تازہ ترین
ur
بنیادی صفحہ » شاعری » زِندمانی…..گُل محمد وفاؔ

زِندمانی…..گُل محمد وفاؔ

او زِندمانی !

او زِندمانی !

من واہگانی کتاب پہکیں

تئی دَرگہانی دراں کہ پول اِت

غمانی آماچیں حرف حرفءَ

اے زِردءِ چُنڈ چُنڈو کپّ کپّ ءَ

اے جان ءِ بند بندو ٹپّ ٹپ ّءَ

اے زِندءِ بیگاریں چپّ چپّءَ

ابیتکیں راہانی لپّ لپ ّءَ

قرار لوٹ اِت

ودار لوٹ اِت

بلئے بُگُش کہ

ابید تئیگ ءَ

پہ تہر تہریں حساب و داداں

مئے ہمسری چے ؟

کہ پہ مُرادیگیں وہدو پاساں

قرار لوٹیں ملار ودّ اَنت

ودار لوٹیں دوار لَڈّ اَنت

او زِندمانی !

اے شپ ابیتکیں

گوں دراجیں پاساں

برے گُبارو برے تہار اِنت

چتو جلاں بنت ؟

پمے اُمیت ءَ

ہزار رندءَ

وت ءَ من بُن دات

کہ رُژنے مانیت و تو ودی بئے

بلئے نہ درْپش اِت

طلاہیں ماہے

ناں بام سوغاتیں سمبہاں بوت

بس ،

واہگانی کتاب درْپش اِت

ماں زِردءِ آدینک ءَ دِلبرین ءَ

ترا را گِنداں کہ

ہر دماں تو

شہار بندئے ماں آزمان ءَ

گُبار چَنڈئے ماں اے جہان ءَ

میار گْوندین ئے استمان ءَ

چو بْراہ ءَ بانداتیں زِندگی ءِ

او زِندمانی !

او زِندمانی !

 

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*