تازہ ترین
ur
بنیادی صفحہ » نوشتانک » نمیرانیں شائر مُلّا قاسمؔ…..امیر حبیب بلوچؔ چُر بکی

نمیرانیں شائر مُلّا قاسمؔ…..امیر حبیب بلوچؔ چُر بکی

مُلّا قاسمؔ بلوچی شائری ءِ دومی دؤرءِ مزن نامیں شائرے زانگ بیت۔ مُلّا قاسم مزن نامیں و نامداریں شائر مُلّا پازُل ءِ کستریں بْرات بوتگ۔ مُلّا قاسم ءِ پت ءِ نام چاوَش ولد جنگیان ولد دلمراد ولد شاہُل ولد شاہی بوتگ۔ آ بلوچ ڈیھ ءِ دَمگ مندءِ قاسمی چات ءِ نندٗوک بوتگ۔مُلّا قاسم رندانی شیہوزَئی ٹک ءَ چہ تعلق داریت۔ وتی مستریں بْرات مُلا پازُل ءِ وڑا یک مزن نامو نامداریں شائرے بوتگ۔ مُلّا قاسم ءِ ودی بوہگ ءِ ماہو سال زانگ نہ بنت کہ آ کدی ودی بوتگ بلئے وتی مستریں بْرات مُلّا پازُل ءَ چہ سئے و چار سال کستر بوتگ۔ بلوچی ءِ لہتیں کوّاس و زانتکار گُشنت کہ ہما وہد ءَ یک ہارے اَتکگ کہ’’شدری ءِ ہار‘‘ گُشگ بیت۔ ہمے ہارءِ ہساب و کتاب ءِ رِدءَ مُلّا قاسم کساس1235 ہجری ءَ ودی بوتگ بلئے مُلّا قاسم ءِ ودی بوہگ ءِ سال و ماہ و روچ و آئیءِ مرگ ءِ سالروچ انگت ءَ سرجمی ءَ زانگ نہ بنت۔مُلّا قاسم ءِ شائریءِ گیشتریں بہر رندانی لَڈ و ریچ و بلوچانی وت ماں وتءِ ناتپاکی و جنگ و جدل ءِ بابت ءَ اے وڑا وتی شئیر ءِ تہا گُشیت۔

؎رند شہ ہلب پہ واراِتنت

دْرست زَہم جنو بٗور سواراِتنت

مُلاقاسم یک جاگہ یے پہلوان ءَ توار جنت و گُشیت:

؎شائراں منی گالاں بہ سینگاراِت

مُلک پہ مُلک جْوانیں کِسّہاں بیاراِت

مُلا قاسم ءَ ہر وڑیں بُن گپانی سرہالانی سرا شئیر نبشتہ کُتگ۔ مُلا قاسم فارسی و عربی ءَ سَک باز بلد بوتگ۔ اے  انگت ءَ زانگ نہ بیت کہ آئی ءِ اُستاد کئے بوتگ و آئی ءَ کُجام مدرسہ و جاگہ ءَ فارسی و عربی دَربُرتگ۔ مُلا قاسم ءَ وتی شائری ءِ تہا چاگردی بُنگپانی سرا شئیر بستگ۔

جُتکگیں جاڑاں دو کیلءَ کن

کُنلاں پیچ و کئید و جیل ءَ کن

نند ہیل ءَ و ہاترا شاد کن

کاگدے چینی سُہر و آباد کن

تُستگیں زِردءَ پہ ہَوَس پاد کن

آشکاں مدہٗوش و سر آماد کن

دگہ یک شئیر ے ءِ تہا نامداریں شائر مُلا قاسم چُش گُشیت:۔

ہتلی ملگٗوراں کج ءِ سْروٗش دَنت چرءَ

کَشّیت دستاں چہ آستونکاں دَرءَ

چَنڈیت مہنا ءَ ایر ئیِ کنت نٗوک گْواپیں سرءَ

زَرگری سہت ئیِ لَرزَنت ماں دیم ءِ پیکر ءَ

آئی ءَ راجی تپاکی و بہادُری ءِ بابت ءَ ہم شئیر پِر بستگ:۔

ہر بہ ماں راج ءَ ٹُکر و بیر و ہون بیت

بْرات ہما اَنت پہ سدک و دل بْراتاں گون بیت

=

بُزدلیں مردان ءَ نسیب اِنت نامو دَپی

گوڑو ءَ لیگار نہ بنت پہکیں اَشرپی

=

ہر کُجام مرد کہ دیراِنت چہ بْراتانی گْورءَ

مِسل ءِ کشتی ءَ گرک اِنت ماں موجانی زِرءَ

مُلا قاسم دُگنیا ءِ لالچ ءَ بازیں رنگ ءَ وتی شئیرانی تہا پیش کنت و گُشیت کہ دُگنیا چو وش بالادیں کاڑ ءِ پئیم ءَ اِنت کہ وتارا سمبہینیت و پیش داریت۔ چُشکہ:ْ

دُنیا ہرروچ سمبہیت مِسلءِ گُل ہزار

توک و تائید و ہاراں بندیت کتار

جامگے شَرّیں ماں گْورءَ شیپیت زَر نِگار

بے اِہتبارے کہ نیست اِنت لبز ءَ را کرار

مُلا قاسم ءِ شائری ءِ تہا آئی ءَ مذہب ءَ گوں ہُب و واہگ گِندگ ءَ کئیت۔ اِشی ءِ ہواریءَ ملا قاسم ءِ شائری ءِ تہا پنت و سوج ءِ رہبندانی سرا ہم شائری گندگ ءَ کئیت۔ بلوچ چاگردی تب و مئیلانی بابت ءَ ہم آئیءَ وتی ہیال و لیکہ گوں شئیری رنگءَ دَرشان کُتگ اَنت۔ مُلا قاسم ءِ شئیرانی تہا وت ماں وتی نا تپاکی و چاگردءِ اَڑو جنجال ماراِتگ و گوں ربّءَ اے وڑا وتی شئیرانی تہا دَرشانی کُتگ:۔

مردم ءَ امرٗوز ءَ چیا گَم ناک کن ئے

یک پِت و یک مات ءَ دو چُک پیداک کن ئے

یکیءَ مِسل ءِ بُلبل ءَ ماں باگ ءَ کن ئے

یکیءَ تو دائم ءَ ہمکنار زاگءَ کن ئے

یکے چہ مال و دولتاں گنج دار کن ئے

یکے مُپلس و گریب و وار کن ئے

یکے ماں کٗوٹ و ماڑیاں سردار کن ئے

یکے پہ امرءِ کُدرتاں زَردار کن ئے

یکے پہ واست ءِ لُنکہ یے چم دار کن ئے

نمیرانیں شائر مُلاقسم ءِ اے شئیر ءِ تہا ملا گوں واجہ ہُدا ءَ اے وڑا گلگ ءِ درشانی کُتگ کہ مئے ہَند و ڈیھ پہ چُنڈ ءِ نان ءَ واز مندیگ اِنت و آ دگہ راج اَستو مند و وشہال اِنت۔ دُگنیا ءِ دائمی نہ بوہگ، اے امرٗوز ءَ بنی آدم ءِ ہِرس و لالچ نا تپاکی، ٹَگّی و ٹٗوری، چہ مذ ہب و دین ءَ بنی آدم ءِ دوری اے کُلیں بُن گپانی سرا آئی ءَ وتی دُرّیں ہیال دَرشان کُتگ اَنت۔ملا قاسم ءِ دؤرو باریگءَ اینچو دیر نہ گْوستگ بلئے انگت مُلا قاسم ءِ ودی بوہگ و مرگ ءِ بابت ءَ سرجمیں مالوم داری دست نہ کپتگ۔

واجہ بشیر احمد بلوچ ءَ مُلا قاسم ءِ شئیران ءَ نَز آؤرتگ و کتابی رنگ ءَ ’’پہکیں اَشرپی‘‘ءِ نام ءَ چاپ و شنگ کُتگ۔ نمیرانیں راجی شائر مُلا قاسم ءِ شئیرانی دپتر ءِ نام’’ پہکیں اشرپی‘‘ کہ واجہ بشیر احمد بلوچ ءَ چِتگ و نز آؤرتگ اَنت و بلوچستان پبلیکیشنز ءِ نیمگ ءَ چہ1987؁ءَ چاپ و شنگ کُتگ۔ واجہ بشیر احمد بلوچ ءَ لہتیں شئیر چہ پہلوان و گُشندہانی پیت بنداں چہ دَر چتگ اَنت و یک کتابی رنگے ءَ دیما آؤرتگ اَنت۔

وَشددلیں بیگاہ یے شُتاں سئیل و گردشے

من دُچار کپتاں گوں کُمار چَمّیں مہوشے

گوں وتی ہلک ءِ ہمسراں لال پنچ و شَشے

کبگی لُڈان اِنت کرام کنان اِنت کش ماں کشے

منی ہیالانی باتن ءَ کپتگ بش بشے

ہتلی ملگوراں کج ءِ سرْوش دَنت چرءَ

کَشّیت دَستان اَزبارگیں آستونکاں دَرءَ

چنڈیت مہنایا ایر ئیِ کنت نٗوک گْواپیں سرءَ

زَرگری  سہت ئیِ لَرزاَنت ماں دیم ءِ پیکر ءَ

بُرز بُروانءَ ایر کنت شیہلیں چادرءَ

بیرگ ءَ تیرے لال نکشی ایںجنت مرءَ

مُلا قاسم وتی مستریں بْرات مُلا پازُلءِ وڑا یک حاضر جوابیں شائرے بوتگ و باز جاگہاں گوں شئیرانی دْرٗوشمءَ وت ماں وت ہبرو ہال کُتگ گوں وتی بْرات پازُل ءَ بلئے دیوان ءِ نندٗوکیں مردم سرپد نہ بوتگ اَنت کہ اے دوئیں بْرات چے گُشگءَ اَنت۔ مُلا پازُلءَ بلوچی ءِ شیخ سعدی ہم گُشنت و وتی دؤر و زمانگ ءِ یک مزنیں عالمے زانگ بوتگو عربی و فارسی زبانانی سرا سرجم ءَ بلد بوتگ۔ مزنیں شائرانی بابت ءَ وَ اے ہبر اَلّم ءَ گُشگ بیت کہ شائروتی وہد و دؤر و باریگ ءِ اَڑو جنجالانی ، نیز گاری، لالچ و چاگرد ءِ ناتپاکی، وتی شئیرانی برْاہ کُتگ اَنت و گیشتریں شئیر وتی راجو ڈیھ و چاگرد ءِ سرا اَنت۔مُلا قاسم ءِ شائری زبان ءِ تہا عربی و فارسی ءِ لبز و گالبند سک باز گندگ ءَ کئیت۔ مُلا قاسم ءِ شائری ءِ تہا مارا نیک راہی رَنگ و درْوٗشم ہم سک باز گندگ ءَ کئیت ، چو اے وڑا:۔

قادِر ءَ معذور گراں سَد بار

دَست بنداں گوں حضرتءَ مُختار

منءَ یک دل ءَ دوست اِنت ہر چہاریں یار

نِیّتوں اَست اِنت اے سَپر تکرار

مکّہ ءِ زیارتءَ رواں یک بار

 

 

 

٭۔۔۔٭۔۔۔٭

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*