِ مہر ءِ بن گیج بوہگ ءِ ماہ و سال شرّی ءِ سر ءَ زانگ نہ بنت بلے ما ہمے گُشیں کہ ملّا عزت و ملّا فاضل یکیں دور ءِ شاعر بوتگ انت۔

ملا عزت ماں بلوچستان مکران ءَ پنجگور ءِ یک شہر تسپ ءِ بوتگ و آ چہ ملّا زئی کُٹم ءَ بوتگ و آئی ءِ پت ءِ نام ولی محمد بوتگ۔ مہرک ءِ سرجمیں نام میر حاتون بوتگ۔ بلے پہ دوستی ءَ آئی ءَ مہرک ءِ نام ءَ مشہور بوتگ۔ آئی پت ءِ صوالُک بوتگ کہ بُندر ءَ اے نام صوال محمد اِنت آ ماں سرباز ءِ کسانیں میتگے کہ پیردان ءِ نندوک بوتگ۔ یک روچے بیت ملا فاضل، ملا عزت ءِ کرّا کیت و اِشی ءَ را حال دنت و مہرک توسیپ ءَ کنت۔ گوں فاضل ءِ ہمے توسیپ ءَ عزت چہ مہرک ءِ گندگ ءَ ساری پہ آئی ءِ سر ءَ شیدا بیت و گشیت کہ کدی من آئی ءَ بگنداں کہ فاضل انچو آئی ءِ توسیپ ءَ کنت۔ یک روچے عزت وتی بحت ءِ چکاسگ ءِ واستا پیردان رئوت گڈا آئی ءَ را یک و دو رند ءَ مہرک ءِ دیدار نصیب بیت۔ پدا عزت گُشیت کہ ہرچ توسیپ یے چہ من فاضل ءَ اِشکُتگ اَت منی دل ءَ مہرک دہ ہینچک شرتر اِنت و مہرک ہرچ وڑیں توسیپ ءِ لائق انت، گوں آئی ءِ گندگ ءَ عزت گیشتر شیدا و دیوانگ بیت و حبر و آرامے گپت نہ کت۔ ابید ءِ چہ مہرک ءِ توسیپ ءَ دگہ ہچ یے نہ گُشت گوں ہمے گندگ ءَ پد آ یک روچے مہرک ءِ پت ءَ نپرے پِر کت کہ من ءَ زامات بکن گڈا سالُک گوں عزت ءِ نپر ءَ گشیت کہ آئی ءِ زاماتی گوں وتی ناکو زتک ءَ بوتگ بلے عزت ءَ چشیں پسّہ ہچ اثر نہ کنت و آ قاصد ماں قاصد ءِ پشت ءَ دنت۔ نوں سالک و آئی ءِ سیاد و وارثاں یقین بیت انت کہ آ پہ مہرک ءِ سر ءَ فدا انت و مئے ہچ وڑیں عرض ءَ گوش نداریت بلے سالک ءَ و سالک ءِ سیاداناں ہماہانی بازار ءِ کماش پرمائیت کہ نوں دگے راہ نیست ابید مال ءِ ڈک جنگ ءَ شما آئی ءِ کرّا مال و زرّ ءِ و دگے بازیں چیزے لوٹ بکن اِت کہ آ دات اِش مکنت۔ بلے عزت پہ مہرک ءِ مہر ءِ دیم ءَ ہرچ آہانی دراہیں شرتاں قبول کنت چیزے زرّ و مال پہ نشانگ ہم دنت و زامات بیت آ دگے چیزانی آرگ ءِ مُہلت گیپت و دیم گوادر ءَ روانگ بیت آ دگے چیزانی تیاری ءَ کنت۔ یک روچے مہرک گوں وتی دزگہارانی ہمراہی ءَ پہ سر و گُد ءِ شودگ ءَ کور ءَ روت کہ چہ آ نیمگ ءَ یک کاروانے چہ باہو ءَ در کیت ماں پیردان ءَ آہگ ءَ بیت۔ اے وہدی مہرک گوں وتی دزگہاراں آپ ءِ توک ءَ گڈا آ نوں چاریت کہ دگے راہ نیست آپ ءِ توک ءَ نندیت و وتی سر ءَ چنڈیت کہ آئی ءِ مود شنگ بنت چہ مودانی دراجی ءَ آئی ءِ دْراہیں جسم یے چیر بیت ہمے کاروان ءِ مردم چ دور ءَ مہرک ءَ گند انت گشنت کہ آپ ءِ توک ءَ یک پری یے نشتگ بلے آ کہ آپ ءِ نزیک ءَ کاینت چارنت کہ پری ءِ جاگہ ءَ سیاہ مود ءَ ابید دگہ ہچی نیست۔ آ پیردان ءِ بازار ءَ سر بنت وتی ندارگ ءِ گپ ءَ کننت کہ ما چشیں چیزے دیستگ گڈا آ گشنت کہ دگے ہچی نہ بوتگ بلکیں پیردان ءِ کاڑ مہرک شما دیستگ دومی سہب ہمے کاروان ءِ سروک پہ مہرک ءِ چارگ ءَ روت وہدیکہ آ مہرک ءَ گندیت گڈا حیران بیت و وتی چماں سک دنت روک روک ءَ مہرک چاریت یے۔ بلے اے مرد ءِ روک روک ءِ چارگ پہ مہرک ءِ واستا نیکیں پالے نہ بیت و چہ ہمیشی ءِ پاد آہگ ءَ پد مہرک نادراہ بیت و سیمی روچ ہمے مہرک کہ زی پیردان ءِ کاڑ اَتو آزمان ءِ درپشوکیں استال اَت آئی ءِ رنگ و دانگ ءِ سر ءَ ہما عہد دْراہیں شاعر ایشی ءِ سر ءَ شیدا اتاں بلے آئی ءَ اے دو روچی دنیا یلہ دات و ابدی دنیا ءَ شُت۔باز مردم ءَ گشت کہ مہرک آئی ءِ جند ءِ برات گُٹ ءَ گپت و کُشت کہ آ پہ شررنگی ءَ سک نام کپیت و پہ آئی ءِ چارگ و چیزے پہ سانگ بندی ءِ واستا کنڈ کنڈ ءِ مردم کاینت اے کپ آئی ءِ برات وش نہ بیت چیزے مردم گُشیت کہ نظر ءِ گپ انچائیں بہانہ یے چہ وتی بنّامی ءِ ہاترا سازگ بوتگ۔ نوں بچار عزت کہ آ پہ مہرک ءِ مہر ءِ ہاترا مال و سامان ءِ درگیجگ ءَ واستا چہ گوادر ءَ در اتکاں دیم پہ پیردان ءَ آہگ ءَ بیت گڈا پیردان ءِ نزیک ءَ حالے دینت کہ مہرک ءَ اے دنیا یلہ داتگ بلے آئی ءَ را اِشی ءِ گپ باور نہ بیت۔ تا وت روت اود ءَ گندیت کہ چیرے دنیا ءَ شتگ ہمدا وتی یک شعرے پر بندیت:

ارمان پہ دُریں میر حاتون ءَ

بیشک من ءَ دوست خالق بیچون ءَ

گوں نہ کپتاں کہ بواناں یاسین ءَ

پہ ہزار ناز ءِ مشکلیں گین ءَ

چہ مہرک ءِ مرگ ءَ چے پد عزت ہم گنوک بیت و دیوانگی ءِ زند ءَ وتی دْراہیں عمر ءَ پہ مہرک ءِ توسیپ ءَ گوازینیت تاں ہما وہد ءَ کہ مِریت و کس نزانت کہ کجام ہند و دمگ ءَ مِریت آئی قبر ہم پہ نام ءَ نیست۔

٭٭٭٭

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*