تازہ ترین
ur
بنیادی صفحہ » شاعری » درد ڈُکّال اِنت…..سیّد ظہور شاہ ہاشمی

درد ڈُکّال اِنت…..سیّد ظہور شاہ ہاشمی

مال ھما انت کہ مال ءِ بُنمال انت

دل گھیں گوْرم ءُ ترانگ اومال اِنت

 

زاناں واھگ ماں دست ءِ بکال اِنت

کہ نپس گیریں درد ڈُکّال اِنت

 

پِر کپ ایت مھرءُ دوستی امرٗوزءَ

مرگ چہ وشی ءُ گل ءَ بال اِنت

 

بام ءِ استال ءُ سرشپ ءِ میشوار

بیلے وادارءُ بیلے زبّال اِنت

 

نانکہ مِستاگءُ نئے کہ پُونزّلگٗوش

بے اُمیتی ءِ ماسگ ءِ پال اِنت

 

رُمب اِتگ درْاج ءُ دور سریں کئورے

انگریں دیدگانی تھتال اِنت

 

پرچہ تُرساں چہ پُھل ءِ چکّاس ءَ

ھانلؔءِ مسکیں مھپرءِ ٹال اِنت

 

انگت رَھدربر اِنت راجانی

گوْشتگ اِش زانتکار ابدال اِنت

 

سِستگ انت بُلم ءُ گْوتکگ انت گُلمیھ

زاناں آزاتیءِ گُلیں سال اِنت

 

نُوری ءِ زُریات بے ساہ اِنت

دستاں مُرداریں مریم ءِ شال اِنت

 

کس پہ ھمسنگی ءَ نہ بارت باج

راستیں گالبند گُلگال اِنت

 

واجہ ءُ میر کپت اِنت بے راہ ءَ

بیا کہ بوشار واریں اٗوبال اِنت

 

پہ ھترمال پرْوشتگ مرگ سیّدؔ

چہ لگتمال ءَ رند لگتمال اِنت

٭

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*